అమెరికా ఫెడరల్ రిజర్వ్‌లో రఘురామ్ రాజన్‌ సహా ముగ్గురు భారతీయులకు కీలక పదవులు!

వాషింగ్టన్, జులై 16: అమెరికా కేంద్ర బ్యాంకు 'ఫెడరల్ రిజర్వ్' (US Federal Reserve) అత్యంత కీలకమైన సంస్కరణల కోసం భారతీయ నిపుణుల మేధస్సును ఉపయోగించుకోనుంది. రిజర్వ్ బ్యాంక్ ఆఫ్ ఇండియా (RBI) మాజీ గవర్నర్ రఘురామ్ రాజన్‌‌తో పాటు మరో ఇద్దరు భారత సంతతికి చెందిన ప్రముఖులు.. హార్వర్డ్ ఆర్థికవేత్త రాజ్ చెట్టి, మైక్రోసాఫ్ట్ సీనియర్ ఎగ్జిక్యూటివ్ ఆశా శర్మ‌లను ఫెడరల్ రిజర్వ్ కీలక టాస్క్‌ఫోర్స్‌లలో సభ్యులుగా నియమించింది.

గత కొన్నేళ్లుగా అమెరికాను వేధిస్తున్న అధిక ద్రవ్యోల్బణాన్ని (Inflation) అదుపు చేయడానికి, ద్రవ్య విధాన రూపకల్పనను పునర్నిర్మించడానికి ఫెడ్ నూతన చైర్మన్ కెవిన్ వార్ష్ (Kevin Warsh) గురువారం ప్రకటించిన 5 ప్రత్యేక టాస్క్‌ఫోర్స్‌లలో వీరికి చోటు లభించింది.

రఘురామ్ రాజన్ పాత్ర ఏమిటి?

2013 నుంచి 2016 వరకు ఆర్‌బీఐ గవర్నర్‌గా పనిచేసిన రఘురామ్ రాజన్.. అంతర్జాతీయ ఆర్థిక స్థిరత్వం, ద్రవ్య విధానాలపై ప్రపంచవ్యాప్తంగా మంచి గుర్తింపు పొందారు. గతంలో ఆయన అంతర్జాతీయ ద్రవ్య నిధి (IMF) ప్రధాన ఆర్థికవేత్తగా కూడా పనిచేశారు. తాజా నియామకం ప్రకారం, ఫెడరల్ రిజర్వ్ 'బ్యాలెన్స్ షీట్ పాలసీ టాస్క్‌ఫోర్స్' (Balance Sheet Policy Task Force) లో రాజన్ సేవలందించనున్నారు. హార్వర్డ్ ఆర్థికవేత్త కారెన్ దైనాన్, ఫెడ్ మాజీ గవర్నర్ జెరెమీ స్టెయిన్‌లతో కలిసి ఆయన ఈ ప్యానెల్‌లో పనిచేస్తారు.

కరోనా సమయంలో దాదాపు $9 ట్రిలియన్లకు చేరిన ఫెడ్ బ్యాలెన్స్ షీట్‌ను సమీక్షించడం ఈ ప్యానెల్ ముఖ్య ఉద్దేశం. ఫెడ్ ఆస్తుల హోల్డింగ్స్, ద్రవ్య విధాన అమలులో వాటి పాత్ర, దానివల్ల కలిగే లాభనష్టాలపై ఈ కమిటీ లోతైన అధ్యయనం చేస్తుంది.

టాస్క్‌ఫోర్స్‌లో ఇతర భారతీయులు ఎవరు?

ఈ సంస్కరణల కమిటీలో చోటు దక్కించుకున్న మరో ఇద్దరు భారతీయ నిపుణులు:

1. రాజ్ చెట్టి (ఆర్థికవేత్త): ఢిల్లీలో జన్మించిన రాజ్ చెట్టి ప్రస్తుతం హార్వర్డ్ విశ్వవిద్యాలయంలో ఆర్థిక శాస్త్ర ఆచార్యులుగా ఉన్నారు. ఆయన 'డేటా టాస్క్‌ఫోర్స్' (Data Task Force) కు కో-లీడర్‌గా వ్యవహరిస్తారు. వాల్‌మార్ట్ మాజీ సీఈఓ డౌగ్ మెక్‌మిలన్‌తో కలిసి ఆయన పని చేయనున్నారు. అమెరికా ఆర్థిక వ్యవస్థలోని అసమానతలు, ఉద్యోగ మార్కెట్‌పై రియల్ టైమ్ డేటాను విశ్లేషించి, ఫెడ్ సరైన నిర్ణయాలు తీసుకోవడానికి ఈ ప్యానెల్ సహాయపడుతుంది.

2. ఆశా శర్మ (టెక్నాలజీ నిపుణురాలు): మైక్రోసాఫ్ట్ ఎగ్జిక్యూటివ్ వైస్ ప్రెసిడెంట్, ఎక్స్‌బాక్స్ (Xbox) సీఈఓ అయిన ఆశా శర్మ, 'ప్రొడక్టివిటీ అండ్ జాబ్స్ టాస్క్‌ఫోర్స్' (Productivity and Jobs Task Force) లో సభ్యురాలిగా నియమితులయ్యారు. ఆర్టిఫిషియల్ ఇంటెలిజెన్స్ (AI) వంటి సరికొత్త సాంకేతికతలు దేశ ఉత్పాదకత, ఉద్యోగ కల్పన, ఆర్థిక వృద్ధిపై ఎలాంటి ప్రభావం చూపుతాయో ఈ ప్యానెల్ అంచనా వేస్తుంది.

'పారదర్శకత, కొత్త ఆలోచనల కోసమే ఈ నిర్ణయం'

ఫెడ్ చైర్మన్ కెవిన్ వార్ష్ స్పందిస్తూ, 'వివిధ రంగాలకు చెందిన ప్రపంచ అత్యుత్తమ మేధావులు మాతో కలిసి పనిచేయడానికి అంగీకరించడం గర్వకారణం. ఫెడరల్ రిజర్వ్ పనితీరును మరింత మెరుగుపరచడమే మా లక్ష్యం. నేను నమ్మిన 15 మంది అంతర్జాతీయ నిపుణులను ఈ టాస్క్‌ఫోర్స్‌ల కోసం ఎంపిక చేశాను. ఇది వ్యవస్థలో పారదర్శకతకు, కొత్త ఆలోచనలకు వేదిక కానుంది' అని పేర్కొన్నారు.

ఈ టాస్క్‌ఫోర్స్‌లు ప్రధానంగా ఐదు రంగాలపై దృష్టి పెడతాయి. కమ్యూనికేషన్స్, బ్యాలెన్స్ షీట్ విధానం, ఆర్థిక డేటా వినియోగం, ఉత్పాదకత-ఉద్యోగాలు, ద్రవ్యోల్బణ నియంత్రణ మార్గదర్శకాలు.

అమెరికా వంటి అగ్రరాజ్య ఆర్థిక వ్యవస్థను తిరిగి ట్రాక్‌లోకి తీసుకురావడానికి, అక్కడి సెంట్రల్ బ్యాంక్ తీసుకున్న ఈ నిర్ణయంలో భారతీయ నిపుణులకు పెద్దపీట వేయడం గమనార్హం. ఇది ప్రపంచ ఆర్థిక రంగంలో భారతీయ మేధస్సుకు దక్కిన మరో అరుదైన గౌరవంగా భావించవచ్చు.

ఈ వార్తలు కూడా చదవండి...

తుది దశకు అహ్మదాబాద్ విమాన ప్రమాద దర్యాప్తు: కేంద్రమంత్రి

ఆస్తి వేలం వివాదం కేసు.. సుప్రీంకోర్టును ఆశ్రయించిన బండ్ల గణేశ్

Read Latest Telangana News And AP News And National News

And Telugu News