బాదం పప్పులు తింటే...

రోజూ కొన్ని బాదం పప్పులను తినడం వల్ల ఎలాంటి ఆరోగ్య ప్రయోజనాలు చేకూరుతాయో తెలుసుకుందాం...

• బాదం పప్పుల్లో క్యాలరీలు చాలా తక్కువ. పీచు, మోనోఅన్‌శాచురేటెడ్‌ కొవ్వులు, ప్రొటీన్లు, మెగ్నీషియం, కాల్షియం తదితర పోషకాలు అధికం. ఇవన్నీ గుండె ఆరోగ్యానికి తోడ్పడతాయి. శరీరంలో చెడు కొలెస్ట్రాల్‌ను నిర్మూలించి రక్తపోటును నియంత్రిస్తాయి.

• వీటిని తిన్న తరువాత చాలాసేపటి వరకు ఆకలి అనిపించదు. ఇతర చిరుతిళ్లవైపు మనసు మళ్లదు కాబట్టి శరీర బరువు క్రమంగా నియంత్రణలోకి వచ్చేస్తుంది.

• అతి తక్కువ గ్లైసెమిక్‌ ఇండెక్స్‌ ఉండడం వల్ల వీటిని తిన్నప్పుడు రక్తంలో గ్లూకోజ్‌ స్థాయి పెరగదు. దీంతో మధుమేహం అదుపులో ఉంటుంది.

• బాదం పప్పుల్లో ఉండే ఇ విటమిన్‌, యాంటీ ఆక్సిడెంట్లు, అత్యవసర ఫ్యాటీ ఆమ్లాలు, పాలీఫెనాల్స్‌ కలిసి చర్మ కణాలను ఆక్సిడేషన్‌ బారినుంచి కాపాడతాయి. దీంతో చర్మంపై ముడుతలు, గీతలు, పిగ్మెంటేషన్‌ మాయమవుతాయి. ముఖం ఛాయగా కాంతివంతంగా కనిపిస్తుంది.

• బాదం పప్పులను బాగా నమిలి తింటే ప్రీబయోటిక్‌లా పనిచేసి ప్రేగుల్లో ఆరోగ్యకరమైన బ్యాక్టీరియాలను పెంచుతాయి. దీంతో మలబద్దకం తదితర సమస్యలు రావు.

• మధ్య వయసు మహిళలు రోజూ అల్పాహారంలో బాదం పప్పులను చేర్చుకుంటే వారికి ఆస్టియోపొరాసిస్‌, మెనోపాజ్‌ సమస్యల నుంచి ఉపశమనం లభిస్తుంది.

• పెరిగే పిల్లలకు వీటిని తినిపించడం వల్ల వారిలో ఏకాగ్రత, జ్ఞాపకశక్తి, రోగనిరోధక శక్తి పెరుగుతాయి. మెదడు చురుకుగా పనిచేస్తుంది. ఎముకలు, కండరాలు బలోపేతమవుతాయి.

ఈ వార్తలనూ చదవండి:

ఇమ్రాన్ ఖాన్‌ను ఆస్పత్రిలో చేర్పించి.. చికిత్స అందించాలి.. సుప్రీం కీలక ఆదేశాలు

మీరు గట్టిగా మాట్లాడుతున్నారు.. నిశ్శబ్దంగా ఉండండి: వైట్ హౌస్‌లో విలేకరిపై ట్రంప్ ఆగ్రహం