ఓటమిని స్వీకరించడం నేర్పండి

నేటి పోటీ ప్రపంచంలో పిల్లలు ఎప్పుడూ గెలవాలని, అందరికంటే ముందుండాలని ఒత్తిడికి గురవుతుంటారు. ఓటమి ఎదురైనప్పుడు వారు కుంగిపోకుండా ఉండాలంటే..

• శ్రమను గుర్తించండి: మార్కుల కంటే లక్ష్యం కోసం వారి కష్టాన్ని, అంకితభావాన్ని మెచ్చుకోండి. ‘నువ్వు ఈ రోజు గెలవకపోవచ్చు, కానీ నీ శ్రమ నాకు చాలా గర్వంగా అనిపించింది’’ అనే ఒక్క మాట వారిలో ఆత్మవిశ్వాసాన్ని నింపుతుంది.

• విమర్శించవద్దు: ఏదైనా తప్పు జరిగినప్పుడు, ఓడిపోయినప్పుడు మందలించడం వల్ల వారు భవిష్యత్తులో కొత్త పనులు చేయడానికి భయపడతారు. దానికి బదులుగా ‘‘ఎక్కడ తప్పు జరిగింది? ఎలా మెరుగుపరుచుకోవచ్చు?’ అని చర్చించండి.

• ప్రత్యర్థిని అభినందించడం: మనం ఓడిపోయినప్పుడు ప్రత్యర్థిని అభినందించడం అనేది గొప్ప సంస్కారం. ఇది వారిలో అసూయను తగ్గించి, పక్కవారి పట్ల గౌరవాన్ని పెంచుతుంది.

• సహజత్వం: ఆటల్లో గెలుపోటములు సహజమని, ఈ రోజు ఓడితే రేపు గెలవడానికి అవకాశం ఉంటుందని చెప్పాలి.

• రోల్‌మోడల్‌: పిల్లలు మీరు చెప్పే మాటల కంటే, మీరు చేసే పనులనే ఎక్కువగా గమనిస్తారు. మీరు ఓటమిని ధైర్యంగా స్వీకరిస్తే, వారు కూడా అదే బాటలో నడుస్తారు.

• ఎమోషనల్‌ సపోర్ట్‌: ఓడిపోయినప్పుడు పిల్లలు బాధపడటం సహజం. ఆ బాధను తక్కువ చేయకుండా ‘నీకు బాధగా ఉందని నాకు తెలుసు, పర్వాలేదు’ అని వారిని దగ్గరకు తీసుకోండి. వారి భావాలను గౌరవిస్తూనే, ఆ పరిస్థితి నుంచి బయటకు వచ్చి మళ్లీ ప్రయత్నించేలా ప్రోత్సహించాలి.

ఇవి కూడా చదవండి...

కేసీఆర్‌పై చర్యలు తీసుకోరా.. సీఎం రేవంత్‌‌కు బండి సంజయ్ సూటిప్రశ్న

మూసీ పునరుజ్జీవన ప్రాజెక్టు.. భూసేకరణ షురూ..

Read Latest Telangana News And Telugu News