Viral news: విమానం డోర్ తెరిచి దూకేసిన ప్రయాణికుడు..అసలేమైంది?

ఓ ఎయిర్ పోర్టులో మరికొద్ది సేపట్లో విమానం టేకాఫ్ కాబోతుంది. అంతలోనే అందులో ప్రయాణించేందుకు సిద్ధమైన ఓ ప్రయాణికుడు ఆకస్మాత్తుగా విమానం డోర్ తెరిచి కిందకు దూకాడు. ఆలస్యంగా వెలుగులోకి వచ్చిన ఈ ఘటన కెనడా(canada)లోని టొరంటో పియర్సన్ అంతర్జాతీయ విమానాశ్రయంలో జరిగింది. కెనడా నుంచి దుబాయ్ వైపు వెళ్తున్న ఎయిర్ కెనడా విమానంలోని ఓ ప్రయాణికుడు దుబాయ్‌కి బయలుదేరే ముందు విమానం నుంచి జనవరి 8న దూకేశాడు.

అయితే అతను తన సీటుపై కూర్చోకుండా క్యాబిన్ డోర్(door) తెరిచి బయటకు దూకినట్లు అక్కడి సిబ్బంది చెబుతున్నారు. అంతేకాదు అతన్ని ఆపేందుకు ప్రయత్నించినప్పటికీ అతను వినకుండా దూకాడని అంటున్నారు. అతను 20 అడుగుల ఎత్తు నుంచి కింద పడ్డాడని ఆ క్రమంలో అతనికి స్వల్ప గాయాలయ్యాయని సిబ్బంది తెలిపారు. ప్రమాదం జరిగిన తర్వాత ప్రాంతీయ పోలీసులు, సిబ్బంది అతన్ని ఆస్పత్రికి తరలించారు. అయితే ప్రస్తుతం అతని పరిస్థితి ఎలా ఉందనే విషయం తెలియలేదు. ఎయిర్ కెనడా వెబ్‌సైట్(website) ప్రకారం ఈ ఘటన వల్ల బోయింగ్ 747 టేకాఫ్‌లో ఆరు గంటల ఆలస్యమైందని ప్రకటించింది. అయితే ఈ చర్యకు పాల్పడిన ప్రయాణికుడిని అరెస్టు చేస్తారా లేదా అనేది కూడా తెలియాల్సి ఉంది.