మొదలైన అమర్‌నాథ్ యాత్ర.. తొలి బృందానికి చందర్‌కోట్ వద్ద ఘన స్వాగతం!

రాంబన్ (జమ్మూ కశ్మీర్) జూలై 2: హిమాలయాల్లో వెలిసిన పవిత్ర అమర్‌నాథ్ హిమలింగ దర్శన యాత్ర ప్రారంభమైంది. క్షేత్ర దర్శనానికి బాల్తాల్ రూట్‌ లో వెళ్తున్న భక్తుల తొలి బృందానికి జమ్మూ-శ్రీనగర్ జాతీయ రహదారిపై ఉన్న చందర్‌కోట్ వద్ద ఘన స్వాగతం లభించింది. రాంబన్ జిల్లా యంత్రాంగం, సివిల్ సొసైటీ సభ్యులు, వివిధ సంస్థలు భక్తులకు ఆత్మీయ ఆతిథ్యంతో స్వాగతం పలికాయి.

అంతకుముందు, జమ్మూలోని భగవతీ నగర్ బేస్ క్యాంప్ నుంచి లెఫ్టినెంట్ గవర్నర్ మనోజ్ సిన్హా ఈ వార్షిక యాత్ర కాన్వాయ్‌ను జెండా ఊపి ప్రారంభించారు. భక్తులను స్వాగతించిన వారిలో డీఐజీ సర్గూన్ శుక్లా, రాంబన్ డిప్యూటీ కమిషనర్ మహమ్మద్ అలియాస్ ఖాన్, ఎస్ఎస్పీ అరుణ్ గుప్తా, ట్రాఫిక్ ఎస్ఎస్పీ రాజా ఆదిల్ హమీద్ సహా పలువురు ఉన్నతాధికారులు ఉన్నారు. తర్వాత, భక్తులు బస చేసే మొదటి ప్రధాన కేంద్రం చందర్‌కోట్.

పటిష్టమైన భద్రత – విస్తృత ఏర్పాట్లు

ఈ పవిత్ర యాత్ర సాఫీగా, సురక్షితంగా సాగేందుకు జిల్లా యంత్రాంగం అన్ని రకాల చర్యలు చేపట్టింది. చందర్‌కోట్ లంగర్ సైట్ వద్ద భక్తులకు అవసరమైన వసతులు, భోజన సదుపాయాలను సిద్ధం చేశారు. పోలీస్, ఆర్మీ, సెంట్రల్ ఆర్మ్‌డ్ పోలీస్ ఫోర్సెస్ (CAPF), ట్రాఫిక్ పోలీస్, ఆరోగ్య శాఖ, SDRF, ఫైర్ అండ్ ఎమర్జెన్సీ సర్వీసెస్ వంటి అన్ని విభాగాలు సమన్వయంతో పనిచేస్తున్నాయి.

57 రోజుల పాటు సుదీర్ఘ ప్రయాణం

దక్షిణ కశ్మీర్‌లోని హిమాలయాల్లో, దాదాపు 3,880 మీటర్ల ఎత్తులో సహజసిద్ధంగా ఏర్పడే మంచు శివలింగాన్ని దర్శించుకోవడానికి దేశం నలుమూలల నుంచి భక్తులు తరలివస్తారు. దేశంలోనే అత్యంత పవిత్రమైన పుణ్యక్షేత్రాలలో ఇది ఒకటి. ఈ ఏడాది 57 రోజుల పాటు సాగే ఈ వార్షిక యాత్ర జూలై 3వ తేదీ నుంచి అధికారికంగా రెండు మార్గాల్లో ప్రారంభం కానుంది.

1. పహల్గామ్ రూట్: అనంత్‌నాగ్ జిల్లాలోని సాంప్రదాయక 48 కిలోమీటర్ల 'నున్వాన్-పహల్గామ్' మార్గం.

2. బాల్తాల్ రూట్: గందర్ బాల్ జిల్లాలోని అత్యంత కష్టతరమైన, నిటారుగా ఉండే 14 కిలోమీటర్ల 'బాల్తాల్' మార్గం.

ఇక, పహల్గామ్ రూట్ ద్వారా అమర్ నాథ్ యాత్ర రేపటి నుంచి (జూలై 3) ప్రారంభమవుతుంది. ఈ రోజు ఉదయం (జూలై 2) జమ్మూ బేస్ క్యాంప్ నుంచి బయల్దేరిన మొత్తం 4,822 మంది భక్తులలో 2,510 మంది భక్తులు పహల్గామ్ రూట్ మార్గాన్ని ఎంచుకున్నారు. మిగిలిన 2,312 మంది బాల్తాల్ రూట్ వైపు వెళ్లారు.

ఈ సుదీర్ఘ అమర్‌నాథ్ యాత్ర ఆగస్టు 28వ తేదీన, రక్షాబంధన్ (రాఖీ పౌర్ణమి) పర్వదినంతో ముగుస్తుంది. అధికార యంత్రాంగం, స్వచ్ఛంద సంస్థలు సంయుక్తంగా చేసిన ఏర్పాట్లు భక్తులలో భరోసాను నింపడమే కాకుండా, కశ్మీర్ లోని సాంప్రదాయక ఆతిథ్యానికి అద్దం పట్టాయి.

ఇవి కూడా చదవండి..

బంగారం ధరలు మరింత కిందకు.. ఈ రోజు ఎలా ఉన్నాయంటే..

మీ పెంపుడు శక్తులను అదుపులో పెట్టుకోండి.. అమెరికాకు ఇరాన్ వార్నింగ్