డెంగ్యూతో ప్లేట్‌లెట్స్‌ తగ్గుతున్నాయా..? ఈ ఆహారాలు తీసుకోండి..

ఇంటర్నెట్ డెస్క్: సాధారణంగా వర్షాకాలం, వాతావరణ మార్పుల సమయంలో డెంగ్యూ కేసులు పెరుగుతుంటాయి. డెంగ్యూ జ్వరం వచ్చినప్పుడు రక్తంలో ప్లేట్‌లెట్స్‌ తగ్గడం చాలామందిలో ఆందోళన కలిగిస్తుంది. ప్లేట్‌లెట్స్‌ మరింత తగ్గకుండా ఉండాలంటే ఏం తినాలి? ఏ ఆహారాలు శరీరానికి పోషకాలను అందిస్తాయి? ఎలాంటి లక్షణాలు కనిపిస్తే వెంటనే ఆసుపత్రికి వెళ్లాలి? వంటి విషయాలను ఈ కథనంలో తెలుసుకుందాం.

ప్లేట్‌లెట్స్‌ ఎందుకు తగ్గుతాయి?

డెంగ్యూ అనేది దోమల ద్వారా వ్యాపించే వైరల్‌ ఇన్ఫెక్షన్‌. ఈ వ్యాధి కారణంగా కొంతమందిలో రక్తంలోని ప్లేట్‌లెట్స్‌ సంఖ్య తగ్గుతుంది. రక్తం గడ్డకట్టడంలో ప్లేట్‌లెట్స్‌ కీలక పాత్ర పోషిస్తాయి. వాటి సంఖ్య తగ్గినప్పుడు రక్తస్రావం వంటి సమస్యలు వచ్చే ప్రమాదం ఉంటుంది. అయితే, ప్లేట్‌లెట్స్‌ తగ్గిన ప్రతిసారీ ప్రమాదకర పరిస్థితి ఏర్పడుతుందని భావించకూడదు. రక్త పరీక్షల ఫలితాలతో పాటు రోగి ఆరోగ్య పరిస్థితి, రక్తస్రావ లక్షణాలు, ఇతర పరీక్షల ఫలితాలను పరిశీలించి వైద్యులు చికిత్సను నిర్ణయిస్తారు.

డెంగ్యూలో ప్లేట్‌లెట్స్‌ను పెంచే పండ్లు..

డెంగ్యూ రోగులకు కివీ పండు తినమని వైద్యులు సలహా ఇస్తుంటారు. ఇందులో విటమిన్‌ సి ఉంటుంది. ఇది శరీరం ఇన్ఫెక్షన్‌తో పోరాడటానికి సహాయపడుతుంది. కివీలో ఫైబర్‌ అధికంగా ఉండటం వల్ల జీర్ణక్రియకు కూడా ఉపయోగకరంగా ఉంటుంది. ప్రతిరోజూ ఒక దానిమ్మ పండు తినడం లేదా దాని రసాన్ని తాగడం ద్వారా శరీరానికి అవసరమైన పోషకాలు అందుతాయి. అలాగే, హిమోగ్లోబిన్‌ స్థాయిలను నిర్వహించడంలో దానిమ్మ ఉపయోగకరంగా ఉంటుంది. పచ్చి లేదా పండిన బొప్పాయి కూడా ప్లేట్‌లెట్స్‌ను పెంచుతుందని ప్రచారం ఉంది. ఇవే కాకుండా ఆపిల్‌, నారింజ, జామ వంటి పండ్లను డెంగ్యూ సమయంలో తినడం వల్ల శరీరానికి అవసరమైన పోషకాలు అందుతాయి.

నీళ్లు తాగడం ఎందుకు ముఖ్యం?

డెంగ్యూ సమయంలో జ్వరం, వాంతుల వల్ల శరీరంలో ద్రవాల కొరత ఏర్పడవచ్చు. అందుకే వైద్యుల సూచన మేరకు తగినంత నీరు, ఓఆర్‌ఎస్‌ లేదా కొబ్బరి నీరు వంటి ఇతర ద్రవాలను తీసుకోవాలి. విశ్రాంతి తీసుకోవడం, తగిన పోషకాహారం తీసుకోవడం, వైద్యుల సూచన మేరకు రక్త పరీక్షలు చేయించుకోవడం చాలా ముఖ్యం.

ప్లేట్‌లెట్స్‌ పెంచడానికి బొప్పాయి ఆకుల రసం తాగవచ్చా?

బొప్పాయి ఆకుల రసం, గిలోయ్‌ రసం వంటి గృహచిట్కాలు ప్లేట్‌లెట్స్‌ను వేగంగా పెంచుతాయని ప్రచారం జరుగుతుంది. అయితే, వీటిని డెంగ్యూ చికిత్సకు ప్రత్యామ్నాయంగా ఉపయోగించడానికి తగిన శాస్త్రీయ ఆధారాలు లేవు. కొన్ని మూలికలు దుష్ప్రభావాలకు కారణమయ్యే అవకాశం కూడా ఉంది. కాబట్టి, వైద్యులను సంప్రదించకుండా ఇలాంటి రసాలను తీసుకోకూడదు.

ఈ లక్షణాలు కనిపిస్తే వెంటనే ఆసుపత్రికి వెళ్లండి

డెంగ్యూ వచ్చినప్పుడు కింది లక్షణాలు కనిపిస్తే ఆలస్యం చేయకుండా వైద్యులను సంప్రదించాలి.

• తీవ్రమైన కడుపునొప్పి.

• పదేపదే వాంతులు కావడం.

• ముక్కు లేదా చిగుళ్ల నుంచి రక్తస్రావం.

• వాంతుల్లో లేదా మలంలో రక్తం కనిపించడం.

• శ్వాస తీసుకోవడంలో ఇబ్బంది.

• తీవ్రమైన నీరసం, మగత లేదా అసాధారణమైన అలసట.

• మూత్రం తగ్గిపోవడం.

ప్లేట్‌లెట్స్‌ ఎప్పుడు పెరుగుతాయి?

డెంగ్యూ రోగుల్లో వ్యాధి నుంచి కోలుకునే దశలో ప్లేట్‌లెట్స్‌ సంఖ్య క్రమంగా పెరుగుతుంది. ఇందుకు నిర్దిష్టమైన ఆహారం లేదా ఇంటి చిట్కా తక్షణ పరిష్కారం కాదు. ప్లేట్‌లెట్స్‌ సంఖ్య ఆధారంగా మాత్రమే వైద్యులు చికిత్సను నిర్ణయించరు. రోగి మొత్తం ఆరోగ్య పరిస్థితినీ పరిగణనలోకి తీసుకుంటారు. ప్లేట్‌లెట్స్‌ ఎక్కించాలా, వద్దా అనే నిర్ణయం వైద్యులదే. కాబట్టి, డెంగ్యూ సమయంలో పోషకాహారం, తగినంత ద్రవాలు, విశ్రాంతి సహాయకరమైనప్పటికీ, వైద్యుల పర్యవేక్షణ అత్యంత ముఖ్యం.

ఈ వార్తలు కూడా చదవండి

బాబోయ్.. ఉసిరి రసం తాగితే ఇన్ని లాభాలా..!

కుక్క కరిచిన వెంటనే ఇలా చేయండి.. లేకుంటే ప్రమాదమే!