సహజంగా మెరిసే జుట్టు కోసం ఇంట్లోనే ఈ చిట్కాలు పాటించండి

ఇంటర్నెట్ డెస్క్: జుట్టు అందం దాని వేర్లలోనే ఉంటుంది. అంటే తల చర్మం (స్కాల్ప్) ఆరోగ్యంగా ఉంటేనే జుట్టు బలంగా, అందంగా పెరుగుతుంది. చాలామంది జుట్టు సంరక్షణ అంటే షాంపూ, కండీషనర్ వరకే పరిమితం చేస్తారు. కానీ నిజానికి స్కాల్ప్ కేర్ చాలా ముఖ్యమైనది. తలపై చర్మం పొడిబారితే లేదా దురద, చుండ్రు వంటి సమస్యలు వస్తే, అవి జుట్టు ఆరోగ్యాన్ని ప్రభావితం చేస్తాయి.

జుట్టు స్వభావాన్ని తెలుసుకోవాలి

ప్రతి ఒక్కరి జుట్టు తత్వం వేరు. పొడి జుట్టు ఉంటే వారానికి 2 సార్లు తలస్నానం చేస్తే సరిపోతుంది. జిడ్డు జుట్టు ఉంటే తరచుగా శుభ్రం చేసుకోవాలి. కొన్నిసార్లు తల సమస్యలకు కాలుష్యం మాత్రమే కాకుండా, ఫంగల్ ఇన్ఫెక్షన్ లేదా ఇతర చర్మ సమస్యలు కూడా కారణం కావచ్చు. అలాంటి సందర్భాల్లో మూల కారణాన్ని గుర్తించి చికిత్స తీసుకోవాలి.

మర్దన ముఖ్యం

కొబ్బరి నూనె, ఆముదం, బాదం నూనెతో మృదువుగా తలకు మసాజ్ చేస్తే రక్త ప్రసరణ మెరుగుపడుతుంది. దీంతో జుట్టు వేర్లకు పోషణ అందుతుంది. అయితే జిడ్డు స్కాల్ప్ ఉన్నవారు నూనెను పరిమితంగా వాడాలి.

సరైన షాంపూ, కండీషనర్ వాడాలి

రసాయనాలు తక్కువగా ఉన్న సున్నితమైన షాంపూలు వాడటం మంచిది. తలస్నానం సమయంలో మెల్లగా మసాజ్ చేస్తే డెడ్ స్కిన్ తొలగిపోతుంది. అలాగే మంచి కండీషనర్ జుట్టును మృదువుగా ఉంచుతుంది.

వేడి నీటికి దూరంగా ఉండండి

మరీ వేడిగా ఉన్న నీటితో తలస్నానం చేస్తే తల చర్మంలోని సహజ తేమ తగ్గిపోతుంది. కాబట్టి ఎప్పుడూ గోరువెచ్చని నీటితోనే తలస్నానం చేయడం ఉత్తమం.

సహజ పదార్థాల ఉపయోగం

అలోవెరా జెల్, హెన్నా, రోజ్‌మేరీ ఆయిల్ వంటి సహజ పదార్థాలు జుట్టుకు ఎంతో మేలు చేస్తాయి. ఇవి స్కాల్ప్‌ను చల్లగా ఉంచి, జుట్టు పెరుగుదలకు సహాయపడతాయి.

హెయిర్ కలర్స్‌పై జాగ్రత్త

కెమికల్ కలర్స్, బ్లీచ్ వంటివి తరచుగా వాడటం వల్ల జుట్టు బలహీనంగా మారుతుంది. వీలైనంత వరకు సహజ రంగులకు ప్రాధాన్యం ఇవ్వడం మంచిది.

తలపై ఇలాంటి సమస్యలు ఎక్కువగా ఉంటే వైద్యులను సంప్రదించడం ఉత్తమం. సరైన సంరక్షణతో స్కాల్ప్ ఆరోగ్యంగా ఉంటే, సహజంగానే మీ జుట్టు మెరిసిపోతుంది. జుట్టు అందం కోసం స్కాల్ప్ ఆరోగ్యమే మూలం. సరైన సంరక్షణ, సహజ చిట్కాలతో మెరిసే జుట్టు సొంతం చేసుకోవచ్చు.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఆరోగ్య బీమా లేదా అత్యవసర నిధి.. ఏది ముఖ్యం

పెర్ఫ్యూమ్ అవసరం లేకుండా చెమట వాసన పోవాలా? ఈ చిట్కాలు ఫాలో అవండి

For More Latest News