ఒడిశాలోని కటక్‌ SCB హాస్పిటల్‌లో భారీ అగ్నిప్రమాదం, పది మంది మృతి

కటక్, ఫిబ్రవరి 16: ఒడిశా రాష్ట్రంలోని ప్రముఖ ప్రభుత్వ వైద్యశాల అయిన ఎస్‌సీబీ (SCB) మెడికల్ కాలేజీలో ఈ (సోమవారం) తెల్లవారుజామున ఘోర అగ్నిప్రమాదం సంభవించింది. ఆస్పత్రిలోని ట్రామా కేర్ ఐసీయూ (ICU) విభాగంలో మంటలు చెలరేగడంతో చికిత్స పొందుతున్న 10 మంది రోగులు ప్రాణాలు కోల్పోయారు. ఈ ఘటన రాష్ట్రవ్యాప్తంగా తీవ్ర కలకలం రేపుతోంది.

అసలేం జరిగింది?

ఈ తెల్లవారుజామున సుమారు 3 గంటల సమయంలో ట్రామా కేర్ విభాగంలోని మొదటి అంతస్తులో ఉన్న ఐసీయూలో ఒక్కసారిగా మంటలు అంటుకున్నాయి. షార్ట్ సర్క్యూట్ కారణంగానే ఈ ప్రమాదం జరిగి ఉండవచ్చని ప్రాథమికంగా భావిస్తున్నారు. మంటలు వేగంగా వ్యాపించడంతో పాటు దట్టమైన పొగ కమ్ముకోవడంతో ఐసీయూలో వెంటిలేటర్లపై ఉన్న రోగులు బయటకు రాలేక.. ఊపిరి ఆడక మరణించారు.

మృతుల వివరాలు:

మరణించిన 10 మందిలో ఏడుగురు ఐసీయూ లోపలే ప్రాణాలు వదలగా, మరో ముగ్గురు ఇతర వార్డులకు తరలిస్తుండగా మృతి చెందారు. రోగులను కాపాడే ప్రయత్నంలో సుమారు 11 మంది ఆస్పత్రి సిబ్బంది తీవ్రంగా గాయపడ్డారు. పొగ పీల్చడం వల్ల మరో 23 మంది ఉద్యోగులు అస్వస్థతకు గురై ప్రస్తుతం చికిత్స పొందుతున్నారు.

సీఎం పరామర్శ.. పరిహారం ప్రకటన

ప్రమాద వార్త తెలిసిన వెంటనే ఒడిశా ముఖ్యమంత్రి మోహన్ చరణ్ మఝీ ఘటనాస్థలికి చేరుకున్నారు. పరిస్థితిని సమీక్షించిన ఆయన బాధితులను పరామర్శించారు. ఈ సందర్భంగా సీఎం కీలక ప్రకటనలు చేశారు:

రూ. 25 లక్షల పరిహారం: మృతుల కుటుంబాలకు ప్రభుత్వం తరపున ఒక్కొక్కరికి రూ. 25 లక్షల చొప్పున ఎక్స్‌గ్రేషియా ప్రకటించారు.

ఉచిత వైద్యం: గాయపడిన వారికి మెరుగైన వైద్యం అందించాలని, దీనికి అయ్యే ఖర్చును ప్రభుత్వమే భరిస్తుందని ఆదేశించారు.

న్యాయ విచారణ: ఈ ప్రమాదంపై సమగ్ర న్యాయ విచారణకు సీఎం ఆదేశించారు. ఆస్పత్రిలో భద్రతా లోపాలు ఉన్నట్లు తేలితే బాధ్యులపై కఠిన చర్యలు తీసుకుంటామని హెచ్చరించారు.

సహాయక చర్యలు:

అగ్నిమాపక సిబ్బంది సకాలంలో స్పందించి మూడు ఫైర్ ఇంజన్లతో మంటలను అదుపులోకి తెచ్చారు. లేదంటే ప్రాణనష్టం మరింత ఎక్కువగా ఉండేదని అధికారులు తెలిపారు. ప్రస్తుతం మిగిలిన రోగులను సురక్షిత ప్రాంతాలకు తరలించి చికిత్స అందిస్తున్నారు.

ఈ వార్తలు కూడా చదవండి:

రోహిత్‌రెడ్డి జైలుకు

నేనే తప్పూ చేయలేదు!

Read Latest Telangana News and National News