మున్సిపల్ ఎన్నికల్లో కూటమి ఘన విజయం.. టీడీపీ ఏపీ అధ్యక్షుడు పల్లా హర్షం

అమరావతి: స్థానిక సంస్థల ఎన్నికల్లో ఎన్డీయే కూటమి ఘన విజయం సాధించడంపై టీడీపీ ఏపీ అధ్యక్షుడు పల్లా శ్రీనివాసరావు హర్షం వ్యక్తం చేశారు. కూటమి అమలు చేస్తున్న సంక్షేమం, అభివృద్ధి, సుపరిపాలనను చూసి ప్రజలు పట్టం కట్టారని పేర్కొన్నారు. 92 మున్సిపాలిటీల్లో దాదాపు 95 శాతం సీట్లలో కూటమి ఘన విజయం సాధించిందని తెలిపారు. కార్యకర్తల కష్టానికి, కూటమి నాయకత్వంపై ప్రజలకున్న అచంచల విశ్వాసానికి ఈ ఫలితాలే నిదర్శనమని పల్లా సంతోషం వ్యక్తం చేశారు.

వైఎస్ జగన్ మోహన్ రెడ్డి చేసిన విధ్వంస పాలనను రాష్ట్ర ప్రజలు ఇంకా మర్చిపోలేదని, 2024 ఎన్నికల్లో బుద్ధి చెప్పినా జగన్ వైఖరిలో మార్పు రాలేదని అన్నారు. దీంతో మున్సిపల్ ఎన్నికల్లోనూ ప్రజలు ఆయనకు చరమగీతం పాడారని ఎద్దేవా చేశారు. ఎన్నికలను అడ్డుకునేందుకు వైసీపీ వేసిన 62 కేసులు, చేసిన ఫేక్ ప్రచారాలను ప్రజలు తిప్పికొట్టారని చెప్పారు. ఈ ఎన్నికలతో ఈవీఎంలైనా, బ్యాలెట్ పేపర్లయినా ప్రజల తీర్పు మాత్రం కూటమి వైపే ఉంటుందని తేలిపోయిందన్నారు. పులివెందుల, పుంగనూరు మినహా రాష్ట్రవ్యాప్తంగా ఎన్నికలు ప్రశాంత వాతావరణంలో ముగిశాయని తెలిపారు. సూపర్ సిక్స్ హామీల అమలు, మహిళలకు ఉచిత బస్సు ప్రయాణం, దీపం 2.0 పథకాలే కూటమి విజయానికి బాటలు వేశాయని పేర్కొన్నారు.

అమరావతి, పోలవరం పునర్నిర్మాణం, రాష్ట్రానికి 25 శాతం పెట్టుబడుల రాక కూటమిపై నమ్మకాన్ని పెంచాయని అన్నారు. కూటమి పార్టీల ఐక్యతతోనే ఈ భారీ విజయం సాధ్యమైందని పల్లా ప్రశంసించారు. ప్రజలు తమపై పెంచిన బాధ్యతతో 2029 నాటికి రాష్ట్రాన్ని మరింత ఉన్నతంగా తీర్చిదిద్దుతామని టీడీపీ ఏపీ అధ్యక్షుడు పల్లా శ్రీనివాసరావు అన్నారు.

ఈ వార్తలు కూడా చదవండి

మురసు ఎఫెక్ట్.. చీరాల మున్సిపల్ ఎన్నికల కౌంటింగ్ వాయిదా..

మున్సిపల్ ఎన్నికల్లో కూటమి ఘన విజయం.. మంత్రి లోకేశ్ ఆసక్తికర పోస్టు