AP : ఆలిండియా సర్వీసెస్ అధికారుల బదిలీలపై ఏపీ సర్కారు కసరత్తు, ఇవాళ, రేపు ఉత్తర్వులు!

అమరావతి, సెప్టెంబర్ 8 : ఆలిండియా సర్వీసెస్ అధికారుల బదిలీలపై ఏపీ సర్కారు కసరత్తు తుది దశకు చేరుకుంది. నిన్న సీఎస్, డీజీపీ, సీఎంవో అధికారులతో ముఖ్యమంత్రి చంద్రబాబు దీనిపై సుదీర్ఘ కసరత్తు చేశారు. నేడు కూడా సీఎం క్యాంప్ కార్యాలయంలో ముఖ్యమంత్రి చంద్రబాబు బదిలీలపై చర్చించనున్నారు. జేసీల నుంచి స్పెషల్ చీఫ్ సెక్రటరీల వరకు మార్పులు ఉంటాయని ప్రభుత్వ వర్గాలు అంటున్నాయి. ఎస్పీల నుంచి DIG, IG వరకు కీలక పోస్టుల్లో కొత్త అధికారుల నియామకం జరిగే అవకాశం ప్రస్పుటంగా ఉంది.

ఈ క్రమంలోనే⁠ నేడు పలువురు ముఖ్య కార్యదర్శుల బదిలీలపై ఉత్తర్వులు వెలువడనున్నాయని తెలుస్తోంది. ఈ సమూల మార్పులు ద్వారా పాలనలో వేగాన్ని పెంచాలనే ఆలోచనలో సీఎం చంద్రబాబు ఉన్నారు. ఈ 15 నెలల కాలంలో అధికారుల పనితీరుపై స్పష్టమైన సమాచారం, అవగాహనతో ఉన్న ప్రభుత్వం ఆ మేరకు చర్యలు చేపట్టబోతోంది. బాగా పనిచేసిన అధికారులను ప్రోత్సహించేలా....ఆశించిన స్థాయిలో పనితీరు కనబర్చని వారిని మార్చేలా నిర్ణయాలు ఉండే అవకాశం ఉంది.

తన ఆలోచనలను, వేగాన్ని అందుకునేలా అధికారుల, శాఖాధిపతుల పనితీరు ఉండాలంటున్న సీఎం చంద్రబాబు, సరైన స్థానంలో సరైన అధికారి అనే కాన్సెప్ట్ కోసం ఈ సుదీర్ఘ కసరత్తు జరిపారు. క్షేత్ర స్థాయి నుంచి పాలనలో వేగాన్ని పెంచేలా.. ప్రభుత్వ ప్రాధామ్యాలను గుర్తించి పని చేసేలా కొత్త నియామకాలు ఉంటాయని ఏపీ అధికార వర్గాలు అంటున్నాయి. ఆయా అధికారుల గత రికార్డు మాత్రమే ప్రాతిపదికగా పోస్టింగులు ఉండే అవకాశం ఉంది.

ఇక, ఉన్నతాధికారుల మార్పులు, చేర్పుల విషయంలో నేడు, రేపు బదిలీల ఉత్వర్వులు వెలువడే అవకాశం ఉంది. దీంతో బదిలీలపై అన్ని ప్రభుత్వ శాఖల్లోని అన్ని స్థాయిల్లో చర్చలు షురూ అయ్యాయి. తమ తమ శాఖల్లో మార్పులు చేర్పులపై మండల స్థాయి నుంచి రాష్ట్ర స్థాయి వరకు అధికారులు చర్చించుకుంటున్నారు.

ఇవి కూడా చదవండి

మరో స్కామ్‌ అలర్ట్.. మీ డబ్బు, ఫోన్‌ను ఇలా కాపాడుకోండి

సెప్టెంబర్ 2025లో బ్యాంక్ సెలవుల పూర్తి లిస్ట్..

మరిన్ని జాతీయ, తెలుగు వార్తల కోసం క్లిక్ చేయండి