ఇంధన నౌక హైజాక్‌

• భారతీయుడు సహా ఐదుగురు నావికుల హత్య

• సోమాలియా తీరంలో పైరేట్ల ఘాతుకం

మొగాదీషు, సెప్టెంబరు 30: ఓ ఇంధన నౌకను హైజాక్‌ చేసిన సోమాలియా సముద్రపు దొంగలు (పైరేట్స్‌) అందులోని ఐదుగురు సిబ్బందిని హతమార్చారు. మృతుల్లో ఒక భారతీయ నావికుడు, ముగ్గురు పాకిస్థానీలు, ఒక మయన్మార్‌ పౌరుడు ఉన్నారు. ఈ కాల్పుల్లో మరో భారతీయుడు, ముగ్గురు పాకిస్థానీలు తీవ్రంగా గాయపడ్డారు. సోమాలియా పుంట్‌ల్యాండ్‌ తీరంలో ఉన్న ఆ నౌకను తమ నియంత్రణలోకి తీసుకునేందుకు భద్రతాబలగాలు ప్రయత్నించిన సమయంలో పైరేట్లు ఈ ఘాతుకానికి పాల్పడినట్లు తెలుస్తోంది. యూరోపియన్‌ యూనియన్‌ నౌకాదళం తెలిపిన వివరాల ప్రకారం.. పలావు దేశ పతాకంతో 18,500 బారెళ్ల ఇంధనంతో సోమాలియా రాజధాని మొగాదీషు వైపు వెళ్తున్న ‘ఎమ్‌టీ ఆనర్‌ 25’ అనే ఇంధన నౌకను ఈ ఏడాది ఏప్రిల్‌ 21న సముద్రపు దొంగలు హైజాక్‌ చేశారు. ఆ సమయంలో నౌకలో మొత్తం 17 మంది సిబ్బంది ఉన్నారు. ఈ నౌకను రక్షించడానికి పుంట్‌ల్యాండ్‌కు చెందిన మారిటైమ్‌ పోలీస్‌ ఫోర్స్‌ (పీఎంపీఎఫ్‌) మంగళవారం నాడు ప్రత్యేక ఆపరేషన్‌ చేపట్టింది. భద్రతా దళాలు నౌకను చుట్టుముడుతున్నట్లు గమనించిన పైరేట్లు నౌకలోని సిబ్బందిపై కాల్పులు జరిపారు. ఈ దాడిలో ఐదుగురు నావికులు అక్కడికక్కడే మరణించగా, మరో నలుగురు తీవ్రంగా గాయపడ్డారు. ఎదురుదాడికి దిగిన పుంట్‌ల్యాండ్‌ భద్రతా దళాలు నౌకను విజయవంతంగా తమ ఆధీనంలోకి తీసుకుని, 16 మంది సముద్రపు దొంగలను అరెస్టు చేశారు.

ఈ వార్తలు కూడా చదవండి

సూపర్ ఇంటెలిజెన్స్.. ఏఐకి కొత్త పేరును ప్రకటించిన ట్రంప్

రెండు నిమిషాల్లో 17 వేల అడుగుల కిందకు.. దుబాయ్‌-టెల్ అవీవ్ విమానంలో ఏం జరిగింది