గ్యాస్, ఉబ్బరానికి ఆహారం మాత్రమే కాదు.. ఈ అలవాట్లు కూడా కారణమే!

ఇంటర్నెట్ డెస్క్: గ్యాస్, ఉబ్బరం వంటి సమస్యలు ఈ రోజుల్లో చాలా మందిని ఇబ్బంది పెడుతున్నాయి. సాధారణంగా వీటికి తినే ఆహారమే కారణమని భావిస్తారు. అయితే ఆహారంతో పాటు మన రోజువారీ జీవనశైలిలోని కొన్ని అలవాట్లు కూడా ఈ సమస్యలకు కారణమవుతాయని నిపుణులు చెబుతున్నారు.

జీర్ణవ్యవస్థ సక్రమంగా పనిచేయకపోతే గ్యాస్, అజీర్ణం, కడుపు ఉబ్బరం వంటి సమస్యలు తలెత్తుతాయి. చాలా మంది వీటిని చిన్న సమస్యలుగా భావించి నిర్లక్ష్యం చేస్తారు. కానీ తరచూ ఈ ఇబ్బందులు ఎదురైతే వాటి వెనుక ఉన్న కారణాలను గుర్తించడం అవసరం.

గ్యాస్ సమస్యకు కారణమయ్యే అలవాట్లు

• సమయానికి భోజనం చేయకపోవడం

• రెండు పూటల మధ్య ఎక్కువ విరామం ఉండటం

• చాలా వేగంగా ఆహారం తినడం

• ఫాస్ట్ ఫుడ్ ఎక్కువగా తీసుకోవడం

• అధిక మసాలాలు, నూనె పదార్థాలు తినడం

• పిండి పదార్థాలు అధికంగా తీసుకోవడం

ఇవన్నీ జీర్ణక్రియను ప్రభావితం చేసి గ్యాస్, కడుపు ఉబ్బరం సమస్యలకు దారితీయవచ్చు.

అలాగే పేగుల్లో ఉండే మంచి బ్యాక్టీరియా, చెడు బ్యాక్టీరియా మధ్య సమతుల్యత దెబ్బతినే పరిస్థితిని 'ఇంటెస్టినల్ డైస్బయోసిస్' అంటారు. ఈ సమస్య వల్ల కూడా జీర్ణక్రియ బలహీనపడి కడుపు సంబంధిత ఇబ్బందులు పెరగవచ్చు.

గ్యాస్ సమస్యతో పాటు ఈ లక్షణాలు కనిపిస్తే వెంటనే వైద్యులని సంప్రదించడం మంచిది..

• తరచూ లేదా నిరంతర కడుపు నొప్పి

• తీవ్రమైన కడుపు ఉబ్బరం

• ఆకస్మికంగా బరువు తగ్గడం

• వాంతులు

ఈ లక్షణాలను నిర్లక్ష్యం చేయకుండా పరీక్షలు చేయించుకుంటే అసలు కారణాన్ని గుర్తించి సరైన చికిత్స పొందవచ్చు.

గ్యాస్, ఉబ్బరాన్ని ఎలా నివారించాలి?

• భోజనం సమయానికి చేయాలి

• ఆహారాన్ని నెమ్మదిగా, బాగా నమిలి తినాలి

• రోజూ తగినంత నీరు తాగాలి

• పండ్లు, కూరగాయలు, పీచుపదార్థాలు అధికంగా ఉండే ఆహారం తీసుకోవాలి

• క్రమం తప్పకుండా వ్యాయామం చేయాలి

• జంక్ ఫుడ్, అధిక మసాలా ఆహారాన్ని తగ్గించాలి

ఆరోగ్యకరమైన జీవనశైలి, సమతుల్య ఆహారం పాటించడం ద్వారా జీర్ణవ్యవస్థను ఆరోగ్యంగా ఉంచి గ్యాస్, కడుపు ఉబ్బరం వంటి సమస్యలను చాలా వరకు నివారించవచ్చని నిపుణులు చెబుతున్నారు.

Note: ఇందులోని సమాచారం సాధారణ అవగాహన కోసం మాత్రమే.. ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

విండ్ చైమ్.. ఈ ప్రదేశాల్లో అస్సలు పెట్టకండి

ఫిట్‌నెస్ కోసం భోజనం మానేస్తున్నారా? జాగ్రత్త..