దారంతో విప్లవం

హరియాణాలోని ఒక చిన్న పట్టణం నుంచి ప్రారంభమైన రీతు ఇన్‌సాన్‌ నిశ్శబ్ద ప్రయాణం, ఈ రోజు దేశవ్యాప్తంగా లక్షలాది మంది గ్రామీణ స్త్రీల జీవితాల్లో వెలుగులు నింపుతూ ఆర్థిక స్వాతంత్ర్యానికి సరికొత్త చిరునామాగా మారింది.

సాధారణంగా జీవితంలో ఎదురయ్యే ఆర్థిక ఆటుపోట్లు మనుషులను కుంగదీస్తాయి, ఆశలను చంపేస్తాయి. కానీ, కొందరు మాత్రమే ఆ కష్టాలనే తమ ఆయుధాలుగా మార్చుకుని చరిత్రను తిరగరాస్తారు. హరియాణాలోని భివానీ జిల్లాకు చెందిన రీతు ఇన్‌సాన్‌ సరిగ్గా ఇదే నిజం చేసి చూపించారు. కేవలం ఒక సాధారణ కుట్టు మిషన్‌, జేబులో పది రూపాయల నోటుతో ప్రారంభమైన ఆమె ప్రయాణం, గడిచిన రెండు దశాబ్దాలలో అసాధారణ మైలురాళ్లను దాటింది. కేవలం తన కుటుంబ పోషణ కోసమే కాకుండా, సమాజంలోని నిరాదరణకు గురవుతున్న మహిళలకు అండగా నిలవాలనే గొప్ప సంకల్పంతో ఆమె ముందుకు సాగారు. తద్వారా దాదాపు 3..5 లక్షల మంది మహిళలకు టైలరింగ్‌, ఫ్యాషన్‌ డిజైనింగ్‌లలో వృత్తి విద్యా శిక్షణ ఇచ్చే స్థాయికి ఎదిగారు. వేలాది మందిని స్వయం ఉపాధి బాట పట్టించి, ఒక నిశ్శబ్ద ఆర్థిక విప్లవానికి ఆమె నాయకత్వం వహిస్తున్నారు.

కష్టాల నుంచి మొదలైన ఆశల ప్రయాణం

రీతు ప్రారంభ ప్రయాణం ముళ్లు తేలిన దారిలా ఎన్నో అడ్డంకులతో కూడుకున్నది. కుటుంబంలో నెలకొన్న తీవ్ర ఆర్థిక పరిస్థితుల వల్ల ఆమె యవ్వనంలో ఎన్నో రాత్రులు భవిష్యత్తుపై అభద్రతాభావంతో గడిపారు. కనీస అవసరాలు తీర్చుకోవడం కూడా గగనంగా మారిన సమయాల్లో, ఆమె చేతిలోని కుట్టు నైపుణ్యమే ఆమెకు ఒకే ఒక భరోసాగా కనిపించింది. ఆ కాలంలో తన వద్ద కనీసం ప్రయాణానికి కూడా డబ్బులు లేని రోజులు ఉన్నాయని, ఎన్నోసార్లు నిరాశను ఎదుర్కొన్నానని ఆమె గుర్తు చేసుకుంటారు. కానీ, తనకున్న నైపుణ్యంపై ఆమెకు ఎప్పుడూ సంపూర్ణ విశ్వాసం ఉంది. కేవలం తన ఆర్థిక సమస్యలను పరిష్కరించుకోవడంతో ఆగిపోకుండా, తనలాగే సమాజంలో అవకాశాలు లేక వెనుకబడిన మరికొందరు మహిళలకు కూడా ఉపాధి చూపించాలనే బలమైన సేవా భావం ఆమెలో నాటి నుంచి బలపడింది.

సేవా దృక్పథంతో ఉపాధి శిక్షణ

టైలరింగ్‌ అనేది కేవలం బట్టలు కుట్టే సాధారణ పని మాత్రమే కాదని, అది గ్రామీణ మహిళల ఆత్మగౌరవానికి, ఆర్థిక స్వాలంబనకు ఒక బలమైన సాధనం అని రీతు గట్టిగా నమ్మారు. అందుకే వ్యాపార దృక్పథంతో కాకుండా, ఒక పవిత్రమైన సేవా గుణంతో తన శిక్షణ కార్యక్రమాలకు రూపకల్పన చేశారు. కొత్తగా కటింగ్‌ నేర్చుకునేటప్పుడు చాలామంది కష్టంగా భావించే మెజర్‌మెంట్స్‌, కటింగ్‌ ఫార్ములాలను తేలికైన రీతిలో డిజైన్‌ చేసి ఆవిష్కరించారు. ఆమె అందిస్తున్న అడ్వాన్స్‌డ్‌ బొటిక్‌ కోర్సులలో పర్ఫెక్ట్‌ ఫిటింగ్‌ సూట్‌ స్టిచింగ్‌, ట్రెండీ కో ఆర్డ్‌ సెట్స్‌, అంగరఖా డిజైన్లు, కటోరి బ్లౌజులు, ప్రిన్సెస్‌ కట్‌ బ్లౌజులు, కాలర్‌ డిజైన్లు సులభ పద్ధతిలో నేర్పిస్తున్నారు. గడిచిన 20 ఏళ్ల సుదీర్ఘ ప్రయాణంలో ఆమె దాదాపు 3.5 లక్షల మందికిపైగా మహిళలకు శిక్షణ ఇచ్చి దేశంలోనే ఒక అరుదైన రికార్డు సృష్టించారు. శిక్షణ పొందిన వారు కేవలం తమ సొంత దుస్తులు కుట్టుకోవడానికే పరిమితం కాకుండా, సొంతంగా బొటిక్‌లు, కుట్టు కేంద్రాలు ఏర్పాటు చేసుకుని కుటుంబ పోషణలో క్రియాశీలక భాగస్వాములవుతున్నారు.

‘టాలెంటెడ్‌ రీతు ఇన్‌సాన్‌’

భివానీలోని ఒక చిన్న గదిలో కేవలం కొద్దిమందితో ప్రారంభమైన ఈ ప్రయాణం, నేడు ‘టాలెంటెడ్‌ రీతు ఇన్‌సాన్‌’ పేరుతో ఒక విస్తృతమైన శిక్షణ నెట్‌వర్క్‌గా రూపాంతరం చెందింది. దేశంలోని వివిధ రాష్ట్రాలలో దాదాపు 50కి పైగా ప్రత్యేక శిక్షణ శాఖల ద్వారా ఆమె ప్రత్యక్షంగా శిక్షణను అందిస్తూనే ఉన్నారు. కేవలం భౌతిక కేంద్రాలకే పరిమితం కాకుండా, సోషల్‌ మీడియా వేదికలను అత్యంత సమర్థవంతంగా వినియోగించుకుంటూ డిజిటల్‌ విప్లవానికి తెరలేపారు. ముఖ్యంగా యూట్యూబ్‌లో 18 లక్షలకు పైగా సబ్‌స్కైబ్రర్లతో ఆమె నిర్వహిస్తున్న ఉచిత ఆన్‌లైన్‌ తరగతులు దేశ విదేశాలలోని లక్షలాది మంది మహిళలకు చేరువవుతున్నాయి. ఎలాంటి ఫీజులు ఆశించకుండా ఇంటి వద్దే ఉండి ఉపాధి పొందే మెళకువలు నేర్చుకునేలా ఆమె వీడియోలు రూపొందిస్తుండటం విశేషం. ఇటీవల కన్వర్‌ యాత్ర సందర్భంలో కూడా, తనకు మార్గమధ్యంలో ఎదురైన మహిళలకు పూలమాలలకు బదులుగా కొలత టేపులు పంపిణీ చేస్తూ స్వయం ఉపాధి ప్రాముఖ్యతను వివరించడం ఆమె నిరంతర సేవా నిరతికి నిలువెత్తు నిదర్శనం.

జాతీయ స్థాయి గుర్తింపు

రీతు ఇన్‌సాన్‌ సాధించిన ఈ అద్భుతమైన విజయం కేవలం ఒక రాష్ట్రానికే పరిమితం కాకుండా జాతీయ స్థాయిలో ఎంతోమంది ప్రశంసలను అందుకుంది. ఆమె చేసిన సామాజిక సేవను గుర్తించిన సంస్థలు ప్రతిష్ఠాత్మక ఇండియా బుక్‌ ఆఫ్‌ రికార్డ్స్‌లో ఆమెకు సముచిత స్థానం కల్పించాయి. కేవలం శిక్షణ ఇవ్వడమే కాకుండా, గ్రామీణ ప్రాంతాల నుంచి వచ్చే యువతులకు, విద్యార్థులకు పెద్ద ఎత్తున ఫ్యాషన్‌ షోలు నిర్వహించడం ద్వారా వారిలో దాగి ఉన్న సృజనాత్మకతను వెలికితీసే వేదికలను ఆమె కల్పిస్తున్నారు. ప్రభుత్వ సాయం కానీ, కార్పొరేట్‌ మద్దతు కానీ లేకపోయినా, కేవలం తన శ్రమ, సమాజానికి సేవ చేయాలనే తపనతో ఆమె ఈ స్థాయికి చేరుకున్నారు. సుమారు మూడున్నర లక్షల మంది మహిళల చేతులకు ఉపాధిని అందించి వారి జీవితాల్లో వెలుగులు నింపిన రీతు ఇన్‌సాన్‌ ప్రయాణం, సమాజంలో మార్పు తీసుకురావాలనుకునే ప్రతి ఒక్కరికీ ఒక అద్భుతమైన ప్రేరణగా నిలుస్తుంది.

ఈ వార్తలనూ చదవండి:

ఇమ్రాన్ ఖాన్‌ను ఆస్పత్రిలో చేర్పించి.. చికిత్స అందించాలి.. సుప్రీం కీలక ఆదేశాలు

మీరు గట్టిగా మాట్లాడుతున్నారు.. నిశ్శబ్దంగా ఉండండి: వైట్ హౌస్‌లో విలేకరిపై ట్రంప్ ఆగ్రహం