అలహాబాద్‌ హైకోర్టులో రాహుల్‌గాంధీకి ఊరట

ప్రయాగ్‌రాజ్, ఏప్రిల్ 17: పౌరసత్వ వివాదంలో కాంగ్రెస్ అగ్రనేత, లోక్‌సభ ప్రతిపక్ష నేత రాహుల్ గాంధీపై ఎఫ్ఐఆర్ (FIR) నమోదు చేయాలన్న ఆదేశాలపై అలహాబాద్ హైకోర్టు ఇవాళ (శనివారం) స్టే విధించింది. నిన్న (శుక్రవారం) రాహుల్‌పై విచారణకు ఆదేశించిన అదే లక్నో బెంచ్, నేడు ఆ నిర్ణయాన్ని నిలిపివేస్తూ కీలక ఉత్తర్వులు జారీ చేసింది.

నిన్నటి ఆదేశాలు:

రాహుల్ గాంధీ బ్రిటీష్ పౌరసత్వం కలిగి ఉన్నారన్న ఆరోపణలపై ఎఫ్ఐఆర్ నమోదు చేసి దర్యాప్తు చేయాలని జస్టిస్ సుభాష్ విద్యార్థి నేతృత్వంలోని బెంచ్ శుక్రవారం మౌఖికంగా ఆదేశించింది. అయితే, ఈ తీర్పు కాపీపై సంతకం చేసే ముందే కోర్టు తన నిర్ణయాన్ని సమీక్షించుకుంది. నిందితుడిగా ఆరోపణలు ఎదుర్కొంటున్న వ్యక్తి (రాహుల్ గాంధీ) వాదన వినకుండా ఏకపక్షంగా ఆదేశాలు ఇవ్వడం సరికాదని ధర్మాసనం అభిప్రాయపడింది. 2014 నాటి ఒక ఫుల్ బెంచ్ తీర్పును ఉటంకిస్తూ, నిందితుడికి నోటీసులు ఇచ్చి వివరణ కోరడం తప్పనిసరని కోర్టు స్పష్టం చేసింది.

వివాదం ఏమిటి?

కర్ణాటకకు చెందిన బీజేపీ కార్యకర్త విగ్నేష్ శిశిర్ ఈ పిటిషన్ వేశారు. 2003-2009 మధ్య లండన్‌లోని 'బ్యాక్ ఆప్స్ లిమిటెడ్' అనే కంపెనీకి డైరెక్టర్‌గా ఉన్న సమయంలో రాహుల్ గాంధీ తనను తాను బ్రిటీష్ పౌరుడిగా పేర్కొన్నారని, ఇది భారత రాజ్యాంగం ప్రకారం చట్టవిరుద్ధమని ఆయన వాదన. గతంలో లక్నోలోని ఎంపీ/ఎమ్మెల్యే కోర్టు ఈ పిటిషన్‌ను కొట్టివేయడంతో, ఆయన హైకోర్టును ఆశ్రయించారు.

కోర్టు తదుపరి చర్యలు:

ఈ కేసులో రాహుల్ గాంధీకి నోటీసులు జారీ చేయాలని కోర్టు నిర్ణయించింది. దీనిపై పూర్తిస్థాయి విచారణను ఏప్రిల్ 20కి వాయిదా వేసింది. అప్పటివరకు ఎఫ్ఐఆర్ నమోదు ప్రక్రియపై స్టే కొనసాగుతుంది.

ఇవి కూడా చదవండి..

మళ్లీ హోర్ముజ్ దిగ్భంధనం.. ప్రకటించిన ఇరాన్ సైన్యం..

అమెరికా సైనికులకు భోజనం పెడతాం.. ఇరాన్ వ్యంగ్య వ్యాఖ్యలు