ముగిసిన మద్యం షాపుల టెండర్లు

పెద్దపల్లి, అక్టోబరు 18 (ఆంధ్రజ్యోతి): మద్యం షాపుల టెండర్లకు వ్యాపారుల నుంచి స్పందన కరువైంది. 2023లో వచ్చిన దరఖాస్తులతో పోలిస్తే దరఖాస్తులు తగ్గడం గమనార్హం. ఇందుకు రెండు లక్షల రూపాయలు ఉన్న దరఖాస్తు ఫారాన్ని మూడు లక్షలకు పెంచడం వల్లనే వ్యాపారులు ఆసక్తి చూపలేదని తెలుస్తుంది. 2025-27 సంవత్సరానికి గాను రాష్ట్ర ప్రభుత్వం జిల్లాలో గల 74 మద్యం షాపులకు దరఖాస్తులను ఆహ్వానిస్తూ సెప్టెంబరు 26న గెజిట్‌ విడుదల చేసింది. ఈ ఏడాది డిసెంబరు ఒకటి నుంచి 2027 నవంబరు 30వ తేదీ వరకు లైసెన్సులు జారీ చేయనున్నారు. దరఖాస్తు చేసుకొనేందుకు 23 రోజుల గడువు ఇచ్చినప్పటికి ఇందుకు వ్యాపారులు పెద్దగా ముందుకు రాలేదు. చివరి రెండు రోజుల్లోనే దరఖాస్తుల సంఖ్య పెరిగింది. ఈ నెల 17న ఒక్క రోజే 374 దర ఖాస్తులు వచ్చాయి. చివరి రోజైన శనివారం రాత్రి 8 గంటల వరకు 1,189 దరఖాస్తులు వచ్చాయి. 2023లో 77 మద్యం షాపులకు గాను 2022 దరఖాస్తులు వచ్చాయి. వాటి రూపేనా ప్రభుత్వంకు 40 కోట్ల 44 లక్షల రూపాయల ఆదాయం వచ్చింది. ఈ సారి కూడా మద్యం వ్యాపారుల నుంచి భారీ స్పందన లభిస్తుందని భావించిన ప్రభుత్వం దరఖాస్తుల ధరను రెండు లక్షల నుంచి మూడు లక్షలకు పెంచడం వలన వ్యాపారులు ఎక్కువ మొత్తంలో దరఖాస్తులు చేసుకునేందుకు ఆసక్తి చూపలేదని తెలుస్తోంది.