తెలంగాణ ఆయుష్ శాఖలో 70 ఉద్యోగాలు.. నవంబరు 26 నుంచి ఆన్లైన్ దరఖాస్తులు
ABN , Publish Date - Nov 19 , 2026 | 09:24 PM
తెలంగాణలో ప్రభుత్వ ఉద్యోగాల కోసం ఎదురుచూస్తున్న నిరుద్యోగులకు మరో తీపి కబురు అందింది. రాష్ట్ర ప్రభుత్వం ఆయుష్ విభాగంలో మరో 70 పోస్టుల భర్తీకి గ్రీన్ సిగ్నల్ ఇచ్చింది.
హైదరాబాద్, నవంబరు 19: తెలంగాణ రాష్ట్రంలో నిరుద్యోగులకు ప్రభుత్వం మరో శుభవార్త అందించింది. ఆయుష్ విభాగంలో ఖాళీగా ఉన్న మరో 70 పోస్టుల భర్తీకి గ్రీన్ సిగ్నల్ ఇచ్చింది. ఈ మేరకు లెక్చరర్లు, టెక్నికల్ అసిస్టెంట్ల నియామకాలకు సంబంధించి నోటిఫికేషన్ విడుదలకు చర్యలు చేపట్టింది. ఆయుర్వేదం, హోమియోపతి, యునానీ విభాగాల్లో మొత్తం 45 స్పెషాలిటీలకు సంబంధించి ఈ పోస్టులను భర్తీ చేయనున్నారు.
అర్హత కలిగిన అభ్యర్థుల నుంచి నవంబరు 26వ తేదీ నుంచి ఆన్లైన్లో దరఖాస్తులు స్వీకరించనున్నారు. దరఖాస్తు చేసుకోవడానికి డిసెంబర్ 2వ తేదీ సాయంత్రం 5 గంటల వరకు గడువు విధించారు. అభ్యర్థులు దరఖాస్తు సమయంలో ఏవైనా తప్పులు చేసినట్లయితే వాటిని సరిచేసుకునేందుకు డిసెంబర్ 3, 4 తేదీల్లో అవకాశం కల్పించనున్నారు. దీంతో ఆయుష్ విభాగంలో ఉద్యోగాల కోసం ఎదురుచూస్తున్న అభ్యర్థులకు ఈ నియామకాలు మంచి అవకాశంగా మారనున్నాయి.
ఈ పోస్టుల భర్తీలో అభ్యర్థుల ఎంపికకు మెరిట్తో పాటు సర్వీస్ వెయిటేజీకి ప్రాధాన్యత ఇవ్వనున్నారు. ముఖ్యంగా పీజీ మార్కులకు 80 పాయింట్లు కేటాయించగా.. సర్వీస్ వెయిటేజీకి 20 పాయింట్లు కేటాయించారు. ఈ రెండు అంశాల ఆధారంగా అభ్యర్థుల మెరిట్ జాబితాను రూపొందించి ఎంపిక ప్రక్రియ చేపట్టనున్నారు. కాగా.. ఇప్పటికే ఆయుష్ విభాగంలో 137 అసిస్టెంట్ ప్రొఫెసర్ పోస్టులను ప్రభుత్వం భర్తీ చేసింది. తాజాగా.. మరో 70 పోస్టుల భర్తీకి చర్యలు చేపట్టడంతో ఆయుష్ విద్యా, వైద్య రంగాల్లో సిబ్బంది కొరత తగ్గే అవకాశం ఉంది. మరోవైపు గత మూడేళ్లలో రాష్ట్ర ఆరోగ్యశాఖ పరిధిలో సుమారు 15 వేల పోస్టులను భర్తీ చేసినట్లు ప్రభుత్వం వెల్లడిస్తోంది. వైద్య ఆరోగ్య రంగాన్ని మరింత బలోపేతం చేయడం, ప్రభుత్వ ఆసుపత్రులు.. వైద్య విద్యా సంస్థల్లో ఖాళీలను తగ్గించడం లక్ష్యంగా వరుసగా నియామకాలు చేపడుతోంది. తాజా నోటిఫికేషన్తో ఆయుర్వేదం, హోమియోపతి, యునానీ రంగాల్లో అర్హత కలిగిన అభ్యర్థులకు ప్రభుత్వ ఉద్యోగ అవకాశాలు మరింత పెరగనున్నాయి.
ఈ వార్తలనూ చదవండి:
చెన్నైలో భారీగా హెరాయిన్ పట్టివేత.. రూ.710 కోట్ల విలువైన డ్రగ్స్ స్వాధీనం..
నైలాన్ తాడుతో చిన్నారి చేతులు కట్టేసి కొట్టిన టీచర్.. తమిళనాడు స్కూల్లో ఘటన