Sleeping Pills Awareness: నిదురపో హాయిగా...

నిద్ర మాత్రలు

నిద్ర మాత్రల పట్ల కొన్ని అపోహలు, అవాస్తవాలు, భయాలు అలుముకుని ఉన్నాయి. కానీ బాధ్యతాయుతంగా వ్యవహరిస్తూ, వైద్యుల పర్యవేక్షణలో వాడుకుంటే నిద్రమాత్రలతో ప్రయోజనాలను పొందే వీలుంది.

అయితే అన్ని ప్రయత్నాలూ విఫలమై, చివరి ప్రత్యామ్నాయంగానే వీటిని ఎంచుకోవాలని సూచిస్తున్నారు వైద్యులు నిండైన ఆరోగ్యానికి కంటి నిండా నిద్ర అత్యవసరం. కానీ ఒత్తిడిలు, ఆందోళనలు, మానసిక సమస్యలు నిద్రను దూరం చేసి, ఆరోగ్యాన్ని కుదేలు చేస్తూ ఉంటాయి. ఇలాంటప్పుడు అంతిమ ప్రత్యామ్నాయంగా నిద్ర మాత్రల మీద ఆధారపడక తప్పదు. ఇలాంటి సందర్భాల్లో వైద్యులను సంప్రతించి, వాళ్లు సూచించినంత కాలం, సూచించిన మోతాదుల్లో మాత్రలను వాడుకోవచ్చు. అయితే అంతకంటే ముందు ఈ మాత్రల ఆవశ్యకత గురించి కూడా తెలుసుకోవాలి.

నిద్ర మాత్రలు ఎవరికి?

తీవ్రమైన నిద్రలేమి... అంటే రోజుల తరబడి నిద్ర పట్టకపోవడం, ఫలితంగా దైనందిన జీవితం, జీవనశైలి దెబ్బతింటున్నప్పుడు వైద్యులను సంప్రతించి పరిస్థితిని వివరించాలి. కొందరు పడక మీదకు చేరుకోగానే నిద్రలోకి జారుకోలేరు. ఇంకొందరికి పడుకోగానే నిద్ర పట్టినా, తరచూ మెలకువ అయిపోతూ ఉంటుంది. ఇంకొందరికి తడవలు తడవలుగా నిద్రపడుతూ ఉంటుంది. ఈ లక్షణాలన్నిటినీ వైద్యులకు స్పష్టంగా వివరించాలి. అలాగే నిద్ర పట్టకపోడానికి కూడా పలు రకాల కారణాలుంటాయి. కొందర్లో తీవ్ర ఒత్తిడి, ఆందోళనలుంటాయి. గుండెదడ, చమటలు పట్టడం, గాభరా లాంటి లక్షణాల కారణంగా నిద్ర సమస్య వేధిస్తున్నప్పుడు యాంగ్జయిటీ డిజార్డర్‌ చికిత్సలో భాగంగా, వ్యతిరేక ఆలోచనలతో నిద్రకు దూరమయ్యే మానసిక కుంగుబాటు చికిత్సలో భాగంగా కూడా వైద్యులు నిద్ర మాత్రలను సూచిస్తూ ఉంటారు. అలాగే పలురకాల మానసిక రుగ్మతల్లో ఇతర మందులతో పాటు నిద్రమాత్రలను కూడా సూచిస్తారు.

నిద్రమాత్రలతో ప్రయోజనాలున్నాయి

నిద్ర తగ్గితే రక్తపోటు పెరుగుతుంది. మధుమేహం, హృద్రోగాలు లాంటి ఇతరత్రా ఆరోగ్య సమస్యలు మరింత ఇబ్బంది పెడతాయి. కాబట్టి కంటి నిండా నిద్ర దూరమైనప్పుడు నిద్రమాత్రలను వాడుకోవచ్చు. అలాగని దీర్ఘకాలిక రుగ్మతలున్నవాళ్లందరూ తప్పనిసరిగా నిద్రమాత్రలు వాడుకోవలసిన అవసరం లేదు. ఒత్తిడి, ఆందోళనల కారణంగా మధుమేహం అదుపులోకి రానప్పుడు, వాటి వల్ల నిద్రపట్టని పరిస్థితి తలెత్తి, మధుమేహం మరింత పెరిగే ప్రమాదం ఉన్నప్పుడు నిద్ర మాత్రలు వాడుకోవచ్చు.

అలవాటు పడడం

నెలల తరబడి నిద్రమాత్రలు వాడుకున్నప్పుడు, మాత్ర వేసుకోనిదే నిద్ర పట్టని పరిస్థితి తలెత్తవచ్చు. ఈ సమస్య తలెత్తినప్పుడు, వైద్యుల దృష్టికి తీసుకువెళ్లి, క్రమేపీ మోతాదును తగ్గించుకుంటూ నిద్ర మాత్రల అవసరం లేకుండా నిద్ర పట్టే స్థితికి చేరుకోవచ్చు. అలాగే నిద్రమాత్రలు మానుకోవాలని అనుకుంటున్న వాళ్లు వైద్యుల సలహా తీసుకోకుండా, అకస్మాత్తుగా వాటిని ఆపేయడం కూడా సరికాదు. నిజానికి క్రమం తప్పక వైద్యులను కలుస్తూ, నిద్రమాత్రల మోతాదులు, కాలపరిమితుల గురించి చర్చిస్తూ అవసరమైనంత కాలమే వాటిని వాడుకోవాలి. నిద్రమాత్రలు మానుకునే దశలో విత్‌డ్రాయల్‌ సింప్టమ్స్‌ కనిపిస్తాయి. నిద్ర పడుతూ మెలకువ అవుతూ కొంత ఇబ్బందికి లోనైనా కంగారు పడకుండా, నిద్రపోయే ప్రయత్నం చేస్తూ ఉంటే, పరిస్థితి గాడిలో పడుతుంది. అన్నిటికంటే ముఖ్యంగా కంటినిండా నిద్రకు దోహదపడే ఇతరత్రా ప్రత్యామ్నాయాలన్నిటినీ ప్రయత్నించి, అంతిమంగా ఈ మాత్రలను తాత్కాలిక పరిష్కారంగా ఎంచుకోవాలి.

కిమ్స్‌ హాస్పిటల్‌, సికింద్రాబాద్‌.

అంతిమ ప్రత్యామ్నాయం మాత్రమే!

అలసటకు లోనైన శరీరం తప్పక విశ్రాంతిని కోరుకుంటుంది. అలాగే రోజువారీ ఒత్తిళ్లు, ఆందోళనలను వదిలించుకోడానికి కూడా శారీరక శ్రమ ఉపయోగపడుతుంది. కాబట్టి నిద్ర సమస్యతో బాధపడే ప్రతి ఒక్కరూ నడక లాంటి తేలికపాటి వ్యాయామాలను ఎంచుకోవచ్చు. అలాగే ధ్యానం, యోగాలతో మానసిక ఒత్తిడి తొలగి, కంటి నిండా నిద్ర పడుతుంది. నిద్రకు ఆటంకం కలిగించే అలవాట్లకు దూరంగా ఉంటూ, ఆరోగ్యకరమైన జీవనశైలిని కూడా పాటించాలి. అలాగే ఇతరత్రా రుగ్మతల ఫలితంగా నిద్రాభంగం కలుగుతున్నప్పుడు వాటిని కూడా చికిత్సలతో సరిదిద్దుకునే ప్రయత్నం చేయాలి.

దుష్ప్రయోజనాలు స్వల్పమే!

ఎక్కువ మోతాదులతో కూడిన నిద్రమాత్రలను దీర్ఘకాలం వాడుకున్నప్పుడు కొంతమేరకు దుష్ప్రభావాలను భరించవలసి వస్తుంది. కాబట్టి కొన్ని వారాలు నెలల పాటు వాడుకున్న తర్వాత, మోతాదును తగ్గిస్తూ నిద్ర మాత్రల మీద ఆధారపడే పరిస్థితిని వైద్యులు సరిదిద్దుతూ ఉంటారు. సాధారణంగా నిద్రమాత్రలతో ప్రారంభంలో తేలికపాటి నిస్సత్తువ, నిద్రమత్తు లాంటివి పగటిపూట వేధిస్తూ ఉంటాయి.

సురక్షితమైన మాత్రలు

కేవలం నిద్ర లక్ష్యంగా కాకుండా ఒత్తిడి, ఆందోళనలను వదిలించడం ద్వారా నిద్రకు దోహదపడే పరోక్ష మందులు కూడా ఇప్పుడు అందుబాటులోకొచ్చాయి. కుంగుబాటు ప్రభావాన్ని తగ్గించేలా మెదడులోని సెరటోనిన్‌ హార్మోన్‌ ఉత్పత్తిని పెంచే మందులతో సానుకూల స్వభావాన్ని పెంచడం ద్వారా కూడా నిద్ర పట్టేలా చేయవచ్చు. అలాగే యాంటీ డిప్రెసెంట్స్‌ మందులు కూడా కొంత మత్తును కలిగిస్తాయి. అవి నిద్రమాత్రలు కాకపోయినా కొంతమేరకు నిద్రకు దోహదపడతాయి. అలాగే కాంబినేషన్‌ మందులు కూడా అందుబాటులో ఉన్నాయి. తాజాగా దుష్ప్రభావాలు తక్కువగా, సత్ఫలితాలు ఎక్కువగా ఉండే సురక్షితమైన నిద్ర మాత్రలు కూడా అందుబాటులోకొచ్చాయి.

డాక్టర్‌ శివ రాజు

సీనియర్‌ కన్సల్టెంట్‌

ఫిజీషియన్‌ అండ్‌

డయాబెటాలజిస్ట్‌,

ఇవి కూడా చదవండి..

పీఓకే సహా జమ్మూకశ్మీర్‌ మొత్తాన్ని భారత్‌లో కలపాలి.. బ్రిటన్ ఎంపీ బ్లాక్‌మన్

మోదీని కలిసిన యోగి.. ఎజెండా ఏమిటంటే

మరిన్ని జాతీయ, అంతర్జాతీయ వార్తల కోసం క్లిక్ చేయండి