14 దేశాలతో సౌదీ అరేబియా భారీ నావికాదళ కూటమి
ABN , Publish Date - Jul 31 , 2026 | 08:11 AM
ప్రపంచంలోనే అత్యంత రద్దీగా ఉండే వ్యాపార సముద్ర మార్గాలలో నౌకల రక్షణే లక్ష్యంగా సౌదీ అరేబియా కీలకమైన రక్షణ కూటమిని ప్రకటించింది. ఈ కూటమిలో13 దేశాలు భాగస్వాములుగా చేరినట్లు సౌదీ రక్షణ మంత్రిత్వ శాఖ వెల్లడించింది.
ఆంధ్రజ్యోతి, జులై 31: ప్రపంచంలోనే అత్యంత రద్దీగా ఉండే వ్యాపార సముద్ర మార్గాలలో నౌకల రక్షణే లక్ష్యంగా సౌదీ అరేబియా ఒక కీలకమైన రక్షణ కూటమిని ప్రకటించింది. బాబ్ అల్-మందేబ్ జలసంధి, ఎర్రసముద్రం, ఆడెన్ సింధుశాఖ వంటి వ్యూహాత్మక జలమార్గాలలో వాణిజ్య నౌకల ప్రయాణాన్ని సురక్షితం చేయడానికి సౌదీ అరేబియాతో పాటు మరో 13 దేశాలు భాగస్వాములుగా చేరినట్లు సౌదీ రక్షణ మంత్రిత్వ శాఖ వెల్లడించింది.
ఇరాన్ మద్దతు ఉన్న హౌతీ తిరుగుబాటుదారులు సౌదీ అరేబియాపై నావికా దిగ్బంధం విధించేందుకు ప్రయత్నించడం, దాడుల వల్ల రవాణాకు తీవ్ర విఘాతం కలగడం వంటి పరిణామాల నేపథ్యంలో ఈ కూటమి ఏర్పాటు ప్రాధాన్యం సంతరించుకుంది. దీనికి తోడు హోర్ముజ్ జలసంధి వద్ద రవాణా నిలిచిపోవడంతో ప్రపంచవ్యాప్తంగా ఇంధన భద్రతపై ఆందోళనలు వ్యక్తమవుతున్నాయి. దీని ప్రభావంతో ముడి చమురు ధరలు బ్యారెల్కు 90 డాలర్ల వైపు దూసుకెళ్తున్నాయి.
కూటమిలోని వ్యవస్థాపక సభ్య దేశాలు
ఈ డిఫెన్స్ అలయన్స్ ఏర్పాటులో సౌదీ అరేబియాతో పాటు భాగస్వాములైన మిగతా 13 దేశాలుగా కువైట్, బహ్రెయిన్, ఖతార్, పాకిస్థాన్, టర్కీ, ఈజిప్ట్, జోర్డాన్, యెమెన్, బంగ్లాదేశ్, నైజీరియా, సూడాన్, జిబౌటీ, సోమాలియా ఉన్నాయి. రియాద్లో నిర్వహించిన ఓ సైనిక సదస్సులో ఈ ఒప్పందానికి తుది రూపం ఇచ్చారు. ఈ సమావేశంలో 43 దేశాల సైనిక అధిపతులు, ప్రతినిధులతో పాటు యూరోపియన్ యూనియన్ (EU) ప్రతినిధులు కూడా ప్రత్యక్షంగా, వీడియో కాన్ఫరెన్స్ ద్వారా కూడా పాల్గొన్నారు.
సౌదీ అరేబియా ఈ కూటమికి వ్యవస్థాపక దేశంగా వ్యవహరించడంతో పాటు, తన సొంత భూభాగంలోనే కేంద్ర కార్యాలయాన్ని ఏర్పాటు చేయనుంది. ఈ కూటమి సమర్థవంతంగా పనిచేసేందుకు ఒక ఉమ్మడి కమాండ్ స్ట్రక్చర్, ఆపరేషనల్ కంట్రోల్ హబ్, జనరల్ సెక్రటేరియట్లను నెలకొల్పుతున్నారు. సభ్య దేశాల అంతర్గత చట్టపరమైన అనుమతులు పూర్తయిన తర్వాత మరిన్ని దేశాలు కూడా ఈ భద్రతా కూటమిలో చేరడానికి సౌదీ అనుమతినిచ్చింది. ఈ కొత్త సైనిక కూటమిని పూర్తి రక్షణాత్మక చొరవగా సౌదీ రక్షణ శాఖ పేర్కొంది. ఈ కూటమి ఏ ఒక్క నిర్దిష్ట దేశాన్ని లేదా సంస్థను లక్ష్యంగా చేసుకుని ఏర్పాటు చేసినది కాదని, ప్రతి సభ్య దేశం సార్వభౌమత్వాన్ని గౌరవిస్తూ, అంతర్జాతీయ చట్టాల నిబంధనలకు లోబడి మాత్రమే మా చర్యలుంటాయని సౌదీ రక్షణ అధికారులు స్పష్టం చేశారు.
ఈ వార్తలు కూడా చదవండి:
పంటల బీమాపై ఆసక్తి చూపని రైతులు
జగన్ పర్యటనలో కార్యకర్తల అత్యుత్సాహం
Read Latest AP News And Telangana News And International News And Telugu News
