కారు ప్రమాద ఘటనపై సమగ్ర దర్యాప్తు

పోలీసులకు మహిళా కమిషన్‌ చైర్‌పర్సన్‌ ఆదేశం

అమరావతి/మంగళగిరి/విజయవాడ, అక్టోబరు 23 (ఆంధ్రజ్యోతి): జోగి మేఘనతోపాటు ఆమె కుటుంబ సభ్యుల భద్రతకు ప్రాధాన్యం ఇవ్వాలని ఏపీ మహిళా కమిషన్‌ చైర్‌పర్సన్‌ డాక్టర్‌ రాయపాటి శైలజ పోలీసులను ఆదేశించారు. మాజీ మంత్రి జోగి రమేశ్‌ కుటుంబ సభ్యులు 11 మందిపై మేఘన కేసు పెట్టిన విషయం తెలిసిందే. ఈ నేపథ్యంలోనే ఈ నెల 15న ఆమె విజయవాడలో న్యాయవాది వద్దకు వచ్చారు. తిరిగి వెళ్తున్న సమయంలో ఇబ్రహీంపట్నం రింగ్‌ వద్ద ఓ ప్రైవేటు ట్రావెల్స్‌ బస్సు వారి వాహనాన్ని ఢీ కొట్టింది. 16వ తేదీన ఆమె తండ్రి కృష్ణ ఈ ప్రమాదం వెనుక జోగి రమేశ్‌ ప్రమేయంపై అనుమానాలు వ్యక్తంచేస్తూ పోలీసులకు ఫిర్యాదు చేశారు.

దీనిపై ఇబ్రహీంపట్నం పోలీసులు కేసు నమోదు చేశారు. కాగా, ఈ ప్రమాద ఘటనపై అనుమానాలున్నాయని మేఘన శుక్రవారం మహిళా కమిషన్‌ను ఆశ్రయించారు. దీనిపై స్పందించిన చైర్‌పర్సన్‌ శైలజ ఇబ్రహీంపట్నం పోలీసులతో మాట్లాడారు. వాస్తవాలు వెలుగులోకి వచ్చేలా సమగ్ర దర్యాప్తు చేపట్టాలని ఆదేశించారు.

ఈ వార్తలనూ చదవండి:

పల్లె పండుగకు నిధుల గండం

ఇంటర్‌ పరీక్షల షెడ్యూల్‌ విడుదల