Stock Market: రూపాయి రికార్డు పతనం.. సూచీలకు తప్పని నష్టాలు..

డాలర్‌తో పోల్చుకుంటే రూపాయి మారకం విలువ (రూ.89.76) రికార్డు కనిష్టానికి పడిపోవడం మదుపర్లను కలవరపెట్టింది. దీంతో సూచీలకు నష్టాలు తప్పలేదు. ఉదయం భారీగా లాభపడిన సూచీలు మధ్యాహ్నం తర్వాత నేల చూపులు చూశాయి. ఆర్బీఐ వడ్డీ రేట్ల కోత ఇప్పట్లో ఉండదనే అంచనాలు, అంతర్జాతీయంగా ప్రతికూల సంకేతాలు, విదేశీ మదుపర్ల అమ్మకాలు, క్రూడ్ ఆయిల్ ధరలు పెరగడం సూచీలను వెనక్కి లాగాయి. దీంతో ఈ రోజు సెన్సెక్స్, నిఫ్టీ నష్టాలతో రోజును ముగించాయి. (Indian stock market).

గత సెషన్ ముగింపు (85, 706)తో పోల్చుకుంటే సోమవారం ఉదయం దాదాపు 300 పాయింట్ల లాభంతో మొదలైన సెన్సెక్స్ మధ్యాహ్నం వరకు లాభాల్లోనే కదలాడింది. అయితే మధ్యాహ్నం తర్వాత ఆ లాభాలు ఆవిరయ్యాయి. చివర్లో అమ్మకాలు పెరగడంతో సెన్సెక్స్ కిందకు దిగి వచ్చింది. చివరకు సెన్సెక్స్ 64 పాయింట్ల నష్టంతో 85, 641 వద్ద రోజును ముగించింది. మరో వైపు నిఫ్టీ కూడా సెన్సెక్స్ బాటలోనే కదలాడింది. చివరకు 27 పాయింట్ల నష్టంతో 26, 751 వద్ద స్థిరపడింది (stock market news today).

సెన్సెక్స్‌లో ఐఈఎక్స్, కేఫిన్ టెక్నాలజీస్, పేటీఎమ్, సయింట్, టీవీఎస్ మోటార్స్ మొదలైన షేర్లు లాభాలు ఆర్జించాయి (share market news). మ్యాక్స్ హెల్త్‌కేర్, కేన్స్ టెక్నాలజీస్, పేజ్ ఇండస్ట్రీస్, ఎస్ బ్యాంక్, డెలివరీ మొదలైన షేర్లు నష్టాలను మూటగట్టుకున్నాయి. నిఫ్టీ మిడ్ క్యాప్ ఇండెక్స్ గత సెషన్ ముగింపు దగ్గరే రోజును ముగించింది. బ్యాంక్ నిఫ్టీ 71 పాయింట్లు కోల్పోయింది. డాలర్‌తో పోల్చుకుంటే రూపాయి మారకం విలువ 89.76గా ఉంది.

ఇవీ చదవండి:

కార్పొరేట్‌ రుణాలకు పెరిగిన గిరాకీ: ఎస్‌బీఐ చైర్మన్

నేటి నుంచి ఎల్పీజీ వాణిజ్య సిలిండర్ ధరల తగ్గింపు.. కొత్త రేట్లు ఇవే..

మరిన్ని బిజినెస్, అంతర్జాతీయ వార్తల కోసం క్లిక్ చేయండి