Duleep Trophy 2025: దులీప్ ట్రోఫీ 2025 టైటిల్ దక్కించుకున్న సెంట్రల్ జోన్

భారత క్రికెట్‌లో ప్రతిష్ఠాత్మకమైన దులీప్ ట్రోఫీ ఈ సారి సెంట్రల్ జోన్‌కి (Central Zone wins Duleep Trophy 2025) మళ్లీ వచ్చింది. 11 సంవత్సరాల తరువాత సెంట్రల్ జోన్ తన ప్రదర్శనతో ఈ గొప్ప టైటిల్‌ను తిరిగి ఏడోసారి దక్కించుకుంది.

బీసీసీఐ సెంటర్ ఆఫ్ ఎక్సలెన్స్ మైదానంలో సోమవారం జరిగిన ఫైనల్ మ్యాచ్‌లో సౌత్ జోన్‌ను ఆరు వికెట్ల తేడాతో ఓడించి, సెంట్రల్ జోన్ విజయం సాధించింది. 65 పరుగుల స్వల్ప లక్ష్యాన్ని ఛేదించే క్రమంలో సెంట్రల్ జోన్ ఆటగాళ్లు ఉత్కంఠ భరిత క్షణాలను ఎదుర్కొన్నప్పటికీ, అక్షయ్ వాడ్కర్, యశ్ రాథోడ్‌ల స్థిరమైన ఆటతీరు జట్టును విజయతీరాలకు చేర్చింది.

ఉత్కంఠ భరిత ఛేజింగ్

ఐదో రోజు సౌత్ జోన్ బౌలర్లు సెంట్రల్ జోన్ బ్యాటర్లను కట్టడి చేయడానికి తీవ్రంగా ప్రయత్నించారు. కానీ, కేవలం 65 పరుగుల లక్ష్యం కావడంతో సౌత్ జోన్‌కు పెద్దగా అవకాశం లేకపోయింది. దీంతో సెంట్రల్ జోన్ 20.3 ఓవర్లలో 66/4 స్కోరు లక్ష్యాన్ని ఈజీగా సాధించింది. అక్షయ్ వాడ్కర్ (19 నాటౌట్, 52 బంతులు), ఫస్ట్ ఇన్నింగ్స్ సెంచరీ హీరో యశ్ రాథోడ్ (13 నాటౌట్, 16 బంతులు) కీలకమైన భాగస్వామ్యంతో జట్టును గెలిపించారు.

సౌత్ జోన్ బౌలర్ల పోరాటం

సౌత్ జోన్ బౌలర్లు చివరి వరకు పోరాడారు. లెఫ్ట్ ఆర్మ్ స్పిన్నర్ అంకిత్ శర్మ ఓపెనర్ డానిష్ మలేవార్ (5)ను అద్భుతమైన స్పిన్ డెలివరీతో ఔట్ చేశాడు. అంకిత్ తర్వాత సెంట్రల్ కెప్టెన్ రజత్ పటీదార్‌ను కూడా ఔట్ చేశాడు. పటీదార్ హడావిడిగా ఆడిన స్లాగ్ స్వీప్ షాట్‌ను మిడ్-ఆన్‌లో ఎండీ నిధీష్ పట్టుకున్నాడు. అంకిత్ సరన్ష్ జైన్ వికెట్లను పడగొట్టి సెంట్రల్ జోన్‌లో కొంత ఒత్తిడిని సృష్టించాడు. గుర్జప్నీత్ సింగ్ కూడా ఈ సిరీస్ లో నలుగురిని ఔట్ చేసి వావ్ అనిపించాడు.

రజత్ పటీదార్ ఆనందం

సెంట్రల్ జోన్ కెప్టెన్ రజత్ పటీదార్‌కు ఈ ఏడాది ఇది రెండో టైటిల్. ఇంతకు ముందు రాయల్ ఛాలెంజర్స్ బెంగళూరు జట్టును నడిపించిన అతడు, ఈ విజయంతో ఆనందం వ్యక్తం చేశాడు. కెప్టెన్‌కు ట్రోఫీలు గెలవడం ఆనందాన్నిస్తుందని, మా ఆటగాళ్లు టోర్నమెంట్ అంతా అద్భుతమైన పట్టుదల చూపించారని సంతోషం వ్యక్తం చేశాడు. పిచ్ కాస్త డ్రైగా ఉండటంతో మేం మొదట బ్యాటింగ్ ఎంచుకున్నామని.. డానిష్, యశ్ ఈ టోర్నమెంట్‌లో అద్భుతంగా ఆడారని పటీదార్ పేర్కొన్నాడు.

ఇవి కూడా చదవండి

మరో స్కామ్‌ అలర్ట్.. మీ డబ్బు, ఫోన్‌ను ఇలా కాపాడుకోండి

సెప్టెంబర్ 2025లో బ్యాంక్ సెలవుల పూర్తి లిస్ట్..

మరిన్ని జాతీయ, తెలుగు వార్తల కోసం క్లిక్ చేయండి