సల్వార్ కమీజ్.. సాహస ప్రతీక
ABN , Publish Date - May 18 , 2026 | 05:20 AM
లాస్వేగాస్ డబ్ల్యూడబ్ల్యూఈ రింగ్.. పశ్చిమ దేశాల రెజ్లర్లు శరీరాలు ప్రదర్శించే బిగుతు దుస్తుల్లో మెరిసిపోయే చోట.. ఆమె మాత్రం నిలువెత్తు భారతీయతను ప్రతిబింబించే...
లాస్వేగాస్ డబ్ల్యూడబ్ల్యూఈ రింగ్.. పశ్చిమ దేశాల రెజ్లర్లు శరీరాలు ప్రదర్శించే బిగుతు దుస్తుల్లో మెరిసిపోయే చోట.. ఆమె మాత్రం నిలువెత్తు భారతీయతను ప్రతిబింబించే కాషాయ రంగు సల్వార్ కమీజ్, దుపట్టాతో ప్రత్యక్షమైంది. వేలమంది ప్రేక్షకులు నోరెళ్లబెట్టేలా.. ప్రపంచం మొత్తం తనవైపే చూసేలా చరిత్ర సృష్టించిన ఆ హరియాణా ఉక్కు మహిళే కవితాదేవి. సంప్రదాయం సంకెళ్లు కాదు.. అదొక తిరుగులేని అస్త్రమని నిరూపించిన కవిత ప్రస్థానం.. ఆమె మాటల్లోనే..
హరియాణాలోని ‘కురుక్షేత్ర’ పరిసరాల్లో ఉన్న ఒక చిన్న గ్రామంలో జన్మించాను. సాధారణంగా వ్యవసాయం, కట్టుబాట్లు, పురుషాధిక్యత ఎక్కువగా ఉండే ఆ వాతావరణం నుంచి వచ్చిన నాకు చిన్నప్పటి నుంచే బరువులు ఎత్తడమంటే ఇష్టం. జాతీయస్థాయి పవర్ లిఫ్టర్గా ఎదిగి ఎంతోమంది పురుషుల కంటే ఎక్కువ బరువులను అలవోకగా ఎత్తేసినా.. ఆ క్రీడ నా ఆశయాలకు సరిపడా పెద్ద వేదికను ఇవ్వలేకపోయింది. ఒకరోజు టీవీలో విదేశీ మహిళలు డబ్ల్యూడబ్ల్యూఈ రింగ్లో భయం లేకుండా ఫైట్స్ చేయడం చూసినప్పుడు ఒక భారతీయ మహిళగా నేను ఈ పని ఎందుకు చేయకూడదనే ప్రశ్న నాలో బలమైన సంకల్పాన్ని రగిల్చింది. అంతకుముందు పరిచయమే లేని రెజ్లింగ్లో ‘ది గ్రేట్ ఖలీ’ అకాడమీలో శిక్షణ పొంది, ఎన్నో అడ్డంకులను దాటి 2017లో డబ్ల్యూడబ్ల్యూఈ అంతర్జాతీయ టోర్నమెంట్కు ఎంపికై చరిత్ర సృష్టించగలిగాను.
సంప్రదాయమే నా అస్త్రం
పశ్చిమ దేశాల రెజ్లింగ్ రింగ్లో గ్లోబల్ టీవీ స్ర్కీన్లపై రాణించాలంటే పాశ్చాత్య దుస్తులు వేసుకోవాలనే మూస పద్ధతిని నేను పూర్తిగా తిరస్కరించాను. మన భారతీయ సంస్కృతిలో ధైర్యానికి, త్యాగానికి ప్రతీక అయిన కాషాయ రంగు సల్వార్ కమీజ్ ధరించి రింగ్లోకి రావడం ద్వారా నా మూలాలను వదులుకోకుండానే ప్రత్యర్థులను చిత్తుచేయవచ్చని నిరూపించాలనుకున్నాను. నన్ను చూసిన కోట్లాదిమంది భారతీయ యువతులకు, ముఖ్యంగా చిన్న పట్టణాల అమ్మాయిలకు నేను తమ ఇంట్లోని అక్కలా అనిపించి కొండంత స్ఫూర్తిని ఇవ్వడం నాకెంతో సంతోషాన్నిచ్చింది. సైకాలజీలో దీనిని ‘కౌంటర్ స్టీరియోటైపిక్ మోడలింగ్’ అంటారు. అంటే సమాజం ఒక వర్గం గురించి పెట్టుకున్న తప్పుడు అభిప్రాయాలకు భిన్నంగా ప్రవర్తించి ప్రజల పాత నమ్మకాలను మార్చడం. నన్ను చూసిన తర్వాత ఎవరు కూడా భారతీయ మహిళలు బలమైన అథ్లెట్లు కాలేరని అనలేకపోయారు.
ఓటమి నేర్పిన స్థితప్రజ్ఞత
నిజాయతీగా మాట్లాడుకుంటే ప్రొఫెషనల్ రెజ్లింగ్ రింగ్లో సల్వార్ కమీజ్ వేసుకోవడం అనేది సాధారణ నియమాలకు భిన్నమైనది కాబట్టి కొందరు నన్ను విమర్శించారు. కానీ నేను భయపడకుండా ‘బిహేవియరల్ యాక్టివేషన్ అగైనెస్ట్ సోషల్ జడ్జిమెంట్’ అనే సైకాలజీ సూత్రం ప్రకారం సమాజం నన్ను జడ్జ్ చేసినా సరే నాకు ఏది సరైనదో అది చేస్తూ నిలబడ్డాను. మన మెదడు ఎప్పుడూ ఇతరుల గుర్తింపును కోరుకుంటుంది. కాబట్టి నలుగురి కంటే భిన్నంగా ఉండటానికి భయపడుతుంది, కానీ నేను ఆ అసౌకర్యాన్ని అంగీకరిస్తూ నన్ను వింతగా చూడటం వారి సమస్య అని నమ్మాను. మనం పదేపదే చేసే పనుల ద్వారా మెదడును రీవైర్ చేసుకోవచ్చని, ప్రతిసారి కంఫర్ట్ జోన్ను వదిలి ధైర్యాన్ని ఎంచుకున్నప్పుడు కొత్త ఆలోచనా మార్గాలు ఏర్పడతాయని నా ప్రయాణం ద్వారా నిరూపించాను.
నవ్వు వెనుక సంఘర్షణ
నా ప్రయాణం అంత సులభంగా సాగలేదు. నా ఆనాటి నవ్వు వెనుక తీవ్రమైన శారీరక గాయాలు, ఆర్థిక ఇబ్బందులు, మా పల్లెటూర్లలో ఎదురైన సామాజిక ఒత్తిడి, ఒంటరితనం ఉన్నాయి. ఇవన్నీ ఒక మనిషిలో తీవ్రమైన ఆందోళన, అలసటను కలిగిస్తాయి. కానీ నేను వాటన్నింటినీ అధిగమించాను. సైకాలజీలోని ‘గ్రోత్ మైండ్సెట్’ ప్రకారం ప్రతి ఓటమిని ఒక పాఠంగా చూస్తూ, కష్టపడితే ఏదైనా నేర్చుకోగలననే నమ్మకంతో ముందుకు సాగాను. అలాగే ‘సెల్ఫ్ డిటర్మినేషన్ థియరీ’ ప్రకారం నా నిర్ణయాలపై నియంత్రణ ఉంచుకుంటూ, కఠిన శిక్షణ ద్వారా సామర్థ్యాన్ని పెంచుకుని కోట్లాదిమందితో అనుసంధానమయ్యాను. నా వల్ల ఒక్క అమ్మాయి అయినా స్ఫూర్తి పొంది క్రీడల్లోకి వస్తే నేను అనుభవించిన ప్రతి గాయానికి ప్రతిఫలం దక్కినట్టేనన్న నా నిబద్ధతే నన్ను నడిపించింది.
నువ్వు మారడం గెలుపు కాదు
నేను డబ్ల్యూడబ్ల్యూఈలో పెద్ద చాంపియన్ కాకపోవచ్చు, కానీ నా దేశంలోని లక్షలమంది అమ్మాయిల కలలకు నేను ఒక పెద్ద తలుపు తెరిచాను. ఈ రోజు మీ యాస, మీ సంస్కృతి, మీ విలక్షణమైన వ్యక్తిత్వం, మీ వింతైన కల.. ఇవే మీ కాషాయ సల్వార్ కమీజ్. కాబట్టి ఏది ఏమైనా దానిని దాచుకోకుండా మీ సొంత జీవితం అనే రింగ్లోకి గర్వంగా తీసుకెళ్లండి. గెలుపొందడం అంటే వేరే ఎవరిలాగానో మారడం కాదు, భయం లేకుండా మీలా మీరు నిలబడటమేనని నేను నిరూపించాను. ఇక ముందుకు సాగండి, మీ రింగ్లోకి అడుగుపెట్టండి. ప్రపంచం మొత్తం చూస్తోంది. ఈసారి వారు మీకోసమే చప్పట్లు కొట్టబోతున్నారు.
ప్రపంచ ప్రఖ్యాత డబ్ల్యూడబ్ల్యూఈ రింగ్లో పోటీపడిన మొట్టమొదటి భారతీయ మహిళా రెజ్లర్ కవితాదేవి. 2016 సౌత్ ఏషియన్ గేమ్స్లో వెయిట్లిఫ్టింగ్ విభాగంలో భారతదేశానికి పసిడి పతకం అందించిన ఘనత కూడా ఆమెదే. వివాహమై ఒక బిడ్డకు తల్లి అయిన తర్వాత కూడా సమాజపు కట్టుబాట్లను ఎదిరించి ఆమె సాధించిన ఈ విజయాలు ప్రతి ఒక్కరికీ ఆదర్శం.
ఈ వార్తలనూ చదవండి:
ప్రపంచంలో అతిపెద్ద ఏఐ టెక్ కంపెనీగా టీసీఎస్
బంగారంలో పెట్టుబడులకు గోల్డ్ ఈటీఎఫ్, ఈజీఆర్లు
