Lord Vishnu : ఈ విష్ణుమూర్తి విగ్రహం, స్టాట్యూ ఆఫ్ లిబర్టీ కంటే ఎత్తైనది. అయితే, భారతదేశంలో లేదు

Garuda Visnu Statue: అమెరికాలోని స్టాట్యూ ఆఫ్ లిబర్టీ కంటే ఎత్తైన హిందూ దేవుడు విష్ణుమూర్తి విగ్రహం ఉందని మీకు తెలుసా.. అదీ భారత దేశంలో కాదు. ఇది ఇండోనేషియా దేశంలో ఉంది. ఈ అతిపెద్ద గరుడ వాహన విష్ణు విగ్రహం బాలిలోని ఉంగసాన్‌లో గరుడ విష్ణు కెంచన సాంస్కృతిక పార్కులో ఉంది. ఈ విగ్రహం హిందూ దేవుడైన విష్ణువు తన వాహనమైన గరుడును అధిరోహించిన రూపంలో ఉంటుంది. గరుడ.. శక్తి, వేగం, భక్తిని సూచిస్తాడు. విష్ణువు విశ్వ సంరక్షకుడిగా పరిగణించబడతారు. ఈ విగ్రహం హిందూ పురాణాలలోని గరుడు.. తన తల్లిని బానిసత్వం నుండి విముక్తి చేయడానికి అమృతాన్ని సంపాదించిన కథను ఆధారంగా చేసుకొని రూపొందించబడింది.

ఇండోనేషియా జాతీయ చిహ్నమైన గరుడ పంచసీలకు కూడా ఈ విగ్రహం ఒక సాంస్కృతిక ప్రతీకగా నిలుస్తుంది. ప్రఖ్యాత బాలినీస్ శిల్పి న్యోమన్ నువార్తా రూపొందించిన ఈ విగ్రహం 1990లో ప్రారంభమై, ఆర్థిక సంక్షోభాలు, ఇతర సవాళ్ల కారణంగా 28 సంవత్సరాల తర్వాత 2018లో పూర్తయింది.

రాగి, ఇత్తడి, ఉక్కుతో నిర్మితమైన ఈ 4000 టన్నుల బరువున్న విగ్రహం 754 భాగాలుగా బందుంగ్‌లో తయారు చేయబడి, బాలిలో ప్రతిష్టించబడింది. విష్ణువు శిరస్సుపై బంగారు మొజాయిక్‌లతో అలంకరించిన కిరీటం ఈ విగ్రహానికి ప్రత్యేక ఆకర్షణ.

GWK సాంస్కృతిక పార్కు కేవలం విగ్రహంతోనే కాకుండా, సాంప్రదాయ బాలినీస్ నృత్యాలు, కళా ప్రదర్శనలు, సంగీత కచేరీలతో పర్యాటకులను ఆకర్షిస్తుంది. లోటస్ పాండ్, జెండెలా బాలి రెస్టారెంట్, ఆర్ట్ గ్యాలరీలు ఈ పార్కులోని ఇతర ఆకర్షణలు. ఈ పార్కు బాలి సంస్కృతి, హిందూ ఆధ్యాత్మికత, ఇండోనేషియా జాతీయ గుర్తింపును ప్రతిబింబిస్తూ, ప్రపంచవ్యాప్తంగా పర్యాటకులకు ఒక అద్భుతమైన గమ్యస్థానంగా నిలుస్తుంది.