ఆర్మేనియా ప్రధాని పషిన్యాన్‌తో ప్రధాని మోదీ భేటీ

బిష్కెక్ (కిర్గిజిస్థాన్), ఆగస్టు 31: కిర్గిజిస్థాన్ రాజధాని బిష్కెక్‌లో జరుగుతున్న షాంఘై సహకార సంస్థ (SCO) సదస్సు సందర్భంగా భారత ప్రధాని నరేంద్ర మోదీ, ఆర్మేనియా ప్రధాని నికోల్ పషిన్యాన్‌తో ద్వైపాక్షిక సమావేశం నిర్వహించారు. చరిత్రాత్మకంగా ఇరు దేశాల మధ్య ఉన్న దృఢమైన అనుబంధాన్ని, స్నేహపూర్వక సంబంధాలను ఈ భేటీ మరింత బలోపేతం చేసింది.

రక్షణ రంగంలో కీలక భాగస్వామ్యం

భారత్-ఆర్మేనియా సంబంధాలలో రక్షణ సహకారం అత్యంత ప్రాధాన్యత కలిగిన రంగంగా మారింది. 2020లో స్వదేశీ సాంకేతికతతో తయారైన 'స్వాతి' వెపన్ లొకేటింగ్ రాడార్ కొనుగోలుతో మొదలైన ఈ భాగస్వామ్యం, ఆ తర్వాత వేగంగా పుంజుకుంది. ఆర్మేనియా.. భారత్ నుంచి పినాక మల్టీ-బ్యారెల్ రాకెట్ లాంచర్ వ్యవస్థలు, ఆకాశ్ ఎయిర్ డిఫెన్స్ సిస్టమ్స్, ఏటీఏజీఎస్ (ATAGS) ఆర్టిలరీ తుపాకులు, ఎమ్ఎఆర్‌జీ (MARG) 155mm సెల్ఫ్-ప్రొపెల్డ్ హోవిట్జర్లు, ఎఎల్ఎస్-51 డ్రోన్లు ఇంకా జెన్ యాంటీ-డ్రోన్ వ్యవస్థల వంటి అత్యాధునిక ఆయుధాలను కొనుగోలు చేస్తోంది.

పశ్చిమాసియా సంక్షోభం – భారతీయుల తరలింపు

ఇటీవల పశ్చిమాసియాలో చోటుచేసుకున్న పరిణామాల నేపథ్యంలో, ఇరాన్‌లో చిక్కుకున్న భారతీయ పౌరులను సురక్షితంగా ఖాళీ చేయించడంలో ఆర్మేనియా ప్రధాని అందించిన సహకారానికి ప్రధాని మోదీ ఈ సందర్భంగా ప్రత్యేక ధన్యవాదాలు తెలిపారు. ఇటీవల ఆర్మేనియా పార్లమెంటరీ ఎన్నికల్లో విజయం సాధించిన పషిన్యాన్‌కు ప్రధాని మోదీ ఇదివరకే శుభాకాంక్షలు తెలిపారు.

నిన్న (ఆదివారం) బిష్కెక్ చేరుకున్న ప్రధాని మోదీ, సదస్సుకు ముందు రాజధానిలోని మహాత్మా గాంధీ స్మారక చిహ్నం వద్ద నివాళులర్పించారు. ఈ విగ్రహాన్ని 2015లో తన కిర్గిజిస్థాన్ పర్యటన సందర్భంగా ప్రధాని మోదీ స్వయంగా ఆవిష్కరించారు.

అక్కడి స్థానిక భారతీయులను, ఇతర వర్గాల ప్రజలను కలుసుకున్న మోదీకి 'మానస్ కిర్గిజ్ వీరగాథ కావ్య' అనే ప్రత్యేక పుస్తకాన్ని వారంతా కలిసి బహుకరించారు. పషిన్యాన్‌తో భేటీ అనంతరం ఇరాన్ అధ్యక్షుడు మసౌద్ పెజెష్కియాన్, రష్యా అధ్యక్షుడు వ్లాదిమిర్ పుతిన్‌లతో కూడా ప్రధాని సమావేశం కానున్నారు.

వరల్డ్ నోమాడ్ గేమ్స్: అరేనా స్టేడియంలో జరిగే ప్రపంచ నోమాడ్ గేమ్స్ ప్రారంభోత్సవం, ఆ తర్వాత జరిగే అనధికారిక విందు, సాంస్కృతిక కార్యక్రమాల్లో ప్రధాని మోదీ.. కిర్గిజ్ రిపబ్లిక్ అధ్యక్షుడు సాదిర్ జాపరోవ్ బిష్కెక్‌తో కలిసి పాల్గొంటారు.

రేపు (మంగళవారం) జరగనున్న 26వ ఎస్‌సీఓ (SCO) శిఖరాగ్ర సదస్సులో ప్రధాని మోదీ ప్రసంగించనున్నారు. ప్రాంతీయ భద్రత, ఆర్థిక పురోగతి, సభ్యదేశాల మధ్య పరస్పర సహకారాన్ని పెంపొందించడంపై ఈ సమావేశంలో ప్రధానంగా చర్చించనున్నారు.

ఇవి కూడా చదవండి...

వెలిగొండ ప్రాజెక్ట్ ఫేజ్‌-1ను ప్రారంభించిన సీఎం చంద్రబాబు

వెలిగొండ ప్రాజెక్ట్ పూర్తి చేస్తానంటూ నమ్మించి మోసం.. జగన్‌పై ఎంపీ మాగుంట సీరియస్