ప్రేమ బంధంలో ‘పైసా’ పాఠం

ఆలుమగలు ఒకే దారిలో పయనిస్తున్నా, ఆర్థిక గమ్యం దగ్గరకు వచ్చేసరికి సగటు మహిళ అడుగులు ఎందుకు తడబడుతున్నాయి? నిశ్శబ్దంగా నడిచే ఆర్థిక ఆధిపత్యం పెళ్లి బంధాన్ని ఎలా దెబ్బతీస్తుందో, మహిళలు తమ స్వేచ్ఛను, ఆత్మవిశ్వాసాన్ని ఎలా నిలబెట్టుకోవాలో చూద్దాం.

ఒక బంధం ఆరోగ్యకరంగా నిలబడాలంటే భార్యాభర్తలిద్దరికీ డబ్బు విషయంలో సమాన సమాచారం, సమాన స్వరం, సరిసమానమైన ఎంపికల స్వేచ్ఛ ఉండాలి. మహిళలు ఆర్థిక ఆత్మవిశ్వాసాన్ని కోల్పోకుండా ఉండటానికి, బంధంలో ఎదురయ్యే ఆర్థిక లొసుగులను గుర్తించడానికి ఈ ఏడు ప్రధాన సంకేతాలను అర్థం చేసుకోవాలి.

పారదర్శకత : అత్యంత నమ్మకంతో ముడిపడి ఉండే వివాహ బంధంలో డబ్బు విషయంలో ఇరువైపులా రహస్యాలు ఉండకపోవడమే ఆరోగ్యకరమైన సంకేతం. ఆదాయం ఎంత? చేస్తున్న ఖర్చులేమిటి? తీసుకున్న రుణాలు, పెట్టిన పెట్టుబడుల వివరాలను భార్యాభర్తలిద్దరూ ఒకరికొకరు స్పష్టంగా పంచుకోవాలి. ‘నా సంపాదన నాది, నీ సంపాదన నీది’ అనడంగానీ లేదా ‘అవన్నీ నీకెందుకు, నేను చూసుకుంటాను కదా!’ అని సంభాషణను దాటవేయడంగానీ బంధానికి మంచిది కాదు. అత్యవసర పరిస్థితులు ఎదురైనప్పుడు కుటుంబ ఆర్థిక సమగ్ర రూపం ఇద్దరికీ తెలిసి ఉండటం ఎంతో ముఖ్యం.

ఉమ్మడి నిర్ణయాలు : ఇంట్లో ఒకరు మాత్రమే సంపాదిస్తున్నా లేదా ఇద్దరూ సంపాదిస్తున్నా.. ఆర్థిక నిర్ణయాల్లో భాగస్వామ్యం ఇద్దరిదీ కావాలి. పెట్టుబడులు ఎక్కడ పెట్టాలి? దీర్ఘకాలిక లక్ష్యాలు ఎలా ఉండాలి? లోన్లు ఎలా నిర్వహించాలి? అనే అంశాలపై భార్యాభర్తలిద్దరూ చర్చించి నిర్ణయం తీసుకోవాలి. కేవలం ఒకరే అన్ని నిర్ణయాలూ తీసేసుకుని అవతలి వారికి చెప్పడం సరికాదు. ఆర్థిక విషయాలు బాధ్యతల నుంచి ఒకరు తప్పుకోవడం కూడా బంధంలో అసమానతకు దారితీస్తుంది.

చెప్పకుండా చేసే అప్పులు : అవసరం ఏదైనా సరే.. భాగస్వామికి చెప్పకుండా రహస్యంగా రుణాలు తీసుకోవడం, స్నేహితులు లేదా బంధువుల వద్ద పెద్ద మొత్తంలో అప్పులు చేయడం సరికాదు. బ్యాంకుల నోటీసులు వచ్చినప్పుడో లేదా అప్పు ఇచ్చిన వారు ఇంటి ముందుకు వచ్చినప్పుడో గానీ తెలుసుకోలేని పరిస్థితి రాకూడదు. కుటుంబంపై పడే ప్రతి ఆర్థిక భారంలో ఇద్దరికీ భాగస్వామ్యం ఉంటుంది కాబట్టి, ఏ అప్పు చేయాలన్నా ముందే పరస్పరం చర్చించి నిర్ణయం తీసుకోవడం ఎంతో అవసరం.

ఆర్థిక ఆత్మవిశ్వాసం : పిల్లల పెంపకం లేదా కుటుంబ బాధ్యతల వల్ల మహిళలు కెరీర్‌కు విరామం ఇవ్వాల్సి రావచ్చు. అది కుటుంబం కోసం చేసే గొప్ప త్యాగం. అయితే, ఉద్యోగం లేని సమయంలో మహిళలు ఆర్థిక నిర్ణయాల్లో ప్రాధాన్యం కోల్పోవడం లేదా ప్రతి చిన్న దానికి భాగస్వామిపై ఆధారపడుతున్నామనే అభద్రతకు గురికావడం సరికాదు. అదే సమయంలో ‘నాకేమీ తెలియదు, నేను ఇవన్నీ చూసుకోలేను’ అని మహిళలు స్వయంగా వెనకడుగు వేయకుండా.. ఇంట్లోని బడ్జెట్‌, పొదుపు, పెట్టుబడులపై కనీస అవగాహన పెంచుకోవాలి. ఆర్థిక జ్ఞానమే మహిళలకు నిజమైన ఆత్మవిశ్వాసాన్ని ఇస్తుంది.

ఒకరిదే ఆధిపత్యం : ‘నువ్వు బాధపడకు, ఇంటా బయటా నేనే అన్నీ చూసుకుంటాను’ అనే మాటలు పైకి చాలా ప్రేమగా, బాధ్యతాయుతంగా అనిపించినా, ఆచరణలో అది కుటుంబ ఆర్థిక విషయాలపై పూర్తి నియంత్రణకు దారితీస్తే మంచిది కాదు. బంధంలో ఒకరిదే ఆధిపత్యం ఉండటం సరికాదు. అలాగని బాధ్యతలను ఒకరిపైనే నెట్టేసి, అవతలివారు తప్పుకోవడం కూడా బంధానికి శ్రేయస్కరం కాదు. కుటుంబానికి సంబంధించి కీలక ఆర్థిక విషయాల్లో ఇద్దరూ కూర్చుని చర్చించాలి. ఒకరే నిర్ణయాలు తీసుకుని అవతలి వారికి కేవలం ప్రకటనల రూపంలో తెలిపే పద్ధతికి స్వస్తి పలికి, ఇరువురి భాగస్వామ్యంతో నిర్ణయాలు తీసుకోవాలి.

స్పష్టమైన ఆర్థిక ప్రణాళిక : వివాహ ఖర్చులు, ఆదాయాలను కలిపి ఉంచాలా? లేక వ్యక్తిగత ఖాతాలు నిర్వహించాలా? అనే విషయాల్లో ముందే స్పష్టమైన అవగాహనకు రావాలి. రహస్యంగా అప్పులు చేయడం లేదా భాగస్వామికి తెలియకుండా పెద్ద మొత్తంలో ఖర్చులు చేయడం నమ్మకద్రోహానికి దారితీస్తుంది. ఉమ్మడి ఖర్చులకు ఒక స్పష్టమైన బడ్జెట్‌ కేటాయించుకుంటూనే, ఇద్దరికీ తగినంత వ్యక్తిగత స్వేచ్ఛను ఇచ్చుకోవడం ద్వారా మనస్పర్థలను నివారించవచ్చు.

నైరాశ్యం.. ప్రమాదకరం: భార్యాభర్తలలో ఒకరు ఎక్కువ సంపాదించడం, మరొకరు తక్కువ సంపాదించడం లేదా ఒకరి ఖర్చు శైలి వేరుగా ఉండటం పెద్ద సమస్య కాదు. కానీ ఈ వ్యత్యాసాల వల్ల ఒక భాగస్వామి (ముఖ్యంగా మహిళలు) ‘నాకేమీ తెలియదు, నేను ఇవన్నీ చూసుకోలేను’ అనే నైరాశ్యంలోకి జారిపోవడం ప్రమాదకరం. ఈ ఆత్మవిశ్వాస లేమి జీవితాంతం ఒకరిపై ఆధారపడటానికి దారితీస్తుంది. కాబట్టి సంపాదనతో సంబంధం లేకుండా, కుటుంబ ఆర్థిక నిర్వహణపై అవగాహన పెంచుకుంటూ ఆత్మవిశ్వాసాన్ని కాపాడుకోవాలి. ఆర్థిక పారదర్శకత అనేది ఒక్కరి బాధ్యత కాదు; అది భార్యాభర్తలిద్దరి సమాన ప్రయాణం. పరస్పర గౌరవం, పారదర్శకత, ఆర్థిక అవగాహన ఉన్నప్పుడే ఆ బంధం బలంగా నిలబడుతుంది.

ఈ వార్తలు కూడా చదవండి..

క్యాన్సర్ చికిత్సలో మరో ముందడుగు.. జీజీహెచ్‌లో ఉచిత జన్యు పరీక్షలు

ప్రజల భూమిని లాక్కునే ఉద్దేశం ప్రభుత్వానికి లేదు: మంత్రి పొంగులేటి

Read Latest AP News And Telugu News