18 నౌకల్లో రూ.9వేల కోట్ల సరకును సురక్షితంగా భారత్‌కు చేర్చాం: రాజ్‌నాథ్ సింగ్

విశాఖపట్నం, జులై 11: ప్రస్తుత పశ్చిమాసియా సంక్షోభ పరిస్థితుల నడుమ భారత నౌకాదళం దేశ ఆర్థిక స్థిరత్వానికి బలమైన రక్షణ కవచంగా నిలిచిందని రక్షణ మంత్రి రాజ్‌నాథ్ సింగ్ ప్రశంసించారు. ఇవాళ (శనివారం) విశాఖపట్నంలోని నావల్ డాక్‌యార్డ్‌లో అత్యాధునిక స్టీల్త్ ఫ్రిగేట్ 'ఐఎన్ఎస్ మహేంద్రగిరి' (INS Mahendragiri) యుద్ధనౌకను అధికారికంగా నౌకాదళంలోకి ప్రవేశపెట్టిన (కమిషనింగ్) అనంతరం ఆయన మాట్లాడారు. సవాలుతో కూడిన గ్లోబల్ పరిస్థితుల్లో నౌకాదళం చేపట్టిన 'ఆపరేషన్ ఊర్జా సురక్ష' (Operation Urja Suraksha) అద్భుత విజయాన్ని సాధించిందని ఆయన ఈ సందర్భంగా వెల్లడించారు.

ఆర్థిక ప్రయోజనాలకు రక్షణగా 'ఆపరేషన్ ఊర్జా సురక్ష'

పశ్చిమాసియాలో ఘర్షణలు ప్రారంభమైనప్పటి నుంచి సముద్ర మార్గాల్లో వాణిజ్య నౌకలకు ముప్పు పెరిగిన నేపథ్యంలో, భారత నౌకాదళం వ్యూహాత్మకంగా వ్యవహరించిందని రక్షణ మంత్రి పేర్కొన్నారు.'ఆపరేషన్ ఊర్జా సురక్ష' ద్వారా రక్షణ రంగం సుమారు 18 వాణిజ్య నౌకలకు సురక్షిత రక్షణ(ఎస్కార్ట్) కల్పించిందని తెలిపారు. ఈ నౌకల్లో తరలించిన అత్యవసర సరకుల విలువ రూ.9,000 కోట్లకు పైగా ఉంటుందని స్పష్టం చేశారు. 'మన నౌకాదళం పోరాడే శక్తిగా మాత్రమే కాదు, భారతదేశ ఆర్థిక ప్రయోజనాలను కాపాడే బలమైన రక్షకుడిగా కూడా అవతరించింది' అని రాజ్‌నాథ్ సింగ్ కొనియాడారు.

ఐఎన్ఎస్ మహేంద్రగిరి ప్రాధాన్యం: 'బ్లూ-వాటర్' సామర్థ్యం

ప్రాజెక్ట్ 17A కింద నిర్మించిన చివరి ఫ్రిగేట్ క్లాస్ యుద్ధనౌక అయిన 'ఐఎన్ఎస్ మహేంద్రగిరి' నౌకాదళం బలాన్ని మరింత పెంచుతుందని మంత్రి తెలిపారు. 'ఇది ఒక 'బ్లూ-వాటర్' (Blue-water) నౌక. అంటే కేవలం తీరప్రాంతాలకే పరిమితం కాకుండా, సుదూర ప్రాంతాల్లోని అగాధ సముద్రాలలో వారాల తరబడి భారత నౌకా ప్రయోజనాలను ఇది కాపాడగలదు. ఇప్పటివరకు భారతదేశం సముద్రం ఆధారంగా తన దిశను మార్చుకుంది. కానీ ఇప్పుడు సముద్రపు దిశను శాసించే సామర్థ్యాన్ని మన దేశం సొంతం చేసుకుంటోంది' అని రాజ్‌నాథ్ సింగ్ చెప్పారు.

ఇండో-పసిఫిక్‌లో 'నెట్ సెక్యూరిటీ ప్రొవైడర్'గా భారత్

ప్రధాని నరేంద్ర మోదీ నేతృత్వంలోని సముద్ర దార్శనికత 'మహా సాగర్' విధానాన్ని రాజ్‌నాథ్ సింగ్ ఈ సందర్భంగా ప్రస్తావించారు. ఇండో-పసిఫిక్ ప్రాంతంలో భారత్ అత్యంత నమ్మకమైన భాగస్వామిగా ఎదిగిందని, ప్రపంచ దేశాల చూపు ప్రస్తుతం ఈ ప్రాంతంపైనే ఉందని అన్నారు. సముద్రపు దొంగల నిర్మూలన, విపత్తు నిర్వహణ సహాయక చర్యలు, యుద్ధ ప్రాంతాల నుంచి విదేశీయులను సురక్షితంగా తరలించడంలో భారత నౌకాదళం ఎల్లప్పుడూ'ఫస్ట్ రెస్పాండర్' (తొలి స్పందనదారు)గా నిలుస్తోందని స్పష్టం చేశారు. భారత సాయుధ దళాల పోరాట పటిమకు, వ్యూహాత్మక సన్నద్ధతకు 'ఆపరేషన్ సిందూర్'ఒక నిదర్శనమని, శత్రువులను మట్టుబెట్టే సామర్థ్యం భారత్‌కు ఉందని హెచ్చరించారు.

ఈ వార్తలు కూడా చదవండి

తెలంగాణ బులెట్ ట్రైన్స్ హబ్‌గా మారబోతోంది: అశ్వినీ వైష్ణవ్

ఐదు గనులకు ఫైవ్‌ స్టార్‌ రేటింగ్‌