Cashew Nuts: డయాబెటిస్ ఉన్నవారు జీడిపప్పు తినడం మంచిదేనా..

డయాబెటిస్ జీవనశైలి వ్యాధిగా మారింది. మారుతున్న ఆహారపు అలవాట్లు అనేక జీవనశైలి వ్యాధులకు ప్రధాన కారణం. జంక్ ఫుడ్, ఫాస్ట్ ఫుడ్ ని క్రమం తప్పకుండా తీసుకోవడం వల్ల ఆరోగ్యంపై ప్రతికూల ప్రభావం చూపుతుంది. ప్రపంచ ఆరోగ్య సంస్థ నివేదిక ప్రకారం, భారతదేశంలో దాదాపు 77 మిలియన్ల పెద్దలు టైప్ 2 డయాబెటిస్‌తో బాధపడుతున్నారు. 25 మిలియన్లకు పైగా ప్రజలు ప్రీ డయాబెటిస్ ప్రమాదంలో ఉన్నారు. టైప్ 2 డయాబెటిస్‌లో, శరీరం తగినంత ఇన్సులిన్‌ను ఉత్పత్తి చేయదు లేదా దానిని సమర్థవంతంగా ఉపయోగించుకోదు. రక్తంలో చక్కెర నియంత్రణను సవాలుగా మారుస్తుంది.

జీడిపప్పు తినవచ్చా?

మధుమేహాంతో బాధపడేవారు పోషకమైన ఆహారాన్ని తినడం ద్వారా తమ రక్తంలో చక్కెర స్థాయిలను బాగా నియంత్రించుకోవచ్చు. సమస్యల ప్రమాదాన్ని తగ్గించుకోవచ్చు. డయాబెటిస్ ఉన్నవారికి జీడిపప్పు ఒక అద్భుతమైన ఆహారం. జీడిపప్పులో ఆరోగ్యకరమైన కొవ్వులు, ఫైబర్, ప్రోటీన్లు పుష్కలంగా ఉంటాయి. జీడిపప్పు రక్తంలో చక్కెర స్థాయిలను తగ్గిస్తుందని ఇటీవల కొన్ని అధ్యయనాలు పేర్కొన్నాయి. ఇందులో కార్బోహైడ్రేట్లు కూడా చాలా తక్కువగా ఉంటాయి. కాబట్టి, మధుమేహాంతో బాధపడేవారు హ్యాపీగా జీడిపప్పును తినవచ్చు. జీడిపప్పులు ఎక్కువసేపు కడుపును నిండుగా ఉంచుతుంది. సమతుల్య ఆహారంలో జీడిపప్పును జోడించడం వల్ల బరువును నియంత్రించవచ్చు లేదా అధిక రక్తంలో గ్లూకోజ్ స్థాయిలను తగ్గించవచ్చు.

జీడిపప్పు ఆరోగ్య ప్రయోజనాలు

జీడిపప్పులో డైటరీ ఫైబర్ పుష్కలంగా ఉంటుంది. ఇది రక్తంలో చక్కెర స్థాయిలను నియంత్రించడంలో సహాయపడుతుంది. మెరుగైన గ్లైసెమిక్ నియంత్రణకు దారితీస్తుంది. మధుమేహాన్ని మరింత సమర్థవంతంగా నిర్వహించడానికి సహాయపడుతుంది. ఇందులో మోనోఅన్‌శాచురేటెడ్, పాలీఅన్‌శాచురేటెడ్ కొవ్వులు కూడా ఉంటాయి. ఇది గుండె ఆరోగ్యానికి చాలా మంచిది. ఇందులో అధిక మొత్తంలో మెగ్నీషియం కూడా ఉంటుంది. ఇది ఇన్సులిన్‌కు సహాయపడుతుంది. ఇది అనవసరమైన ఆకలిని తొలగించడంలో సహాయపడుతుంది.

(NOTE: ఇంటర్నెట్‌లో సేకరించిన సమాచారం ఆధారంగా ఈ వివరాలు మీకు అందించటం జరిగింది. ఇందులోని అంశాలు కేవలం అవగాహన కోసం మాత్రమే. తదుపరి జరిగే ఎలాంటి పరిణామాలకు ABN ఆంధ్రజ్యోతి బాధ్యత వహించదు.)

Also Read: ఆర్థరైటిస్ తగ్గాలంటే ఈ ఆహారాలు తినండి