Virat Kohli: కోహ్లీ, అనుష్క శర్మలకు రెండో చైల్డ్.. డెవిలియర్స్ కీలక ప్రకటన
ABN , Publish Date - Feb 03 , 2024 | 07:50 PM
భారత జట్టు స్టార్ బ్యాట్స్‌మెన్ విరాట్ కోహ్లీ మరోసారి తండ్రి కాబోతున్నాడు. అవును ఆయన భార్య అనుష్క శర్మ త్వరలో రెండోసారి తల్లి కాబోతున్నారు. ఈ వార్త ప్రస్తుతం సోషల్ మీడియాలో వైరల్ అవుతోంది.
భారత జట్టు స్టార్ బ్యాట్స్‌మెన్ విరాట్ కోహ్లీ మరోసారి తండ్రి కాబోతున్నాడు. అవును ఆయన భార్య అనుష్క శర్మ త్వరలో రెండోసారి తల్లి కాబోతున్నారు. ఈ విషయాన్ని దక్షిణాఫ్రికా మాజీ కెప్టెన్ ఏబీ డివిలియర్స్ వెల్లడించాడు. వాస్తవానికి టీమిండియా, ఇంగ్లండ్ మధ్య జరుగుతున్న ఐదు మ్యాచ్‌ల టెస్ట్ సిరీస్‌లో మొదటి, రెండవ మ్యాచ్‌ల నుంచి కోహ్లీ తప్పుకున్న విషయం తెలిసిందే. అయితే విరాట్ ఈ మ్యాచులకు ఎందుకు దూరమయ్యాడనే దానిపై ప్రస్తుతం అభిమానుల్లో ఆసక్తి నెలకొంది. ఈ క్రమంలో విరాట్ తన భార్యతో కలిసి విదేశాల్లో ఉన్నాడని తెలుస్తోంది.
ప్రస్తుతం సోషల్ మీడియాలో వైరల్ అవుతున్న ఓ వీడియోలో ఒక అభిమాని డివిలియర్స్‌ను ఇలా అడిగాడు. మీరు విరాట్‌తో మాట్లాడారా? వాళ్ళు బాగున్నారా? తదుపరి మూడు టెస్టులకు తిరిగి వస్తాడా అని ప్రశ్నించారు. అందుకు ప్రతిస్పందనగా డివిలియర్స్ ఇలా అన్నారు. అవును, అతని రెండవ బిడ్డకు తండ్రి రాబోతున్నారని చెప్పాడు. వారి కుటుంబానికి ఇది చాలా ప్రత్యేకమైన రోజు అని చెప్పారు. దీంతో ఇది తెలిసిన అభిమానులు కోహ్లీకి సోషల్ మీడియా వేదికగా అభినందనలు తెలియజేస్తున్నారు.
ఇంగ్లండ్‌తో జరుగుతున్న ఐదు మ్యాచ్‌ల సిరీస్‌లో భాగంగా టీమిండియా స్టార్ బ్యాట్స్‌మెన్ కోహ్లీ వ్యక్తిగత కారణాలతో తొలి రెండు మ్యాచ్‌లకు దూరమయ్యాడు. ఆ తర్వాత విరాట్, అనుష్క శర్మ రెండో సారి తల్లిదండ్రులు కాబోతున్నారని ఊహాగానాలు వచ్చాయి. కోహ్లీ-అనుష్క మొదటి కుమార్తె వామిక జనవరి 11, 2021న జన్మించింది.
