తక్కువ తిన్నా అసిడిటీ వస్తోందా? అసలు కారణాలు ఇవే..

ఇంటర్నెట్ డెస్క్: ఈ రోజుల్లో అసిడిటీ, గ్యాస్, గుండెల్లో మంట వంటి సమస్యలు చాలా సాధారణంగా మారాయి. ఇవి కేవలం కారం ఎక్కువ తినడం వల్ల మాత్రమే కాకుండా, కొన్ని సందర్భాల్లో కడుపులో ఆమ్లం (ఆసిడ్) తక్కువగా ఉత్పత్తి కావడం వల్ల కూడా వస్తాయి. కడుపులో ఉత్పత్తి అయ్యే హైడ్రోక్లోరిక్ ఆమ్లం (Hydrochloric acid) ఆహారాన్ని జీర్ణం చేయడంలో, పోషకాలను శరీరం గ్రహించడంలో ముఖ్య పాత్ర పోషిస్తుంది.

వయస్సు పెరగడం, ఎక్కువకాలం యాంటాసిడ్ మందులు వాడడం, ఒత్తిడి, పోషక లోపాలు, ముఖ్యంగా జింక్, విటమిన్ B12 లోపం కడుపులో ఆమ్లం ఉత్పత్తిని తగ్గిస్తాయి. ఈ పరిస్థితిలో ఆహారం సరిగా జీర్ణం కాక కడుపులో ఎక్కువసేపు ఉంటుంది. దీనివల్ల గ్యాస్, కడుపులో ఉబ్బరం, ఛాతీలో మంట, పుల్లని త్రేనుపు, గొంతులో మంట వంటి సమస్యలు వస్తాయి.

అంతేకాకుండా సరైన సమయానికి తినకపోవడం, టీ, కాఫీ, కార్బొనేటెడ్ పానీయాలు ఎక్కువగా తాగడం, వేయించిన, ప్రాసెస్ చేసిన ఆహారాలు తీసుకోవడం, ఎక్కువసేపు ఆకలితో ఉండటం, ఒక్కసారిగా ఎక్కువగా తినడం కూడా అసిడిటీకి కారణమవుతాయి. ధూమపానం, మద్యం సేవించడం, కొన్ని మందుల దుష్ప్రభావాలు, హార్మోన్ల మార్పులు కూడా ఈ సమస్యను పెంచుతాయి.

అసిడిటీని నివారించే చిట్కాలు..

• రోజూ సమయానికి, సమతుల్య ఆహారం తీసుకోవాలి.

• ఒక్కసారిగా ఎక్కువ తినకుండా, కొద్దికొద్దిగా పలుమార్లు తినాలి.

• వేయించిన, చాలా కారంగా ఉండే ఆహారాలను తగ్గించాలి.

• తిన్న వెంటనే పడుకోకుండా కనీసం 30 నిమిషాలు నడవాలి.

• రోజుకు తగినంత నీరు తాగాలి.

• ఒత్తిడిని తగ్గించడానికి యోగా, ధ్యానం చేయాలి.

• టీ, కాఫీ, గ్యాస్ పానీయాల వినియోగాన్ని తగ్గించాలి.

ఈ చిన్న జాగ్రత్తలు పాటించడం ద్వారా అసిడిటీ సమస్యను నియంత్రించవచ్చు. జీర్ణవ్యవస్థను ఆరోగ్యంగా ఉంచుకోవచ్చు.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ఇది కేవలం ప్రజల సాధారణ ఆరోగ్య ప్రయోజనాలను దృష్టిలో ఉంచుకుని ఇవ్వడం జరిగింది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఉదయం నిద్రలేవగానే ఈ లక్షణాలు కనిపిస్తున్నాయా? జాగ్రత్త.!

అధిక బరువు సమస్యకు ఈ ఆహారంతో చెక్ పెట్టండి!

For More Latest News