పశ్చిమాసియా సెగ: రంగంలోకి రాజ్‌నాథ్ సింగ్.. ఇంధన భద్రతపై కీలక భేటీ

న్యూఢిల్లీ, మే 11: పశ్చిమాసియా పరిస్థితుల దృష్ట్యా దేశ ఇంధన భద్రత, నిత్యావసర వస్తువుల సరఫరాపై కేంద్ర ప్రభుత్వం అప్రమత్తమైంది. రక్షణమంత్రి రాజ్‌నాథ్ సింగ్ ఇవాళ మంత్రుల అనధికార బృందం ఐజీవోఎం (IGoM) 5వ సమావేశాన్ని నిర్వహించారు. ప్రస్తుత పరిస్థితులను సమీక్షించారు. గ్లోబల్ సప్లై చైన్‌కు ఎదురవుతున్న ముప్పులు, దేశీయంగా వస్తువుల లభ్యతపై ఈ భేటీలో సుదీర్ఘంగా చర్చించారు.

అనంతరం రాజ్‌నాథ్ సింగ్ సోషల్ మీడియా మాధ్యమం 'X' వేదికగా స్పందిస్తూ.. 'ప్రభుత్వం ప్రధాని మోదీ నాయకత్వంలో అన్ని అవసరమైన చర్యలు తీసుకుంటోంది.. ప్రజలు ఎలాంటి ఆందోళన చెందవద్దు. నిత్యావసరాల కొరత రాకుండా పటిష్ఠమైన చర్యలు చేపట్టాం' అని అన్నారు. గ్లోబల్ సవాళ్లను ఎదుర్కోవడంలో ప్రజల భాగస్వామ్యం అత్యంత కీలకమని ఆయన పేర్కొన్నారు.

సరఫరా వ్యవస్థపై నిరంతర నిఘా:

పశ్చిమాసియాలో కొనసాగుతున్న యుద్ధ వాతావరణం కారణంగా ప్రపంచవ్యాప్తంగా సరఫరా గొలుసు (Supply Chain) దెబ్బతినే అవకాశం ఉండటంతో.. ఈ ప్రభావం భారత్‌పై పడకుండా ప్రభుత్వం ముందస్తు చర్యలు చేపడుతోంది. ముఖ్యంగా ఇంధన భద్రత, సామాన్యులకు అవసరమైన నిత్యావసర సరుకుల కొరత రాకుండా నిరంతరం సమీక్షిస్తున్నామని రాజ్‌నాథ్ సింగ్ పేర్కొన్నారు.

ప్రస్తుత పరిస్థితుల్లో ప్రజలు ఎలాంటి ఆందోళనకు గురికావద్దని, భయాందోళనలతో వస్తువులను నిల్వ చేసుకోవాల్సిన అవసరం లేదని రక్షణ మంత్రి స్పష్టం చేశారు.

ఆత్మనిర్భరత దిశగా అడుగులు:

ప్రధాని నరేంద్ర మోదీ నాయకత్వంలో నిత్యావసరాల సరఫరాను నిర్ధారించడానికి ప్రభుత్వం విశేష కృషి చేస్తోందని రాజ్‌నాథ్ సింగ్ ప్రశంసించారు. ప్రపంచవ్యాప్త అంతరాయాలను తట్టుకుని నిలబడటానికి ప్రజలందరూ భాగస్వాములు కావాలని ప్రధాని పిలుపునిచ్చారని ఆయన గుర్తు చేశారు. కష్టకాలంలో వనరుల పొదుపు, స్వయం సమృద్ధి (Self-reliance) సాధించడం ద్వారానే ఇందన భద్రతను (Energy Security) కాపాడుకోగలమని ఆయన అభిప్రాయపడ్డారు.

IGoM అంటే?

సాధారణంగా ప్రభుత్వం ఏదైనా ఒక క్లిష్టమైన సమస్య ఎదురైనప్పుడు లేదా వివిధ శాఖల మధ్య సమన్వయం అవసరమైనప్పుడు, సంబంధిత మంత్రులతో ఒక ప్రత్యేక బృందాన్ని ఏర్పాటు చేస్తుంది. దీనిని Informal Group of Ministers (అనధికార మంత్రుల బృందం) అంటారు.

ఈ ప్రత్యేక సమావేశం ముఖ్య ఉద్దేశాలు ఇవే:

శాఖల మధ్య సమన్వయం: పశ్చిమాసియా సంక్షోభం వల్ల కేవలం రక్షణ శాఖే కాదు.. విదేశీ వ్యవహారాలు, పెట్రోలియం, వాణిజ్యం, పౌర సరఫరాల శాఖల మధ్య సమన్వయం అవసరం. వీరందరినీ ఒకే వేదికపైకి తెచ్చి నిర్ణయాలు తీసుకోవడమే ఈ IGoM పని.

ముందస్తు అంచనా (Risk Assessment): యుద్ధం వల్ల సముద్ర మార్గాల్లో రవాణా ఆగిపోతే, మన దేశానికి వచ్చే చమురు (Crude oil) ఇతర నిత్యావసరాల సరఫరాకు ఎలాంటి ఆటంకాలు కలుగుతాయో ఈ బృందం ముందుగానే అంచనా వేస్తుంది.

ప్రత్యామ్నాయ మార్గాలు: ఒకవేళ సరఫరా గొలుసు దెబ్బతింటే, స్టాక్ ఎంతకాలం వస్తుంది? ఇతర దేశాల నుంచి దిగుమతి చేసుకునే అవకాశం ఉందా? అనే అంశాలపై వీరు ప్రణాళికలు సిద్ధం చేస్తారు.

ధరల నియంత్రణ: అంతర్జాతీయంగా ధరలు పెరిగినప్పుడు, ఆ భారం సామాన్యుడిపై పడకుండా దేశీయంగా ఎలాంటి సబ్సిడీలు లేదా రాయితీలు ఇవ్వాలో ఈ గ్రూప్ చర్చించి ప్రధానికి నివేదిస్తుంది.

రాజ్‌నాథ్ సింగ్ నేతృత్వంలో ఎందుకు?

రక్షణ మంత్రిగా ఆయనకు దేశ భద్రతతో పాటు అంతర్జాతీయ వ్యూహాలపై పట్టు ఉంటుంది. పశ్చిమాసియా సంక్షోభం అనేది అంతర్జాతీయ భద్రతకు సంబంధించిన అంశం కావున, సీనియర్ మంత్రిగా రాజ్‌నాథ్ సింగ్ ఈ 5వ సమావేశానికి అధ్యక్షత వహించి, అన్ని శాఖలను అప్రమత్తం చేశారు. క్లుప్తంగా చెప్పాలంటే, దేశంలో పెట్రోల్, డీజిల్, పప్పు.. ఉప్పుల కొరత రాకుండా యుద్ధ ప్రాతిపదికన పనిచేసే ఒక హై-లెవల్ కమిటీయే ఈ IGoM.

కాగా, పశ్చిమాసియా సంక్షోభం మొదలైనప్పటి నుంచి కేంద్ర ప్రభుత్వం పరిస్థితిని గమనిస్తూ ఎప్పటికప్పుడు సమీక్షలు నిర్వహిస్తోంది. ఇవాళ జరిగిన సమావేశం ఈ వరుసలో ఐదవది. మొదటి సమావేశం (మార్చి 29, 2026)న నిర్వహించారు. సంక్షోభం మొదలైన కొత్తలో అసలు దీని ప్రభావం ఏయే రంగాలపై పడుతుందో అంచనా వేయడానికి తొలిసారి భేటీ అయ్యారు.

ఇంతకుముందు, ఏప్రిల్ 18, 2026న నాలుగవ సమావేశం జరిపారు. అప్పటికే యుద్ధం మొదలై నెల రోజులు గడవడంతో.. మన దగ్గర ఉన్న పెట్రోల్, డీజిల్ నిల్వలు ఎంతవరకు సరిపోతాయో సమీక్షించారు. అప్పట్లో మన దగ్గర 60 రోజులకు సరిపడా నిల్వలు ఉన్నాయని ప్రభుత్వం ప్రకటించింది. ఇక, నేటి ఐదవ సమావేశం అన్నింటికంటే కీలకమైనది. ఎందుకంటే, దీనికి ఒక్కరోజు ముందే ప్రధాని మోదీ స్వయంగా రంగంలోకి దిగి 'చమురు పొదుపు చేయండి, బంగారం కొనకండి' అని ప్రజలకు విజ్ఞప్తి చేశారు.

ప్రధాని మోదీ 'సేవ్ ఆయిల్' మంత్రం:

హైదరాబాద్‌లో నిన్న జరిగిన భారీ బహిరంగ సభలో ప్రధాని నరేంద్ర మోదీ దేశ ఆర్థిక స్థితిగతులపై కీలక వ్యాఖ్యలు చేసిన సంగతి తెలిసిందే. అంతర్జాతీయంగా సరఫరా వ్యవస్థలు ఒత్తిడిలో ఉన్నాయని, భారత్‌కు తగినంత చమురు నిల్వలు లేని కారణంగా పెట్రోల్, డీజిల్‌ను అత్యంత జాగ్రత్తగా వాడాలని సూచించారు.

బంగారు కొనుగోళ్లు: విదేశీ మారక ద్రవ్య నిల్వలను కాపాడుకోవడానికి ఒక ఏడాది పాటు అనవసరమైన బంగారు కొనుగోళ్లకు దూరంగా ఉండాలని ప్రధాని విజ్ఞప్తి చేశారు.

దేశం కోసం ప్రాణాలు అర్పించడమే కాదు, క్లిష్ట సమయాల్లో బాధ్యతగా మెలగడం కూడా దేశభక్తి అని ప్రధాని ఉద్ఘాటించారు. దేశవ్యాప్తంగా ఎలక్ట్రిక్ వాహనాల (EV) వాడకాన్ని పెంచాలని, ఇంధన పొదుపు ద్వారా స్వయం సమృద్ధి (Self-reliance) సాధించాలని ఆయన కోరారు. పశ్చిమాసియాలో నెలకొన్న అనిశ్చితి వల్ల ఇంధన ధరలు పెరిగే అవకాశం ఉన్న తరుణంలో, కేంద్ర ప్రభుత్వం ముందుగానే ప్రజలను అప్రమత్తం చేయడం గమనార్హం.

ఈ వార్తనూ చదవండి:

ఇజ్రాయెల్‌కు షాకిచ్చిన హెజ్‌బొల్లా.. ఐరన్ డోమ్ యూనిట్ ధ్వంసం

భారత్‌కు పాక్ ఆర్మీ చీఫ్ వార్నింగ్