రెస్టారెంట్‌లో భోజనం చేస్తున్నారా? ఈ 5 సంకేతాలు కనిపిస్తే జాగ్రత్త!

ఇంటర్నెట్ డెస్క్: బయట రెస్టారెంట్‌లో భోజనం చేసేటప్పుడు ఆహారం రుచిగా ఉందా లేదా అనే విషయాన్నే చాలామంది గమనిస్తారు. కానీ ఆ ఆహారం ఎంత పరిశుభ్రంగా తయారైంది? పదార్థాలను సరిగ్గా నిల్వ చేశారా? వంటగదిలో శుభ్రత పాటిస్తున్నారా? అనే విషయాలు కూడా చాలా ముఖ్యం. ఇటీవల నిర్వహించిన కొన్ని ఆహార భద్రత తనిఖీల్లో గడువు ముగిసిన పదార్థాలు, కీటకాలు, అపరిశుభ్రమైన వంట సామగ్రి వంటి సమస్యలు బయటపడ్డాయి. అయితే రెస్టారెంట్‌ వంటగదిలోకి వెళ్లి ప్రతి విషయాన్ని పరిశీలించడం వినియోగదారులకు సాధ్యం కాదు. అయినప్పటికీ భోజనం చేసేటప్పుడు కొన్ని విషయాలను గమనిస్తే ఆహార భద్రత విషయంలో జాగ్రత్త పడవచ్చు. ముఖ్యంగా ఈ ఐదు హెచ్చరిక సంకేతాలను నిర్లక్ష్యం చేయకూడదు.

గడువు ముగిసిన పదార్థాలు

రెస్టారెంట్‌లో ఉపయోగించే ఆహార పదార్థాలు తాజాగా ఉండటం చాలా ముఖ్యం. గడువు ముగిసిన పదార్థాలు లేదా వాటిపై సరైన తేదీ, లేబుల్‌ లేకపోవడం ఆందోళన కలిగించే అంశమే. మీకు వడ్డించిన ఆహారం నుంచి వింత వాసన వస్తే, రుచి మారినట్లు అనిపిస్తే లేదా ఆహారం పాడైపోయినట్లు కనిపిస్తే తినకుండా ఆపేయడం మంచిది.

కీటకాలు కనిపిస్తే జాగ్రత్త

రెస్టారెంట్‌లో బొద్దింకలు, ఈగలు లేదా ఇతర కీటకాలు కనిపించడం సాధారణ విషయం కాదు. ఇవి ఆహారంతో పాటు పాత్రలు, వంట సామగ్రి, టేబుళ్లు, ఇతర ఉపరితలాలను కలుషితం చేసే అవకాశం ఉంది. వంటగది మన కంటికి కనిపించకపోయినా, భోజనం చేసే ప్రదేశంలోనే కీటకాలు కనిపించడం, మురికిగా ఉండే నిల్వ ప్రాంతాలు కనిపించడం వంటి విషయాలను నిర్లక్ష్యం చేయకూడదు.

పచ్చి, వండిన ఆహారాన్ని కలిపి ఉంచుతున్నారా?

పచ్చి ఆహారం, వండిన ఆహారం లేదా వాటిని ఉపయోగించే పాత్రలు, కటింగ్‌ బోర్డులు, వంట పరికరాలను సరిగ్గా వేరు చేయకపోతే ఒకదాని నుంచి మరొకదానికి బ్యాక్టీరియా చేరే ప్రమాదం ఉంటుంది. దీనినే క్రాస్‌ కంటామినేషన్‌ అంటారు.

ఆహారాన్ని సరిగ్గా నిల్వ చేయకపోవడం

ఆహార పదార్థాలను ఎలా నిల్వ చేస్తున్నారు? సరైన ఉష్ణోగ్రతలో ఉంచుతున్నారా? లేదా? అనే విషయాలు కూడా చాలా కీలకం. త్వరగా పాడయ్యే పదార్థాలను సరైన ఉష్ణోగ్రత వద్ద భద్రపరచాలి. ఆహారాన్ని ఎక్కువసేపు బయట ఉంచడం లేదా సరైన పరిస్థితుల్లో నిల్వ చేయకపోవడం వల్ల అది పాడయ్యే లేదా కలుషితమయ్యే ప్రమాదం పెరుగుతుంది.

మురికిగా ఉన్న పాత్రలు, టేబుళ్లు కనిపిస్తే..

వంటగదిని పూర్తిగా పరిశీలించే అవకాశం మనకు లేకపోయినా.. భోజనం చేసే ప్రదేశం మాత్రం మన కంటికి కనిపిస్తుంది. మురికిగా ఉన్న ప్లేట్లు, జిడ్డుగా ఉన్న చెంచాలు, సరిగ్గా శుభ్రం చేయని టేబుళ్లు కనిపిస్తే జాగ్రత్తగా ఉండటం మంచిది.

Also Read:

ప్రెషర్‌ కుక్కర్‌ విజిల్‌ వేస్తూ నీరు కారుతోందా? ఈ సింపుల్‌ చిట్కాలతో సమస్యకు చెక్‌

దానం చేసేటప్పుడు ఈ 5 తప్పులు చేయొద్దు