Digital Arrest Scam: సైబర్ మోసానికి గురైతే మీ డబ్బును ఎలా తిరిగి పొందాలి

సైబర్ స్కామర్లు ఇప్పుడు ప్రజలను మోసం చేయడానికి "డిజిటల్ అరెస్ట్" అనే కొత్త పద్ధతిని ఉపయోగిస్తున్నారు. ఈ స్కామ్‌లో ఉన్న సైబర్ నేరస్థులు అధికారుల వలె నటించి వీడియో కాల్స్ లేదా వాయిస్ కాల్స్ చేస్తారు. బాధితులకు పెద్ద మొత్తంలో డబ్బు చెల్లించకపోతే తీవ్రమైన కేసుల్లో ఇరికిస్తామంటూ బెదిరిస్తారు. బాధితుడిపై ఆరోపణలు ఉన్నాయని, కేసు నుండి బయటపడాలంటే డబ్బు చెల్లించమని స్కామర్లు డిమాండ్ చేస్తారు. దీంతో వారికి భయపడి, చాలా మంది బాధితులు స్కామర్ల ఖాతాలకు డబ్బు జమ చేస్తారు. అయితే, ఇలా స్కామర్ల ద్వారా పొగొట్టుకున్న డబ్బును ఎలా తిరిగి పొందాలో ఇప్పుడు తెలుసుకుందాం..

వెంటనే సైబర్ పోలీసులకు ఫిర్యాదు చేయండి

మీరు ఈ రకమైన స్కామ్ బారిన పడితే, మీ డబ్బును తిరిగి పొందడానికి త్వరగా చర్య తీసుకోవడం మంచిది. ముందుగా, బాధితులుగా మారకండి. వెంటనే స్కామ్ గురించి సమీపంలోని పోలీస్ స్టేషన్‌కు కంప్లేంట్ ఇవ్వండి. మీరు ఇప్పటికే మోసపోయి ఉంటే,1930 నంబర్‌లో నేషనల్ సైబర్ క్రైమ్ హెల్ప్‌లైన్‌ను సంప్రదించి ఫిర్యాదు చేయండి. మీరు ఈ విషయాన్ని వీలైనంత త్వరగా సైబర్ పోలీసులకు ఫిర్యాదు చేయండి. పోలీసులు మోసగాడి బ్యాంక్ అకౌంట్ ను హోల్డ్‌లో పెట్టవచ్చు. తద్వారా మీరు మీ డబ్బును తిరిగి పొందే అవకాశం ఉంటుంది.

అప్రమత్తంగా ఉండటం ముఖ్యం: ప్రభుత్వ అధికారి లేదా పోలీసు అధికారిని అంటూ మీకు వీడియో కాల్ వస్తే, వారిని నమ్మవద్దు. కాల్ చేసిన వ్యక్తిని వారి ఐడీ చూపించమని అడగండి. ఏ అధికారి కూడా మిమ్మల్ని ఆన్‌లైన్‌లో అరెస్టు చేయలేరని గుర్తుంచుకోండి. స్కామర్లు మిమ్మల్ని ఇమెయిల్‌లు, కాల్‌లు లేదా WhatsApp సందేశాల ద్వారా కూడా సంప్రదించవచ్చు. అటువంటి మోసాల బారిన పడకుండా ఉండటానికి వింత నంబర్‌లకు ప్రతిస్పందించడం లేదా వీడియో కాల్‌ మాట్లాడటం మానుకోండి. జాగ్రత్తగా ఉండండి.

Also Read: వావ్.. భర్త అంటే ఇలానే ఉండాలి.. హాస్పిటల్ వార్డులో భార్యకు..