రైలు ఆలస్యమైతే రీఫండ్ వస్తుందా?

ఇంటర్నెట్ డెస్క్: భారతీయ రైల్వేల్లో సాంకేతిక సమస్యలు, ట్రాక్ మరమ్మతులు, వాతావరణ పరిస్థితులు లేదా ఇతర కారణాల వల్ల రైళ్లు ఆలస్యమవడం సాధారణమే. అయితే కొన్ని ప్రత్యేక పరిస్థితుల్లో రిజర్వేషన్ టికెట్ కలిగిన ప్రయాణికులు రీఫండ్ లేదా పరిహారం కోసం దరఖాస్తు చేసుకునే అవకాశం ఉంటుంది. జనరల్ టికెట్‌తో ప్రయాణించే వారికి సాధారణంగా ఈ రీఫండ్ సదుపాయం ఉండదు.

రీఫండ్ ఎప్పుడు క్లెయిమ్ చేయవచ్చు?

• రైలు మూడు గంటలకు పైగా ఆలస్యమై, ప్రయాణికుడు ప్రయాణం చేయకూడదని నిర్ణయించుకుంటే, రైల్వే నిబంధనలకు అనుగుణంగా TDR (టికెట్ డిపాజిట్ రిసీట్) దాఖలు చేసి టికెట్ రీఫండ్ కోసం దరఖాస్తు చేసుకోవచ్చు.

• రైలు రద్దు అయినా లేదా నిర్ణీత మార్గం మార్చినా కొన్ని సందర్భాల్లో రీఫండ్‌కు అర్హత ఉంటుంది.

• కోచ్ సమస్యల వల్ల తక్కువ తరగతిలో ప్రయాణించాల్సి వచ్చినా రీఫండ్ క్లెయిమ్ చేసే అవకాశం ఉంటుంది.

• ఏసీ కోచ్‌లో ప్రయాణిస్తుండగా ఏసీ పనిచేయకపోతే కూడా నిబంధనల ప్రకారం దరఖాస్తు చేసుకోవచ్చు.

ప్రీమియం రైళ్లలో ప్రత్యేక సౌకర్యం

రాజధాని, శతాబ్ది, దురంతో వంటి ప్రీమియం రైళ్లు రెండు గంటలకు పైగా ఆలస్యమైతే, ప్రయాణికులకు పరిస్థితులను బట్టి ఉచితంగా టిఫిన్ లేదా భోజనం అందించే నిబంధనలు ఉన్నాయి.

టీడీఆర్ (TDR) అంటే ఏమిటి?

రైలు ఆలస్యం, రద్దు, మార్గం మళ్లింపు లేదా ఇతర ప్రత్యేక కారణాల వల్ల రీఫండ్ పొందేందుకు టీడీఆర్ (Ticket Deposit Receipt) ఫైల్ చేయాలి. ఇది రైల్వే నిర్ణయించిన ప్రత్యేక రీఫండ్ ప్రక్రియ.

ఆన్‌లైన్‌లో TDR ఎలా ఫైల్ చేయాలి?

• ముందుగా ఐఆర్‌సీటీసీ (IRCTC) ఖాతాలో లాగిన్ అవ్వాలి.

• 'ఫైల్ TDR' ఆప్షన్‌ను ఎంచుకోవాలి.

• రీఫండ్ కోరుతున్న టికెట్‌కు సంబంధించిన PNR నంబర్ ఎంపిక చేయాలి.

• టీడీఆర్ దాఖలు చేయడానికి గల కారణాన్ని ఎంపిక చేయాలి.

• అవసరమైన ప్రయాణికుల వివరాలు నమోదు చేయాలి.

• చివరగా వివరాలు పరిశీలించి 'సబ్మిట్' చేస్తే దరఖాస్తు నమోదు అవుతుంది.

దరఖాస్తుకు గడువు ఎంత?

• సాధారణంగా షెడ్యూల్ ప్రకారం.. రైలు బయలుదేరిన సమయం నుంచి 72 గంటలలోపు టీడీఆర్ దాఖలు చేయాలి.

• ఏసీ పనిచేయని సందర్భంలో గమ్యస్థానానికి చేరిన తర్వాత నిర్ణీత గడువులోపు దరఖాస్తు చేసుకోవాలి.

గుర్తుంచుకోవాల్సిన విషయం

ప్రతి ఆలస్యానికి రీఫండ్ లభిస్తుందని భావించకూడదు. రైల్వే నిబంధనల ప్రకారం.. అర్హత ఉన్న సందర్భాల్లో మాత్రమే రీఫండ్ లేదా ఇతర సౌకర్యాలు వర్తిస్తాయి. కాబట్టి టికెట్ బుక్ చేసుకున్న తర్వాత ప్రయాణానికి సంబంధించిన తాజా సమాచారం, నిబంధనలను తప్పనిసరిగా పరిశీలించడం మంచిది.

Also Read:

తులసి ఆకులు నమిలితే కిడ్నీ స్టోన్స్ కరిగిపోతాయా?

ఈ డ్రై ఫ్రూట్స్‌ను మితంగా తినాలి.. ఎక్కువగా తింటే డేంజర్