తమిళనాడు సీఎం ఎం.కే. స్టాలిన్ రాజీనామా.. గవర్నర్ ఆమోదం

చెన్నై (తమిళనాడు), మే 5: తమిళనాడు అసెంబ్లీ ఎన్నికల్లో ద్రవిడ మున్నేట్ర కజగం (DMK) పరాజయం పాలైన నేపథ్యంలో.. ముఖ్యమంత్రి ఎం.కే. స్టాలిన్ తన పదవికి రాజీనామా చేశారు. ఈ రోజు (మంగళవారం) మధ్యాహ్నం ఆయన లోక్‌భవన్‌లో గవర్నర్ రాజేంద్ర విశ్వనాథ్ అర్లేకర్‌ను కలిసి తన రాజీనామా పత్రాన్ని సమర్పించారు. స్టాలిన్ రాజీనామాను గవర్నర్ వెంటనే ఆమోదించారు. అయితే కొత్త ప్రభుత్వం ఏర్పాటయ్యే వరకూ ఆపద్ధర్మ ముఖ్యమంత్రిగా కొనసాగాలని గవర్నర్ ఆయన్ని కోరారు.

తాజాగా జరిగిన 2026 తమిళనాడు అసెంబ్లీ ఎన్నికల్లో నటుడు విజయ్ నేతృత్వంలోని 'తమిళగ వెట్రి కజగం' (TVK) పార్టీ అతిపెద్ద పార్టీగా అవతరించింది. 234 అసెంబ్లీ స్థానాలకు గాను.. TVK 108 స్థానాలను కైవసం చేసుకోగా.. అధికారంలో ఉన్న DMK కేవలం 59 స్థానాలకే పరిమితమైంది. ఒక భారీ కుదుపుగా, ముఖ్యమంత్రి స్టాలిన్ తన సొంత నియోజకవర్గమైన కొలత్తూరులో TVK అభ్యర్థి వి.ఎస్. బాబు చేతిలో 8,795 ఓట్ల తేడాతో ఓటమి పాలయ్యారు.

రాజీనామా అనంతరం స్టాలిన్ 'X' (ట్విట్టర్) వేదికగా స్పందిస్తూ.. 'ప్రజల తీర్పును శిరసావహిస్తున్నాను. గత ఐదేళ్లలో డీఎంకే ప్రభుత్వం అనేక ప్రజా సంక్షేమ పథకాలను అమలు చేసింది. మా కూటమికి మద్దతు తెలిపిన కోట్లాది మంది ఓటర్లకు కృతజ్ఞతలు' అని పేర్కొన్నారు. ఎన్నికల్లో ఓటమి తర్వాత భవిష్యత్తు కార్యాచరణపై చర్చించేందుకు డీఎంకే మిత్రపక్షాలైన కాంగ్రెస్, సీపీఐ, సీపీఎం నేతలతో స్టాలిన్ బుధవారం సమావేశం కానున్నారు.

తమిళనాడు రాజకీయాల్లో దశాబ్దాలుగా కొనసాగుతున్న డీఎంకే-ఏఐఏడీఎంకే ద్వంద్వ ఆధిపత్యానికి ఈ ఎన్నికల ఫలితాలు తెరదించాయి. ప్రభుత్వ ఏర్పాటుకు విజయ్ నేతృత్వంలోని టీవీకే పార్టీకి పది సీట్లు అవసరం కావడంతో ఇతర చిన్న పార్టీల మద్దతుతో ప్రభుత్వం ఏర్పాటు చేసే దిశగా అడుగులు వేస్తోంది.

ఇవి కూడా చదవండి..

బెంగాల్‌కు బీజేపీ కేంద్ర పరిశీలకుడిగా అమిత్‌షా, అస్సాంకు జేపీ నడ్డా

తమిళనాడులో ప్రభుత్వం ఏర్పాటుకు సన్నాహాలు.. గవర్నర్ అపాయింట్‌మెంట్ కోరిన విజయ్..