వినాయకుడిని ఇంటికి తీసుకొస్తున్నారా? ముందుగా ఈ ఏర్పాట్లు చేయండి

ఇంటర్నెట్ డెస్క్: వినాయక చవితి వేడుకలకు భక్తులు సిద్ధమవుతున్నారు. గణపతిని ఇంటికి తీసుకురావడం వల్ల శుభం, సానుకూలత, జ్ఞానం, ఐశ్వర్యం కలుగుతాయని భక్తుల విశ్వాసం. అందుకే విగ్రహ ప్రతిష్ఠకు ముందు కొన్ని ముఖ్యమైన ఏర్పాట్లు చేసుకోవాలని పండితులు చెబుతున్నారు.

పూజా స్థలాన్ని శుభ్రం చేయండి

గణపతిని ఇంటికి తీసుకురావడానికి ముందు ఇంటిని పూర్తిగా శుభ్రం చేసుకోవాలి. అవసరం లేని వస్తువులను తొలగించి, పూజా గది, విగ్రహాన్ని ప్రతిష్ఠించే ప్రదేశాన్ని శుభ్రంగా ఉంచాలి. పూజా స్థలంలో శుభ్రమైన పీటను ఏర్పాటు చేసి, దానిపై ఎరుపు లేదా పసుపు రంగు వస్త్రాన్ని పరచుకోవచ్చు. పూలు, మామిడి ఆకులు, రంగవల్లులు, దీపాలతో మండపాన్ని అందంగా అలంకరించుకోవచ్చు.

పూజా సామగ్రిని ముందుగానే సిద్ధం చేసుకోండి

దీపం, అగరబత్తులు, అక్షింతలు, కలశం, కొబ్బరికాయ, పంచామృతం తదితర పూజా సామగ్రిని ముందుగానే సిద్ధం చేసుకోవాలి. గణపతికి నైవేద్యంగా సమర్పించేందుకు మోదకాలు, పండ్లు కూడా సిద్ధంగా ఉంచుకోవాలి. వీలైనంత వరకు సహజమైన మట్టితో తయారు చేసిన పర్యావరణహిత గణపతి విగ్రహాన్ని ఎంచుకోవడం మంచిది. భక్తిశ్రద్ధలతో విగ్రహాన్ని ఇంటికి తీసుకువచ్చి ప్రతిష్ఠించాలి. మట్టి గణపతి విగ్రహం అయితే ఇంట్లోనే నీటితో నిమజ్జనం చేసి, ఆ మట్టిని మొక్కలకు ఉపయోగించుకోవచ్చు. పర్యావరణానికి హాని కలగకుండా నిమజ్జనం చేయడం ఉత్తమం.

పూజా ముహూర్తం

ఈ ఏడాది గణేష్ చతుర్థి సెప్టెంబరు 14న జరుపుకోనున్నారు. మధ్యాహ్న పూజకు ఉదయం 11:02 గంటల నుంచి మధ్యాహ్నం 1:21 గంటల వరకు శుభ సమయం ఉందని పంచాంగ వివరాలు చెబుతున్నాయి.

Also Read:

వినాయకుడికి ఇష్టమైన నైవేద్యాలు ఇవే.. పూజలో తప్పక సమర్పించండి.!

మట్టి వినాయకుడు Vs ప్లాస్టర్ ఆఫ్ ప్యారిస్ విగ్రహాం.. ఎలా గుర్తించాలి?