Healthy Lifestyle Tips: ఆరోగ్యమే మహాభాగ్యం

హ్యాపీ లైఫ్‌

ఈ కొత్త సంవత్సరంలో జీవితాన్ని ఆనందమయం చేసుకోవాలని ఎన్నో తీర్మానాలు, నిర్ణయాలు తీసుకొని ఉంటాం. భవిష్యత్తును బంగారంలా తీర్చిదిద్దుకోవడానికి మరెన్నో ప్రణాళికలు వేసి ఉంటాం.

కానీ ఏది సాధించాలన్నా ప్రధానంగా కావల్సింది... దృఢమైన ఆరోగ్యం. అప్పుడే కదా... ఉల్లాసంగా, ఉత్సాహంగా ఏ పని అయినా చేయగలుగుతాం. మరి ఆరోగ్యం కాపాడుకోవాలంటే..! క్రమం తప్పని వ్యాయామం, ఆహార నియమాలతోపాటు క్రమశిక్షణ అలవరుచుకోవడం తప్పనిసరి అంటున్నారు న్యూట్రిషనిస్టులు.

• ఫిట్‌గా, ఆరోగ్యంగా ఉండాలంటే శరీరం కదలాలి. దానికి ప్రభావవంతమైన మార్గం వ్యాయామం. వర్కవుట్స్‌ అనగానే ఏ జిమ్‌కో, పార్కుకో వెళ్లాల్సిన పని లేదు. బిజీ షెడ్యూల్స్‌తో సమయం లేదనుకొంటే ఇంటి వద్దే వ్యాయామం చేసుకోవచ్చు. చిన్న చిన్న ఎక్స్‌ర్‌సైజ్‌లతో మొదలుపెట్టండి. అంటే సులువుగా చేసుకొనే ప్లాంక్స్‌, స్కౌట్స్‌, కార్డియో లాంటివి. అయితే ఉదయం లేదా సాయంత్రం క్రమం తప్పకుండా రోజుకు కనీసం అరగంట నుంచి నలభై నిమిషాలు వ్యాయామం చేయాలి.

• ఆరోగ్యంగా జీవించాలంటే సరైన హైడ్రేషన్‌ చాలా అవసరం. ముఖ్యంగా వ్యాయామం చేసేటప్పుడు అలసట, ఆయాసం, కండరాల నొప్పిని సాధ్యమైనంత తగ్గించుకొనేందుకు శరీరానికి ఎలక్ర్టోలైట్స్‌ తప్పనిసరి. అలాగే జీర్ణక్రియ సవ్యంగా సాగడానికి, ఫిట్‌గా ఉంచడంలో ఎలక్ర్టోలైట్స్‌ అత్యంత కీలకం. ఒకవేళ శరీరం డీహైడ్రేషన్‌కు గురైతే రకరకాల ఆరోగ్య సమస్యలు తలెత్తుతాయి.

• ఎంత తిన్నాం అనే దానికంటే సమతులాహారం తీసుకున్నామా లేదా అన్నది ముఖ్యం. దాని కోసం మెనూలో పండ్లు, కూరగాయలు తప్పనిసరిగా ఉండేలా చూసుకోవాలి. ఏది పడితే అది కాకుండా పోషకాహారంతో నిండిన డైట్‌ ప్లాన్‌ ఒకటి రూపొందించుకొని, దాన్ని ఆచరించాలి. ఏయే సమయాల్లో తినాలో కూడా అందులో ఉండాలి. కావాలనుకొంటే ఈ మెనూలో నచ్చిన వెరైటీలు కొన్ని చేర్చుకోవచ్చు.

• మీ శరీరం, దాన్లో జరుగుతున్న మార్పులపై మీకు పూర్తి అవగాహన ఉండాలి. వ్యాధులు వచ్చాక మందు వేసే కంటే... ఆ వ్యాధులు దరి చేరకుండా చూసుకోవడం ఉత్తమం. అందుకే రెగ్యులర్‌గా మెడికల్‌ చెక్‌పలు చేయించుకోవాలి. క్రమం తప్పని వైద్య పరీక్షలు మీ జీవితాన్నే కాదు, మందుల ఖర్చు కూడా తగ్గిస్తాయని మర్చిపోవద్దు.

• విరామం లేని పని గంటలు, ప్రయాణాలవల్ల చాలామంది నిద్రను నిర్లక్ష్యం చేస్తుంటారు. కంటి నిండా నిద్ర లేకపోతే శారీరకంగా, మానసికంగా ఒత్తిడికి గురవుతారు. ఇది అనారోగ్యానికి దారి తీస్తుంది. కనుక రాత్రిళ్లు ప్రశాంతమైన నిద్ర ఉండేలా చూసుకోండి. పడుకొనేముందు గాడ్జెట్లను దూరం పెట్టండి. ఇది మీకు ఎన్నో రకాల సమస్యల నుంచి ఉపశమనం ఇస్తుంది.

ఈ వార్తలు కూడా చదవండి..

రైలు పట్టాలపైనే మహిళ ప్రసవం.. ఏమైందంటే?

బెట్టింగ్ యాప్‌ బారిన పడి యువకుడి బలి

Read Latest AP News And Telugu News