లక్షల్లో జీతం.. తక్కువ పోటీ.. ఈ ప్రభుత్వ ఉద్యోగాలు మిస్ కావొద్దు

ఇంటర్నెట్ డెస్క్: ప్రభుత్వ ఉద్యోగం సాధించాలని లక్ష్యంగా పెట్టుకున్న అభ్యర్థులు లక్షల సంఖ్యలో పోటీ పడుతున్నారు. అయితే అందరూ బ్యాంకులు, ఎస్‌ఎస్‌సీ, యూపీఎస్సీ వంటి ప్రముఖ పరీక్షలపైనే దృష్టి పెట్టడంతో, కొన్ని అత్యుత్తమ కేంద్ర ప్రభుత్వ ఉద్యోగాలు పెద్దగా గుర్తింపు పొందడం లేదు. వీటికి పోటీ తక్కువగా ఉండటంతో పాటు మంచి జీతం, వేగవంతమైన ప్రమోషన్లు, మెరుగైన వర్క్-లైఫ్ బ్యాలెన్స్ వంటి ప్రయోజనాలు కూడా ఉంటాయి. సరైన ప్రణాళికతో సిద్ధమైతే ఈ ఉద్యోగాలను సొంతం చేసుకునే అవకాశం ఉంటుంది.

RBI గ్రేడ్-బి ఆఫీసర్

భారతీయ రిజర్వ్ బ్యాంకులో అధికార స్థాయి ఉద్యోగాలకు నిర్వహించే అత్యంత ప్రతిష్ఠాత్మక పరీక్ష ఇది. గుర్తింపు పొందిన విశ్వవిద్యాలయం నుంచి డిగ్రీలో కనీసం 60 శాతం మార్కులు సాధించిన అభ్యర్థులు దరఖాస్తు చేసుకోవచ్చు. ఎంపిక ప్రక్రియ మూడు దశల్లో జరుగుతుంది. ఉద్యోగంలో చేరిన తర్వాత అలవెన్సులతో కలిపి నెలకు సుమారు రూ.1 లక్షకు పైగా వేతనం లభించే అవకాశం ఉంటుంది.

నాబార్డ్ గ్రేడ్-A, గ్రేడ్-B ఆఫీసర్

గ్రామీణాభివృద్ధి, వ్యవసాయ రంగాలకు సంబంధించిన ప్రముఖ సంస్థ నాబార్డ్‌లో ఈ పోస్టులు భర్తీ చేస్తారు. గ్రామీణాభివృద్ధిపై అవగాహన అవసరం కావడంతో ఈ పరీక్షకు పోటీ తక్కువగా ఉంటుంది. ఎంపికైన వారికి ఆకర్షణీయమైన వేతనంతో పాటు మంచి ఉద్యోగ భద్రత లభిస్తుంది.

సెబీ గ్రేడ్-A ఆఫీసర్

సెబీలో గ్రేడ్-A ఉద్యోగాలు అత్యంత ప్రతిష్ఠాత్మకమైనవిగా భావిస్తారు. ఫైనాన్స్, కామర్స్, ఎకనామిక్స్, మేనేజ్‌మెంట్ వంటి విభాగాల అభ్యర్థులకు ఇవి మంచి అవకాశాలు. అలవెన్సులతో కలిపి నెలకు లక్ష రూపాయలకు పైగా వేతనం లభిస్తుంది.

IRDAI అసిస్టెంట్ మేనేజర్

భారత బీమా నియంత్రణ, అభివృద్ధి సంస్థ (IRDAI)లో అసిస్టెంట్ మేనేజర్ ఉద్యోగాలకు మంచి డిమాండ్ ఉంది. ఇన్సూరెన్స్ రంగంపై ఆసక్తి ఉన్న అభ్యర్థులకు ఇది మంచి కెరీర్ ఎంపికగా చెప్పవచ్చు. మంచి వేతనం, కెరీర్ పురోగతి ఈ ఉద్యోగం ప్రత్యేకత.

PFRDA అసిస్టెంట్ మేనేజర్

పెన్షన్ ఫండ్ రెగ్యులేటరీ అండ్ డెవలప్‌మెంట్ అథారిటీలో అసిస్టెంట్ మేనేజర్ పోస్టులు కూడా అధిక వేతనం అందించే కేంద్ర ప్రభుత్వ ఉద్యోగాల్లో ఒకటి. ఈ ఉద్యోగంపై అవగాహన తక్కువగా ఉండటంతో పోటీ కూడా పరిమితంగానే ఉంటుంది.

ప్రభుత్వ ఉద్యోగం అంటే కేవలం బ్యాంకులు లేదా సివిల్ సర్వీసులే కాదు. సరైన సమాచారం, ప్రణాళిక, లక్ష్యంతో సిద్ధమైతే తక్కువ పోటీ ఉన్న అనేక కేంద్ర ప్రభుత్వ ఉద్యోగాల్లో కూడా మంచి వేతనం, ఉద్యోగ భద్రత, కెరీర్ ఎదుగుదల సాధించవచ్చు.

Also Read:

లంచ్‌ బాక్సులో ఆరోగ్యాన్ని సర్దుదాం..

దోమలు కొందరినే ఎక్కువగా ఎందుకు కుడతాయో తెలుసా?