Health News: అకస్మాత్తుగా ఛాతిలో నొప్పి వస్తుందా? కారణాలివే కావొచ్చు..!

Sudden Chest Pain: ఒక్కోసారి అకస్మాత్తుగా ఛాతిలో నొప్పి వస్తుంటుంది. ప్రతి ఒక్కరూ తమ జీవితంలో ఏదో ఒక సందర్భంలో ఇలాంటి పరిస్థితి ఎదుర్కొనే ఉంటారు. తమకు గుండెపోటు వచ్చిందేమో అని కంగారుపడిపోతుంటారు. అయితే, అన్ని రకాల ఛాతి నొప్పి గుండెపోటు కాదని ఆరోగ్య నిపుణులు చెబుతున్నారు. ఛాతిలో నొప్పి ఉన్నప్పటికీ.. అది గుండెపోటు కాకపోవచ్చంటున్నారు. ఛాతిలో నొప్పికి ఇతర కారణాలు కూడా ఉన్నాయని చెబుతున్నారు నిపుణులు.

తాజాగా ఇదే అంశంపై ప్రముఖ కార్డియాలజిస్ట్ డాక్టర్ అజయ్ భార్గవ కీలక వివరాలు తెలిపారు. తీవ్రమైన ఛాతి నొప్పి గుండెపోటు కావొచ్చు, కాకపోవచ్చు అని పేర్కొన్నారు. అయితే, ఆకస్మిక ఛాతి నొప్పిని ఏమాత్రం అలక్ష్యం చేయొద్దని సూచిస్తున్నారు. అన్ని రకాల ఛాతి నొప్పులను సీరియస్‌గా పరిగణించాలని, ఈ నొప్పికి అనేక కారణాలు ఉంటాయని, ఇది అనేక తీవ్రమైన వ్యాధులకు సంకేతం కూడా అయి ఉంటుందని చెబుతున్నారు. మరి ఛాతిలో నొప్పికి గల కారణాలేంటో ఇప్పుడు మనం తెలుసుకుందాం..

ఆకస్మిక ఛాతీ నొప్పికి కారణాలు..

1. బృహద్ధమని విభజన : గుండె ప్రధాన రక్తనాళం లైనింగ్ చీలిపోయినప్పుడు ఛాతీ, వీపు భాగంలో పదునైన, కత్తిపోటు లాంటి నొప్పి వస్తుంది. ఇదే జరిగితే.. తక్షణ చికిత్స అవసరం. ఇది గుండెపోటు, గుండె ఆగిపోయే ప్రమాదానికి దారితీస్తుంది.

2. కరోనరీ ఆర్టరీ వ్యాధి: రక్త నాళాలు ఇరుకుగా మారతాయి. ఒత్తిడి, బిగుతు అనుభూతి కలుగుతుంది. కొంచెం విశ్రాంతి తీసుకుంటే సమస్య తగ్గుతుంది.

3. గుండె వాపు: మయోకార్డిటిస్, పెరికార్డిటిస్ సమస్యలు గుండె నొప్పిని కలిగిస్తాయి. ఇది గుండెపోటు ప్రమాదాన్ని కూడా పెంచుతుంది. గుండె స్పందన రేటులోనూ చాలా వ్యత్యాసం ఉంటుంది. దీని కారణంగా ఛాతిలో నొప్పి, అసౌకర్యవంతంగా ఉంటుంది.

4. ఊపిరితిత్తులలో రక్తం గడ్డకట్టడం: ఊపిరితిత్తులలో రక్తం గడ్డకట్టడం వల్ల కూడా అకస్మాత్తుగా ఛాతీ నొప్పి వస్తుంది. ఇది ప్రమాదకరమైన పరిస్థితి. ఊపిరితిత్తుల ఆకస్మిక సంకోచం కూడా పదునైన నొప్పిని కలిగిస్తుంది. బ్రోన్కైటిస్, న్యుమోనియా, ప్లూరిసి సమస్య వచ్చినప్పుడు కూడా ఛాతిలో తీవ్రమైన నొప్పి వస్తుంటుంది.

5. వెన్నెముక, పక్కటెముక గాయం: వెన్నెముక, పక్కటెముకకు తీవ్రమైన గాయం అయినప్పుడు కూడా ఛాతిలో నొప్పి వస్తుంది.

6. గ్యాస్, అసిడిటీ, GERD : దాదాపు 30 శాతం కేసులలో ఆకస్మిక, తీవ్రమైన ఛాతీ నొప్పికి ఇవే ప్రధాన కారణాలుగా ఉంటాయి. అధిక గ్యాస్, అసిడిటీ, GERD కారణంగా చాలా మంది ఛాతి నొప్పి సమస్యతో సతమతం అవుతుంటారు. తిన్న తరువాత గానీ.. పడుకున్న తరువాత గానీ ఈ నొప్పి తీవ్రమవుతుంది.

7. ఆందోళన, ఒత్తిడి: తీవ్రమైన ఆందోళన, భయం కూడా ఆకస్మిక ఛాతి నొప్పికి కారణం అవుతుంది. ఈ నొప్పిని చాలా మంది గుండె నొప్పిగా భావించి భయపడిపోతుంటారు.

గుండెపోటు నొప్పి ఎలా ఉంటుంది?

గుండెపోటు నొప్పి.. సాధారణ నొప్పి కంటే భిన్నంగా ఉంటుంది. బరువుగా, ఛాతి మొత్తం పట్టేసినట్లుగా అనిపిస్తుంది. గుండెపోటు సమయంలో చేతులు, దవడ, భుజాలు, వీపు ప్రాంతాల్లో నొప్పి వస్తుంది. దీంతోపాటుగా శ్వాస తీసుకోవడంలో ఇబ్బంది, చలి, చెమటలు, తల తిరగడం వంటి సమస్యలు కూడా వచ్చే అవకాశం ఉంది. అయితే, ఎలాంటి ఛాతి నొప్పి అయినప్పటికీ.. విస్మరించకుండా వైద్యులను సంప్రదించడం ఉత్తమం. తద్వారా ప్రాణాపాయం నుంచి బయటపడొచ్చు అని ఆరోగ్య నిపుణులు చెబుతున్నారు.

Also Read:

పాక్‌పై భారత్ విజయం

మీరు ప్రశాంతంగా రిటైర్ కాలేరు.. సీఈసీపై ప్రియాంక ఘాటు వ్యాఖ్యలు