స్వీట్లు తినడానికి సరైన సమయం ఎప్పుడంటే

ఇంటర్నెట్ డెస్క్: స్వీట్లు తినడం చాలా మందికి ఇష్టం. అయితే, వాటిని ఎంత తింటున్నామన్నదే కాదు, ఏ సమయంలో తింటున్నామన్నది కూడా ఆరోగ్యంపై ప్రభావం చూపుతుందని నిపుణులు చెబుతున్నారు. సరైన సమయంలో తీసుకోకపోతే రక్తంలో చక్కెర స్థాయిలు పెరగడం, బరువు పెరగడం వంటి సమస్యలు వచ్చే అవకాశం ఉంటుంది.

ఖాళీ కడుపుతో తీపి పదార్థాలు

ఉదయం ఖాళీ కడుపుతో స్వీట్లు లేదా ఇతర తీపి పదార్థాలు తింటే వాటిలోని చక్కెర వేగంగా రక్తంలోకి చేరుతుంది. దీంతో రక్తంలో చక్కెర స్థాయిలు ఒక్కసారిగా పెరిగే అవకాశం ఉంటుంది. దాన్ని నియంత్రించేందుకు శరీరం ఎక్కువ ఇన్సులిన్ విడుదల చేస్తుంది. ఆ తర్వాత చక్కెర స్థాయిలు త్వరగా తగ్గిపోవడంతో అలసట, నీరసం, మళ్లీ తీపి తినాలనే కోరిక కలగవచ్చు.

తీపి పదార్థాలు తినడానికి ఉత్తమ సమయం

ఆరోగ్య నిపుణుల అభిప్రాయం ప్రకారం.. మధ్యాహ్న భోజనం తర్వాత పరిమిత మోతాదులో తీపి పదార్థాలు తీసుకోవడం మంచిది. భోజనంలో ఉండే ఫైబర్, ప్రొటీన్, ఆరోగ్యకరమైన కొవ్వులు చక్కెర శోషణను నెమ్మదింపజేయడంలో సహాయపడతాయి. దీంతో రక్తంలో చక్కెర స్థాయిలు ఒక్కసారిగా పెరగకుండా ఉండే అవకాశం ఉంటుంది.

పడుకునే ముందు ఎందుకు తినకూడదు?

రాత్రి నిద్రకు ముందు ఎక్కువగా తీపి పదార్థాలు తింటే శరీరం ఆ కేలరీలను పూర్తిగా వినియోగించుకోలేకపోవచ్చు. దీంతో కొవ్వు పేరుకుపోవడం, బరువు పెరగడం వంటి సమస్యలు వచ్చే అవకాశం ఉంటుంది. అలాగే రక్తంలో చక్కెర నియంత్రణపై కూడా ప్రభావం పడవచ్చు.

తీసుకోవాల్సిన జాగ్రత్తలు

• ఖాళీ కడుపుతో తీపి పదార్థాలు తినకూడదు.

• భోజనానికి బదులుగా కేకులు, శీతల పానీయాలు తీసుకోవడం మంచిది కాదు.

• పండ్లు, పప్పుధాన్యాలు, తృణధాన్యాలు, ఆకుకూరలు వంటి పోషకాహారం తీసుకోవాలి.

• మధుమేహం, ప్రీ-డయాబెటిస్, థైరాయిడ్ లేదా ఊబకాయం ఉన్నవారు తీపి పదార్థాలు తీసుకునే ముందు నిపుణుల సలహా తీసుకోవడం మంచిది.

తీపి పదార్థాలను పూర్తిగా మానేయాల్సిన అవసరం లేదు. అయితే వాటిని పరిమిత మోతాదులో, సరైన సమయంలో తీసుకోవడం ఆరోగ్యానికి మేలు చేస్తుంది. సమతుల్య ఆహారం, క్రమం తప్పకుండా వ్యాయామం, ఆరోగ్యకరమైన జీవనశైలి కూడా అంతే ముఖ్యమైనవి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఉదయం నిద్రలేవగానే నీళ్లు ఎందుకు తాగాలి?

ఐరన్ లోపం.. మైగ్రేన్‌కు కారణమవుతుందా?