ట్రంప్ మెమ్‌ కాయిన్ విలువ భారీ పతనం.. నష్టాల్లో ఇన్వెస్టర్లు.. లాభాల్లో ట్రంప్!

వాషింగ్టన్, జులై 5: అమెరికా అధ్యక్షుడు డొనాల్డ్ ట్రంప్ పేరుతో మార్కెట్లోకి వచ్చిన '$TRUMP' మెమ్‌కాయిన్ ఇప్పుడు వివాదాస్పదంగా మారింది. ట్రంప్‌ను నమ్మి ఈ కాయిన్‌లో పెట్టుబడులు పెట్టిన సుమారు పది లక్షల మంది ఇన్వెస్టర్లు కోట్లాది డాలర్లను నష్టపోయారు. అయితే, దీనికి భిన్నంగా ట్రంప్ మాత్రం ఈ ప్రాజెక్టు ద్వారా భారీగా లాభపడ్డారు.

బ్లాక్‌చెయిన్ అనలిటిక్స్ సంస్థ 'నాన్సెన్' (Nansen) విడుదల చేసిన తాజా నివేదిక ప్రకారం, జూన్ చివరి నాటికి దాదాపు 9,88,905 క్రిప్టో వాలెట్లు నష్టాల్లో ఉన్నాయి. అంటే, ఈ కాయిన్ కొనుగోలు చేసిన వారిలో ప్రతి ముగ్గురిలో ఇద్దరు నష్టపోయినట్లే.

97శాతం పతనం: జనవరి 2025లో లాంచ్ అయినప్పుడు ఈ టోకెన్ ధర గరిష్టంగా 75.35 డాలర్లు ఉండేది. కానీ, ఇప్పుడు అది 1.76 డాలర్లకు పడిపోయింది.

3.8 బిలియన్ డాలర్ల నష్టం: ఇన్వెస్టర్లు అందరూ కలిపి సుమారు 3.81 బిలియన్ డాలర్ల మేర నష్టపోయారు.

నష్టపోయిన ఇన్వెస్టర్ల ఆవేదన

ట్రంప్ ఓటర్లు, మద్దతుదారులు కూడా ఈ మెమ్‌కాయిన్ దెబ్బకు విలవిల్లాడారు. నికోలస్ పింటో అనే ఇన్వెస్టర్ మాట్లాడుతూ, 'నేను 5,00,000 డాలర్లు పెట్టుబడి పెట్టాను, అందులో సగం కోల్పోయాను. ఒక దేశాధ్యక్షుడిపై ప్రజలకున్న నమ్మకాన్ని ఆసరాగా చేసుకుని ఇలాంటి టోకెన్లను ప్రమోట్ చేయడం ఒక 'లీగల్ స్కామ్' లాంటిది' అని మండిపడ్డారు.

ట్రంప్‌నకు ఎలా లాభం వచ్చింది?

ఈ మెమ్‌కాయిన్ నిర్మాణం ఎలా ఉందంటే, ప్రతిసారీ ఎవరైనా టోకెన్‌ను కొన్నా లేదా అమ్మినా, ఆ లావాదేవీల ఫీజులో కొంత భాగం ట్రంప్‌కు, ఆయన అనుబంధ సంస్థలకు వెళ్తుంది. దీనివల్ల కాయిన్ ధర పడిపోయినా, ట్రంప్ తన వార్షిక ఆర్థిక వెల్లడిలో పేర్కొన్న ప్రకారం సుమారు 636 మిలియన్ డాలర్లను ఈ మెమ్‌కాయిన్ ద్వారానే గడించారు. ఇక, 2025లో ఆయన చేపట్టిన అన్ని వ్యాపార వెంచర్ల ద్వారా మొత్తం 2.2 బిలియన్ డాలర్ల ఆదాయాన్ని ఆర్జించారు.

వైట్ హౌస్ వివరణ

ఈ ఆరోపణలను వైట్ హౌస్ తోసిపుచ్చింది. ట్రంప్ తన మద్దతుదారులను మోసం చేశారనడంలో నిజం లేదని వైట్ హౌస్ ప్రతినిధి అన్నా కెల్లీ స్పష్టం చేశారు. అమెరికాను 'ప్రపంచానికి క్రిప్టో రాజధాని'గా మార్చడమే లక్ష్యమని, ట్రంప్ ప్రభుత్వం తీసుకునే ప్రతి నిర్ణయం అమెరికన్ల ప్రయోజనాల కోసమేనని ఆమె సమర్థించుకున్నారు.

ఇతర ప్రాజెక్టుల పరిస్థితి కూడా అంతే!

ట్రంప్, ఆయన కుమారులు కలిసి 'వరల్డ్ లిబర్టీ ఫైనాన్షియల్' (World Liberty Financial) అనే క్రిప్టో సంస్థను కూడా స్థాపించి '$WLFI' అనే మరో టోకెన్‌ను విడుదల చేశారు. దీని ద్వారా కూడా ఆయన 799 మిలియన్ డాలర్లు సంపాదించారు. ఇందులో యునైటెడ్ అరబ్ ఎమిరేట్స్ (UAE) నుంచి వచ్చిన భారీ పెట్టుబడులు కూడా ఉన్నాయి. అయితే, ఈ టోకెన్ విలువ కూడా ప్రారంభం నుంచి భారీగా పడిపోయింది. గతంలో క్రిప్టోకరెన్సీలను తీవ్రంగా విమర్శించిన ట్రంప్, తన 2024 అధ్యక్ష ఎన్నికల ప్రచారం సమయంలో పూర్తిస్థాయిలో ఈ రంగానికి మద్దతుగా మారడం గమనార్హం.

ఈ వార్తలు కూడా చదవండి...

అల్లూరి ఆశయాలే దేశానికి మార్గదర్శకం: పవన్ కల్యాణ్

డ్వాక్రా మహిళలను ఆర్థికంగా బలోపేతం చేసేలా తృప్తి క్యాంటీన్‌లను ప్రోత్సహిస్తున్నాం: మంత్రి నారాయణ

Read Latest AP News And Telangana News And National News

And Telugu News