ఇజ్రాయెల్‌పై ఇరాన్ క్షిపణుల దాడి: ఇద్దరు మృతి, పలువురికి గాయాలు

టెల్ అవీవ్, ఫిబ్రవరి 18: ఇరాన్ - ఇజ్రాయెల్ మధ్య కొనసాగుతున్న యుద్ధం భయంకరమైన మలుపు తిరిగింది. బుధవారం తెల్లవారుజామున ఇరాన్ ప్రయోగించిన భారీ బాలిస్టిక్ క్షిపణుల దాడిలో సెంట్రల్ ఇజ్రాయెల్‌లో ఇద్దరు పౌరులు ప్రాణాలు కోల్పోయారు. ఈ దాడిని ఇజ్రాయెల్ రక్షణ దళాలు (IDF), అత్యవసర సేవా విభాగం (MDA) ధృవీకరించాయి.

ఘటన వివరాలు:

ఇజ్రాయెల్ కాలమానం ప్రకారం బుధవారం తెల్లవారుజామున ఇరాన్ క్షిపణుల వర్షం కురిపించింది. ఈ క్రమంలో రాజధాని టెల్ అవీవ్‌కు తూర్పున ఉన్న రామత్ గాన్ (Ramat Gan) ప్రాంతంలోని ఒక నిర్మాణ స్థలంపై క్షిపణి నేరుగా దాడి చేసింది.

మృతులు: తీవ్రమైన గాయాలతో స్పృహ కోల్పోయిన ఒక పురుషుడు, ఒక మహిళను పారామెడిక్స్ పరీక్షించగా, వారు అప్పటికే మరణించినట్లు ప్రకటించారు. క్షిపణి శకలాలు పడటం వల్ల బెని బ్రాక్ (Bnei Brak) ప్రాంతంలో పలువురికి గాయాలయ్యాయి. క్షిపణి శకలాలు ఎక్కడైనా కనిపిస్తే వాటిని ముట్టుకోవద్దని, వెంటనే భద్రతా దళాలకు సమాచారం ఇవ్వాలని ఇజ్రాయెల్ అధికారులు తమ పౌరులను కోరారు.

ప్రతీకార చర్యగా ఇరాన్ ప్రకటన

ఇరాన్ ఉన్నత స్థాయి భద్రతా అధికారి అలీ లారిజానీని ఇజ్రాయెల్ మంగళవారం హతమార్చిన సంగతి తెలిసిందే. దీనికి ప్రతీకారంగానే ఈ 'క్లస్టర్ వార్‌హెడ్' క్షిపణులను ప్రయోగించినట్లు ఇరాన్ రివల్యూషనరీ గార్డ్స్ (IRGC) ప్రకటించింది. క్షిపణి రక్షణ వ్యవస్థలను ధ్వంసం చేసే లక్ష్యంతో ఈ దాడులు చేసినట్లు వారు పేర్కొన్నారు.

ఇలా ఉండగా, పశ్చిమాసియా యుద్ధంలో 18వ రోజైన మంగళవారం ఇజ్రాయెల్‌ జరిపిన దాడుల్లో ఇరాన్‌ అత్యున్నత సైనికాధికారి అలీ లారిజానీ, ఇస్లామిక్‌ రివల్యూషనరీ గార్డ్‌ అనుబంధ బసీజ్‌ మిలీషియా అధిపతి జనరల్‌ గులాం రెజా సాల్మనీ తాము జరిపిన దాడుల్లో మృతి చెందినట్లు ఇజ్రాయెల్‌ రక్షణ మంత్రి ఇజ్రాయెల్‌ కట్జ్‌ ప్రకటించారు.

ఇజ్రాయెల్, అమెరికా స్పందన

క్షిపణి దాడుల నేపథ్యంలో ఇజ్రాయెల్ హోమ్ ఫ్రంట్ కమాండ్ ప్రజలను అప్రమత్తం చేసింది. సైరన్లు మోగగానే సురక్షిత ప్రాంతాలకు వెళ్లాలని హెచ్చరించింది. ఇరాన్ ప్రయోగించిన అనేక క్షిపణులను ఇజ్రాయెల్ రక్షణ దళాలు గాలిలోనే అడ్డుకున్నట్టు తెలిపింది. మరోవైపు, అమెరికా కూడా ఈ ఉద్రిక్తతల్లో జోక్యం చేసుకుంది. హార్ముజ్ జలసంధి సమీపంలోని ఇరాన్ క్షిపణి కేంద్రాలపై అమెరికా బలగాలు 5,000 పౌండ్ల బంకర్ బస్టర్ బాంబులతో దాడులు నిర్వహించినట్లు యుఎస్ సెంట్రల్ కమాండ్ వెల్లడించింది.

ప్రస్తుత పరిస్థితి

ఈ క్షిపణి దాడులతో మధ్యప్రాచ్యంలో యుద్ధ మేఘాలు మరింతగా కమ్ముకున్నాయి. ఇప్పటికే లెబనాన్, సిరియా సరిహద్దుల్లో ఘర్షణలు జరుగుతుండగా, నేరుగా ఇరాన్-ఇజ్రాయెల్ మధ్య జరుగుతున్న ఈ దాడులు ప్రపంచ దేశాలను ఆందోళనకు గురిచేస్తున్నాయి. చమురు ధరలు పెరగడం, అంతర్జాతీయ నౌకాయానానికి ముప్పు వాటిల్లడంతో ఐక్యరాజ్యసమితి శాంతి చర్చలకు పిలుపునిస్తోంది.

ఇవి కూడా చదవండి..

సెలవు ఇవ్వలేదని.. బ్యాంక్ మేనేజర్‌ను కాల్చేసిన గార్డ్..

మీ కళ్లకు పరీక్ష.. ఈ గడ్డిలో పాము ఎక్కడుందో 15 సెకెన్లలో కనిపెట్టండి..