IPL 2025 MI vs GT: క్వాలిఫయర్-2కు ముంబై.. పోరాడి ఓడిన గుజరాత్ టైటాన్స్..

కీలకమైన ఎలిమినేటర్ మ్యాచ్‌లో ముంబై విజయం సాధించింది. ముల్లాన్‌పూర్‌లో పరుగుల వరద పారిన మ్యాచ్‌లో ముంబైది పైచేయిగా నిలిచింది. టోర్నీ ఆసాంతం అద్భుతంగా రాణించిన గుజరాత్ టైటాన్స్ పోరాడి ఓటమిపాలైంది. భారీ స్కోరింగ్ గేమ్‌లో 20 పరుగుల తేడాతో ఓడిపోయింది. ముల్లాన్‌పూర్ స్టేడియంలో ముంబై ఇండియన్స్, గుజరాత్ టైటాన్స్ జట్లు తలపడ్డాయి. (GT vs MI). ఈ మ్యాచ్‌లో గెలిచిన ముంబై ఇండియన్స్ ఆదివారం పంజాబ్ కింగ్స్‌తో జరగబోయే క్వాలిఫయర్‌కు అర్హత సాధించింది. గుజరాత్ టోర్నీ నుంచి నిష్క్రమించింది.

టాస్ గెలిచిన ముంబై ఇండియన్స్ కెప్టెన్ హార్దిక్ పాండ్యా బ్యాటింగ్ ఎంచుకున్నాడు. కెప్టెన్ నమ్మకాన్ని నిలబెడుతూ ముంబై ఓపెనర్లు చెలరేగారు. గుజరాత్ ఫీల్డర్లు క్యాచ్‌లు వదిలేయడం కూడా ముంబైకు కలిసొచ్చింది. రోహిత్ శర్మ (81), జానీ బెయిర్‌స్టో (47) తొలి వికెట్‌కు 81 పరుగులు జోడించారు. బెయిర్ స్టో అవుటైన తర్వాత వచ్చిన సూర్యకుమార్ (33) చూడచక్కని షాట్లతో అలరించాడు. ఆ తర్వాత తిలక్ వర్మ (25) కూడా మూడు సిక్స్‌లు కొట్టాడు. చివర్లో హార్దిక్ పాండ్యా (22) కూడా వేగంగా పరుగులు చేశారు. చివరకు ముంబై జట్టు నిర్ణీత 20 ఓవర్లలో 5 వికెట్లు కోల్పోయి 228 పరుగులు చేసింది. గుజరాత్ బౌలర్లలో సాయి కిశోర్, ప్రసిద్ధ్ కృష్ణ రెండేసి వికెట్లు తీశారు.

229 పరుగుల భారీ విజయ లక్ష్యంతో బరిలోకి దిగిన గుజరాత్‌కు ఆరంభంలోనే ఎదురుదెబ్బ తగిలింది. తొలి ఓవర్లోనే గిల్ (1)ను బౌల్ట్ పెవిలియన్‌కు పంపాడు. అయితే మరో ఓపెనర్ సాయి సుదర్శన్ (80) తన అద్భుత ఫామ్‌ను కొనసాగించాడు. ఒత్తిడిలో కూడా చూడచక్కని షాట్లతో అలరించాడు. వాషింగ్టన్ సుందర్ (48)తో కలిసి గుజరాత్‌ను గెలిపించే ప్రయత్నం చేశాడు. అయితే వీరిద్దరూ స్వల్ప వ్యవధిలో అవుట్ కావడంతో గుజరాత్ వెనకడుగు వేసింది. చివర్లో రూథర్‌ఫర్డ్ (24), రాహుల్ తెవాటియా (16) పోరాడినా ఫలితం లేకపోయింది. చివరకు గుజరాత్ నిర్ణీత 20 ఓవర్లలో 6 వికెట్లు కోల్పోయి 208 పరుగులు మాత్రమే చేయగలిగింది. 20 పరుగుల తేడాతో ఓడిపోయింది.

ఇవి కూడా చదవండి..

చేతులెత్తేసిన పంజాబ్ బ్యాటర్లు.. ఆర్సీబీ ముందు స్వల్ప టార్గెట్

టెస్ట్ క్రికెట్‌కు రిటైర్మెంట్ గురించి ప్రశ్నించిన భజ్జీ కూతురు.. కోహ్లీ రిప్లై ఏంటంటే..

మరిన్ని క్రీడా, తెలుగు వార్తల కోసం క్లిక్ చేయండి