ప్రపంచ వైన్ మ్యాప్‌లో ఇజ్రాయెల్ 'నెగెవ్ ఎడారి'.. అంతర్జాతీయ గుర్తింపు!

ఆంధ్రజ్యోతి, /ఇంటర్నెట్ డెస్క్, మే20: సాధారణంగా ద్రాక్ష తోటలు పెరగడానికి, రుచికరమైన వైన్ తయారీకి పచ్చని వాతావరణం, సమృద్ధిగా నీరు ఉండాలని అనుకుంటారు. కానీ, ఇజ్రాయెల్‌లోని ఎండలు మండిపోయే 'నెగెవ్' (Negev) ఎడారి ఈ అంచనాలను తలకిందులు చేసింది. నీటి కొరతను అధిగమిస్తూ, అక్కడి విలక్షణమైన ఎడారి వాతావరణంలో పండించిన ప్రత్యేకమైన ద్రాక్షతో అద్భుతమైన వైన్‌ను తయారు చేసి ప్రపంచాన్ని ఆకర్షిస్తున్నారు అక్కడి రైతులు.

ఇజ్రాయెల్‌‌లో కిరియాత్ గాట్ నుంచి ఐలాట్ వరకు విస్తరించి ఉన్న ఇసుక ఎడారి ప్రాంతానికి 'నెగెవ్ అప్పీలేషన్' (Negev Appellation) గా అంతర్జాతీయ వైన్ ప్రాంత హోదా లభించింది. దీంతో ఫ్రాన్స్‌లోని షాంపేన్, ఇటలీలోని చియాంటి, అమెరికాలోని నాపా వ్యాలీ వంటి ప్రపంచ ప్రసిద్ధ వైన్ ప్రాంతాల సరసన నెగెవ్ ఎడారి కూడా చేరింది.

నాలుగేళ్ల కృషి.. మేధావుల మేధోమథనం

నెగెవ్ వైన్‌కు ఈ అంతర్జాతీయ గుర్తింపు అంత సులభంగా రాలేదు. గత నాలుగేళ్లుగా ఇజ్రాయెల్ వైన్ నిపుణుల బృందం చేసిన నిరంతర కృషి దీని వెనుక ఉంది. నెగెవ్ ప్రాంతంలో తయారయ్యే వైన్‌లకు ఒక విలక్షణమైన రుచి, సువాసన (Fruity Profile) ఉన్నాయని నిరూపించడానికి నిపుణులు కష్టపడ్డారు.

ఒక ప్రాంతాన్ని అధికారిక వైన్ రీజియన్‌గా మార్చాలంటే.. అక్కడ ప్రత్యేకంగా అందించడానికి ఏదో ఒకటి ఉందని నిరూపించాల్సి ఉంటుందని గాయ్ హరాన్ అనే వైన్ టూరిజం నిపుణుడు చెప్పారు. ఈ ప్రక్రియ కోసం వైన్ నిపుణులు చరిత్రకారులు, భూగోళ శాస్త్రవేత్తలు, మానవ శాస్త్రవేత్తలతో (Anthropologists) సంప్రదింపులు జరిపారు. నెగెవ్ ప్రాంతపు నేల స్వభావం, శీతోష్ణస్థితి, అక్కడ ప్రాచీన కాలం నుంచి ఉన్న వైన్ సంస్కృతిని వివరిస్తూ దాదాపు 150 పేజీల నివేదికను రూపొందించారు. చివరకు 'బ్లైండ్ టేస్టింగ్' (కళ్లకు గంతలు కట్టుకుని రుచి చూడటం) ద్వారా కూడా నెగెవ్ వైన్ ప్రత్యేకమైన రుచిని కలిగి ఉందని అధికారికంగా నిరూపించారు.

'లిస్బన్ ఒప్పందం' ద్వారా గ్లోబల్ గుర్తింపు

ఈ నివేదికను ఇజ్రాయెల్ న్యాయ మంత్రిత్వ శాఖకు సమర్పించారు. క్షుణ్ణంగా పరిశీలించిన మీదట ఇజ్రాయెల్ న్యాయ మంత్రిత్వ శాఖ ఈ పత్రాలను ఆమోదించింది. ఇజ్రాయెల్ న్యాయశాఖ ఆమోదించిన వెంటనే ఆ పత్రాలను జెనీవా (స్విట్జర్లాండ్) లోని 'ప్రపంచ మేధో సంపత్తి సంస్థ' (WIPO - World Intellectual Property Organization) కు పంపించారు. ఇజ్రాయెల్ న్యాయ మంత్రిత్వ శాఖ ద్వారా అందిన అధికారిక నివేదికను, అంతర్జాతీయ ఒప్పందాలను పర్యవేక్షించే ప్రపంచ మేధో సంపత్తి సంస్థ (WIPO) తన రికార్డుల్లో నమోదు చేసి ఆమోదించింది. దీంతో ఏప్రిల్ 2026 నాటికి నెగెవ్ ప్రాంతానికి అధికారిక అంతర్జాతీయ గుర్తింపు లభించింది. కాగా, అంతర్జాతీయంగా వ్యవసాయ ఉత్పత్తులు, వైన్‌లు, హస్తకళల బ్రాండ్‌లను రక్షించే అంతర్జాతీయ ఒప్పందమైన 'లిస్బన్ ఒప్పందం' (Lisbon Agreement)లో ఇజ్రాయెల్ ఇప్పటికే భాగస్వామిగా ఉంది.

ఇజ్రాయెల్‌లో ఇటువంటి అంతర్జాతీయ హోదా పొందిన మూడవ వైన్ ప్రాంతం నెగెవ్. అంతకుముందు ఆగస్టు 2020 లో 'జుడియా' (Judea) ప్రాంతానికి ఇజ్రాయెల్ మొదటి వైన్ అప్పీలేషన్ హోదా లభించింది.

WIPO ఆమోదం తర్వాత ఏం జరుగుతుంది?

గ్లోబల్ బ్రాండ్ ప్రొటెక్షన్: WIPO ఆమోదించిన క్షణం నుంచి, 'లిస్బన్ ఒప్పందం' (Lisbon Agreement) పై సంతకం చేసిన అన్ని సభ్య దేశాల్లో (ఫ్రాన్స్, ఇటలీ, స్పెయిన్, పోర్చుగల్ వంటి ప్రముఖ వైన్ దేశాలతో కలిపి దాదాపు 30కి పైగా దేశాలు) 'నెగెవ్' (Negev) అనే పేరుకు చట్టపరమైన రక్షణ లభిస్తుంది.

డూప్లికేట్స్‌‌‌కు అడ్డుకట్ట: ఆ సభ్య దేశాల్లో ఎవరైనా వేరే ప్రాంతంలో ద్రాక్ష పండించి, దానికి 'నెగెవ్ వైన్' అని లేబుల్ వేసి అమ్మితే అది అంతర్జాతీయ చట్టాల ప్రకారం నేరమవుతుంది.

నాపా వ్యాలీ, షాంపేన్ సరసన స్థానం: ఫ్రాన్స్‌లోని 'షాంపేన్' ప్రాంతంలో పండిన ద్రాక్షతో చేసిన దాన్నే 'షాంపేన్' అనాలి, వేరే దేశంలో చేస్తే కేవలం 'స్పార్క్లింగ్ వైన్' అనాలి. ఇప్పుడు నెగెవ్ వైన్‌కు కూడా WIPO ద్వారా అలాంటి అంతర్జాతీయ హోదాయే దక్కింది.

WIPO ఆమోదం వల్ల లిస్బన్ సభ్య దేశాల్లో నెగెవ్ వైన్ బ్రాండ్‌కు 'ఆటోమేటిక్ ప్రొటెక్షన్' లభిస్తుంది. మిగిలిన దేశాల్లో నకిలీలను అడ్డుకోవడానికి ఇజ్రాయెల్ విడివిడిగా చట్టపరమైన పోరాటం లేదా రిజిస్ట్రేషన్లు చేసుకోవాల్సి ఉంటుంది. కానీ వైన్ బిజినెస్‌లో ప్రధాన దేశాలన్నీ లిస్బన్ పరిధిలోనే ఉండటం వల్ల నెగెవ్ బ్రాండ్‌కు 80 శాతం బలమైన రక్షణ దక్కినట్లే!

శరవేగంగా పెరుగుతున్న వైన్ పరిశ్రమ

ఒకప్పుడు కేవలం 12 మంది వైన్ తయారీదారులతో ప్రారంభమైన నెగెవ్ ప్రాంతంలో, నేడు ఆ సంఖ్య 60 కి చేరింది. ప్రస్తుతం ఇక్కడ ఏడాదికి 10 లక్షల కంటే ఎక్కువ వైన్ బాటిళ్లు ఉత్పత్తి అవుతున్నాయి. అమెరికాలోని డెన్వర్‌కు చెందిన డేవిడ్, లారా మెరేజ్ స్థాపించిన 'మెరేజ్ ఫౌండేషన్ ఇజ్రాయెల్' ఈ ప్రాజెక్ట్‌ను ముందుండి నడిపించింది.

టూరిజం, ఆర్థిక వ్యవస్థకు ఊతం

మూడేళ్లుగా యుద్ధ వాతావరణాన్ని ఎదుర్కొంటున్న ఇజ్రాయెల్‌కు ఈ గుర్తింపు జాతీయంగా ఎంతో ప్రాముఖ్యతను, సంతృప్తిని ఇచ్చిందని ఆ దేశ వాసులు ఆనందం వ్యక్తం చేస్తున్నారు. ఈ అంతర్జాతీయ గుర్తింపు నెగెవ్ ప్రాంతంలో వైన్ టూరిజంను (Wine Tourism) భారీగా పెంచుతుందని, తద్వారా స్థానిక ఆర్థిక వ్యవస్థ బలోపేతం అవుతుందని 'మెరేజ్ ఫౌండేషన్ ఇజ్రాయెల్' ఎగ్జిక్యూటివ్ డైరెక్టర్ నికోల్ హాడ్ స్ట్రో ఆశాభావం వ్యక్తం చేశారు.

రాజకీయ వివాదాలు, బహిష్కరణలు ఎలా ఉన్నప్పటికీ.. నెగెవ్ ఎడారిలోని ద్రాక్ష తోటల అందాలు, అక్కడి వైన్ నాణ్యత ప్రపంచవ్యాప్త వైన్ ప్రియులను ఎంతగానో ఆకట్టుకుంటున్నాయి. ఇటలీలోని వైన్ ప్రాంతాల తరహాలోనే నెగెవ్ ఎడారి కూడా వైన్ టూరిజం ద్వారా భవిష్యత్తులో గొప్ప ఆర్థిక ప్రగతిని సాధిస్తుందని నిపుణులు నమ్ముతున్నారు.

ఈ వార్తలనూ చదవండి:

ప్రధాని మోదీపై జాత్యహంకార కార్టూన్.. నార్వే పత్రికపై జనాగ్రహం

ఇరాన్‌ యుద్ధంతో ఆగ్రహం.. ట్రంప్‌నకు హ్యాండిచ్చిన సొంత పార్టీ సెనేటర్లు