రాముణ్ని వ్యతిరేకిస్తూ.. శివుణ్ని పూజించే వాళ్లు రావణుడి వంటివారే!
ABN , Publish Date - Oct 01 , 2026 | 04:58 AM
రాముడు, శివుడిని ఉద్దేశించి తెలంగాణ సీఎం రేవంత్‌ రెడ్డి చేసిన వ్యాఖ్యలపై బీజేపీ బుధవారం మండిపడింది. హిందువులను విభజించేందుకే ఈ వ్యాఖ్యలు చేస్తున్నట్లు పేర్కొంది.
సీఎం రేవంత్‌రెడ్డి
వ్యాఖ్యలపై బీజేపీ కౌంటర్‌
అది రాక్షసుల తీరేనని ఎద్దేవా
హిందువులను విభజించేందుకు కాంగ్రెస్
కుట్ర చేస్తోందని ఆరోపణ
న్యూఢిల్లీ, సెప్టెంబరు 30: రాముడు, శివుడిని ఉద్దేశించి తెలంగాణ సీఎం రేవంత్‌ రెడ్డి చేసిన వ్యాఖ్యలపై బీజేపీ బుధవారం మండిపడింది. హిందువులను విభజించేందుకే ఈ వ్యాఖ్యలు చేస్తున్నట్లు పేర్కొంది. సీఎం రేవంత్‌ రెడ్డి వ్యాఖ్యలపై బీజేపీ అధికార ప్రతినిధి, రాజ్యసభ ఎంపీ సుధాంశు త్రివేది బీజేపీ కేంద్ర కార్యాలయంలో బుధవారం నిర్వహించిన ప్రెస్‌ కాన్ఫరెన్స్‌లో మాట్లాడుతూ.. హిందువులను విభజించేందుకు కాంగ్రెస్ ఎప్పుడూ కుట్రలు చేస్తూనే ఉందని ఆరోపించారు. ఇప్పుడు ఏకంగా హిందూ దేవుళ్లనే విడదీసేందుకు తెగించిందని పేర్కొన్నారు. ఇది అత్యంత నీచ రాజకీయాలకు ఉదాహరణ అని విమర్శించారు. ఎవరైతే రాముణ్ని వ్యతిరేకిస్తూ శివుణ్ని పూజిస్తారో వాళ్లు రావణుడి వంటి వారేనని సీఎం రేవంత్‌ రెడ్డిని ఉద్దేశించి పేర్కొన్నారు. ఇది వాస్తవమని, రామ్‌చరిత్‌ మాన్‌సలో ఈమేరకు రాసి ఉందని.. అది రాక్షసుల తీరేనని మండిపడ్డారు. కాంగ్రెస్ హిందూ సమాజాన్ని ఉత్తరాది, దక్షిణాదివారిగా విభజించాలని చూస్తోందని త్రివేది ఆరోపించారు. జూబ్లీహిల్స్‌ ఉప ఎన్నికల్లో సీఎం రేవంత్‌ కాంగ్రెస్ కు ముస్లింలు బలమని, ముస్లింలకు కాంగ్రెస్ బలమని చెప్పారని పేర్కొన్నారు. 2024 లోక్‌సభ ఎన్నికల్లో గెలిచాక రాహుల్‌గాంధీ దేవుడి పేరు మీద ప్రమాణస్వీకారం చేయలేదన్నారు. ఆయన నాస్తికుడు.. ఆయన పార్టీ నాస్తిక పార్టీ అని విమర్శించారు.
హిందువుల విషయంలోనే కాంగ్రెస్ పితృస్వామ్యం సమస్య అంటూ గోల చేస్తుందని... అదే కేరళం గ్రాండ్‌ ముఫ్తీ మహిళలు ఇంటికే పరిమితం కావాలని.. వారిని నెక్‌లెస్ లా భద్రంగా ఉంచాలని అన్నప్పుడు మాత్రం నోరెత్తదని ఎద్దేవా చేశారు. బ్రిటిష్‌ వాళ్లు తమ దేశం కోసం భారతీయుల్ని విభజించారని... అదే కాంగ్రెస్ అధికారం కోసం దేశంలో ప్రతీ ఒక్కరినీ విభజించిందని విమర్శించారు. మీరు (కాంగ్రెస్, సీఎం రేవంత్‌) శివుడి పరమ భక్తులైతే... కాశీవిశ్వనాథ్‌ ఆలయంలో ఔరంగజేబ్‌ పేరు మీదున్న మసీదును ఏం చేద్దామనుకుంటున్నారు.. చెప్పండి? అని ప్రశ్నించారు. ఆ విషయంలో కోర్టు నిర్ణయం తీసుకుంటుందని, అయితే తాను మాత్రం శివుడి ఏ జ్యోతిర్లింగంపైనా విదేశీ ఆక్రమణదారుల గుర్తులు ఉండకూడదని హృదయపూర్వకంగా కోరుకుంటున్నానన్నారు. ఈ విషయంలో రేవంత్‌, నాస్తిక రాహుల్‌, కాంగ్రెస్ స్పందించాలని కోరారు.
ఈ వార్తలు కూడా చదవండి
రష్యా సైన్యంలో చేరొద్దు.. భారతీయులకు కేంద్రం హెచ్చరిక
డొనాల్డ్ ట్రంప్‌తో మాట్లాడా: ప్రధాని మోదీ