వేసవిలో హాయిగా నిద్రపట్టాలంటే...

ఎండాకాలంలో ఉక్కపోత వల్ల రాత్రిపూట సరిగా నిద్ర పట్టదు. అలాగని చల్లదనం కోసం గంటలకొద్దీ ఏసీ వాడడం ఆరోగ్యానికి అంత మంచిది కాదు. ఏసీ, కూలర్‌ లేకపోయినా రాత్రంతా హాయిగా నిద్రపట్టాలంటే ఈ చిట్కాలు పాటిస్తే సరి...

• వేసవిలో శరీర ఉష్ణోగ్రత పెరుగుతూ ఉంటుంది. దీన్ని నియంత్రించడానికి ఎక్కుగా శక్తి ఖర్చవుతుంది. దీంతో శరీరం త్వరగా అలసిపోయి నిద్ర వస్తున్నట్లు అనిపిస్తుంది. అయినప్పటికీ పగటిపూట ఎక్కువగా నిద్రపోకపోవడమే మంచిది. దీనివల్ల రాత్రి పడుకోగానే నిద్ర వచ్చేస్తుంది.

• వాతావరణం వేడిగా ఉన్నాకూడా రోజూ ఒకే సమయానికి పడుకోవడం, నిద్రలేవడం చేస్తూ ఉంటే ప్రయోజనకరంగా ఉంటుంది.

• ఉదయాన్నే తలుపులన్నీ తెరచి ఉంచితే ఇంట్లోకి గాలి ధారాళంగా వీచి గదుల్లో వేడిని తగ్గిస్తుంది. ఎండ పెరుగుతున్న సమయంలో కిటికీలు మూసేసి కర్టెన్లు వేస్తే ఇల్లు వేడెక్కకుండా ఉంటుంది. మరల రాత్రి పడుకునేముందు కిటికీలు తెరిస్తే హాయిగా నిద్రపడుతుంది.

• పరుపుల మీద పలుచని కాటన్‌ దుప్పట్లు వేయాలి. ఇవి ఎక్కువగా వేడిని గ్రహించవు. శరీరంపై ఏర్పడే చెమటను త్వరగా పీల్చుకుని చికాకు లేకుండా చేస్తాయి. దీంతో పడుకున్న కాసేపటికే మంచి నిద్ర పడుతుంది.

• పడుకునేముందు ఫ్యాన్‌ వేసుకుంటే చెమట అవిరై శరీర ఉష్ణోగ్రత నియంత్రణలోకి వస్తుంది. ఫ్యాన్‌ గాలికి బయటి నుంచి వచ్చే చల్లటి గాలి తోడవడంతో వెంటనే నిద్ర పడుతుంది.

• కాళ్లు చల్లగా ఉంటే శరీర ఉష్ణోగ్రత పెరగదు. కాబట్టి సాక్స్‌ను అరగంటసేపు ఫ్రిజ్‌లో ఉంచి పాదాలకు వేసుకుంటే చల్లటి అనుభూతి కలిగి నిద్రపోవాలనిపిస్తుంది.

• వేడిగా ఉందంటూ మరీ చల్లటి నీటితో స్నానం చేయకూడదు. దానివల్ల శరీర ఉష్ణోగ్రత పెరిగి చికాకుగా అనిపిస్తుంది. సరిగా నిద్రపట్టదు. సాయంత్రం లేదా రాత్రి పడుకునేముందు గోరువెచ్చటి నీటితో స్నానం చేస్తే మంచి ఫలితం కనిపిస్తుంది.

ఈ వార్తలనూ చదవండి:

ప్రపంచంలో అతిపెద్ద ఏఐ టెక్‌ కంపెనీగా టీసీఎస్‌

బంగారంలో పెట్టుబడులకు గోల్డ్‌ ఈటీఎఫ్‌, ఈజీఆర్‌లు