Supreme Court: జూన్ 2న సుదీర్ఘ వాదనలు వింటాం
ABN , Publish Date - May 20 , 2025 | 04:38 AM
తెలంగాణలో మెడికల్ సీట్ల కేటాయింపులో స్థానికత అంశంపై జూన్ 2న సుదీర్ఘ వాదనలు వింటామని సుప్రీం కోర్టు స్పష్టం చేసింది. వైద్య విద్య ప్రవేశాల్లో స్థానికతకు సంబంధించి తెలంగాణ ప్రభుత్వం జీవో 33ను తీసుకొచ్చింది.
తెలంగాణ మెడికల్ సీట్లలో స్థానికత అంశంపై సుప్రీం
న్యూఢిల్లీ, మే 19 (ఆంధ్రజ్యోతి): తెలంగాణలో మెడికల్ సీట్ల కేటాయింపులో స్థానికత అంశంపై జూన్ 2న సుదీర్ఘ వాదనలు వింటామని సుప్రీం కోర్టు స్పష్టం చేసింది. వైద్య విద్య ప్రవేశాల్లో స్థానికతకు సంబంధించి తెలంగాణ ప్రభుత్వం జీవో 33ను తీసుకొచ్చింది. నీట్కు ముందు నాలుగేళ్లు స్థానికంగా చదవాలని జీవో 33లోని నిబంధన 3(ఏ) స్పష్టం చేస్తోంది. దీనిని సవాల్ చేస్తూ హైదరాబాద్కు చెందిన కల్లూరి అభిరామ్ సహా 160 మంది హైకోర్టులో పిటిషన్లు వేశారు. సుదీర్ఘ వాదనల తర్వాత గత సెప్టెంబరు 5న హైకోర్టు సీజేఐ నేతృత్వంలోని ధర్మాసనం తీర్పు చెప్పింది. ఒక విద్యార్థి తెలంగాణలో నివసిస్తున్నాడని లేదా శాశ్వత నివాసి అని నిర్ధారించడానికి ప్రభుత్వం మార్గదర్శకాలేవీ రూపొందించలేదని కోర్టు అభిప్రాయపడింది. తొలుత మార్గదర్శకాలు, నిబంధనలను రూపొందించాలని స్పష్టం చేసింది.
హైకోర్టు తీర్పును సెప్టెంబరు 11న రాష్ట్ర ప్రభుత్వం సుప్రీం కోర్టులో సవాల్ చేసింది. అయితే, ఒకసారి మినహాయింపు కింద హైకోర్టును ఆశ్రయించిన విద్యార్థులు కౌన్సెలింగ్కు హాజరయ్యేందుకు రాష్ట్ర ప్రభుత్వం సుప్రీంకోర్టులో అంగీకారం తెలిపింది. దీంతో హైకోర్టు తీర్పుపై సుప్రీంకోర్టు స్టే విధించింది. అయితే, ఆ తర్వాత మరికొంతమంది విద్యార్థులు తమకు కూడా స్థానికతను వర్తింపజేయాలని సుప్రీం కోర్టును ఆశ్రయించారు. అన్ని పిటిషన్లపై సోమవారం సీజేఐ బీఆర్ గవాయ్, జస్టిస్ ఏజీ మసీహ్ నేతృత్వంలోని ధర్మాసనం విచారణ జరిపింది. పిటిషనర్ల తరఫున సీనియర్ న్యాయవాది బసంత్ వాదనలు వినిపించారు. హైకోర్టు తీర్పుపై తదుపరి విచారణ వరకు మాత్రమే స్టే ఉంటుందని సెప్టెంబరు 20న సుప్రీం కోర్టు తెలిపిందని, దాన్ని మరోసారి పొడిగించవద్దని విజ్ఞప్తి చేశారు. తెలంగాణ ప్రభుత్వం తరఫున గోపాల్ శంకర్ నారాయణన్ వాదిస్తూ ఇతర రాష్ట్రాలకు వెళ్లి, మళ్లీ అవకాశాల కోసమే తిరిగి రాష్ట్రానికి వస్తున్నారని తెలిపారు. ఈ అంశంపై జూన్ 2న సుదీర్ఘ వాదనలు వింటామని చెబుతూ ధర్మాసనం విచారణను వాయిదా వేసింది.
ఈ వార్తలు కూడా చదవండి
HYD Fire Accident: ఓల్డ్సిటీ ఫైర్ యాక్సిడెంట్కి కారణం.. స్థానిక అక్రమ కరెంట్ కనెక్షన్లు.!
Gulzar House Fire Incident: గుల్జార్ హౌస్ ప్రమాదంపై ఎఫ్ఐఆర్ నమోదు
Hydra Demolitions: హైడ్రా కూల్చివేతలు షూరూ.. టెన్షన్ టెన్షన్
Read Latest Telangana News And Telugu News
