చినుకుల వేళ.. తప్పనిసరి జాగ్రత్తలు

వర్షాకాలంలో బయటకు వెళ్లేటప్పుడు, రోజువారీ పనుల్లో కొన్ని చిన్నచిన్న జాగ్రత్తలు పాటిస్తే అనారోగ్యాలు, ప్రమాదాల నుంచి సులభంగా రక్షణ పొందవచ్చు.

తడి దుస్తులు వద్దు: వర్షంలో తడిస్తే వెంటనే వాటిని విడిచి పొడి దుస్తులు ధరించాలి. తడిబట్టలతో ఎక్కువసేపు ఉంటే ఫంగల్‌ ఇన్ఫెక్షన్లు వచ్చే ప్రమాదం ఉంది.

పాదాల సంరక్షణ: వర్షపు నీటిలో నడిచి ఇంటికి వచ్చిన వెంటనే కాళ్లను సబ్బు నీటితో శుభ్రంగా కడుక్కోవాలి. వేళ్ల మధ్య తడి లేకుండా పొడి తువాలుతో తుడుచుకోవాలి. ముఖ్యంగా మధుమేహం ఉన్నవారు పాదాల పట్ల చాలా జాగ్రత్తగా ఉండాలి.

రైన్‌గేర్‌ సంరక్షణ: గొడుగులు, రెయిన్‌ కోట్లను వాడిన తర్వాత ఆరబెట్టకుండా అలాగే మడతపెట్టి ఉంచితే బూజు పట్టి దుర్వాసన వస్తాయి. బాగా ఆరిన తర్వాతే వాటిని భద్రపరచాలి.

దుస్తులు.. చెప్పుల ఎంపిక

తేలికపాటి దుస్తులు: త్వరగా ఆరిపోయే కాటన్‌ లేదా సింథటిక్‌ దుస్తులు ఎంచుకోవాలి. చాలా లూజ్‌గా, సౌకర్యంగా ఉండే దుస్తులు వేసుకోవడం మంచిది.

పాదరక్షలు: వర్షాకాలంలో కాన్వాస్‌ లేదా లెదర్‌ చెప్పులు, బూట్లు వాడకపోవడమే మంచిది. నీటిలో నానితే అవి పాడవుతాయి. రబ్బరు లేదా వాటర్‌ ప్రూఫ్‌ గ్రిప్‌ ఉన్న చెప్పులు వాడితే జారిపోకుండా జాగ్రత్త పడవచ్చు.

ప్రయాణాలు.. జాగ్రత్తలు

వాహనాల తనిఖీ: మీ బైక్‌ లేదా కారు టైర్ల గ్రిప్‌, బ్రేకులు, వైపర్లు సరిగా ఉన్నాయో, లేదో చూసుకోండి. రోడ్లు జారేలా ఉంటాయి కాబట్టి వేగాన్ని తగ్గించి వాహనం నడపాలి.

మ్యాన్‌హోల్స్‌: రోడ్లపై నిలిచిన నీటిలో గుంతలు, తెరిచి ఉన్న మ్యాన్‌హోల్స్‌ కనబడవు. తెలియని, లేదా నీరు ఎక్కువగా నిలిచిన రోడ్లపై వాహనాలు నడపకపోవడమే శ్రేయస్కరం.

ఫస్ట్‌ ఎయిడ్‌ కిట్‌: ప్రయాణాల్లో ఉన్నప్పుడు ఎమర్జెన్సీ ఫస్ట్‌ ఎయిడ్‌ కిట్‌, అత్యవసర మందులు, గొడుగు, వాటర్‌ బాటిల్‌ ఎప్పుడూ వెంట ఉంచుకోవాలి.

ముందు జాగ్రత్తే ఉత్తమమైన నివారణ. చిన్నచిన్న విషయాల్లో శ్రద్ధ వహిస్తే ఈ వర్షాకాలంలో వ్యాధులు, ప్రమాదాల బారినపడకుండా ఆహ్లాదకరంగా, ఆరోగ్యంగా గడపవచ్చు.

ఈ వార్తలనూ చదవండి:

ఇండోనేషియాలో ఘోర అగ్నిప్రమాదం.. ఐదుగురి మృతి, 41 మంది గల్లంతు..

వాషింగ్టన్‌లో భారీ కార్చిచ్చు.. 2.5 లక్షల ఎకరాలు దగ్ధం..