ఆలస్యంగా నిద్రపోవడం వల్ల బరువు తగ్గడం కష్టమవుతుందా?

ఇంటర్నెట్ డెస్క్: ఆరోగ్యంగా ఉండేందుకు మంచి ఆహారం తీసుకోవడం, వ్యాయామం చేయడం వంటి అలవాట్లు ఉన్నా, సరైన సమయంలో నిద్రపోకపోతే వాటి ప్రయోజనం పూర్తిగా అందదని ఆరోగ్య నిపుణులు చెబుతున్నారు. ముఖ్యంగా రోజూ ఒకే సమయంలో నిద్రపోని వారు లేదా రాత్రి 11 గంటల వరకు మేల్కొనేవారు బరువు తగ్గడంలో ఇబ్బంది పడతారు.

బరువు తగ్గడం అంటే కేవలం తక్కువ కేలరీలు తీసుకోవడం లేదా వ్యాయామం చేయడం మాత్రమే కాదు. మన శరీరానికి ఒక సహజ జీవ గడియారం (బయోలాజికల్ క్లాక్) ఉంటుంది. ఆ గడియారం ప్రకారం నిద్రపోతేనే శరీరం సరిగ్గా పనిచేస్తుంది. రాత్రి ఆలస్యంగా నిద్రపోతే జీవక్రియ (మెటాబాలిజం) దెబ్బతింటుంది. దీంతో బరువు తగ్గడం కష్టమవుతుంది.

సాధారణంగా రాత్రి 10:30 తర్వాత శరీరంలో జీర్ణక్రియ నెమ్మదిస్తుంది. ఈ సమయంలో మేల్కొని ఉంటే, శరీరం ఒత్తిడికి గురవుతుంది. అప్పుడు కార్టిసాల్ అనే ఒత్తిడి హార్మోన్ విడుదల అవుతుంది. ఈ హార్మోన్ ఎక్కువగా ఉంటే.. శరీరం కొవ్వును కరిగించడం తగ్గించి, దానిని నిల్వ చేయడం ప్రారంభిస్తుంది. అందుకే ఆరోగ్యకరమైన ఆహారం తీసుకున్నా, వ్యాయామం చేసినా బరువు తగ్గడం కష్టం అవుతుంది.

రాత్రి 11 గంటల నుండి తెల్లవారుజామున 3 గంటల వరకు శరీర కణాలు మరమ్మతు అవుతాయి. ఈ సమయంలో నిద్రపోకపోతే, శరీర పనితీరు సరిగ్గా ఉండదు. అలాగే ఆకలి నియంత్రించే హార్మోన్లు కూడా ప్రభావితమవుతాయి. దీనివల్ల ఆకలి పెరిగి, బరువు పెరిగే అవకాశం ఉంటుంది. అదనంగా నిద్రలేమి వల్ల ఇన్సులిన్ స్థాయిలు పెరిగి, కొవ్వు నిల్వ పెరుగుతుంది.

శరీరానికి సరిపడా నిద్ర లేకపోతే, మీరు తీసుకునే ఆరోగ్యకరమైన ఆహారం, డీటాక్స్ పానీయాలు కూడా సరైన ఫలితం ఇవ్వవు. రాత్రి ఆలస్యంగా నిద్రపోవడం వల్ల శరీరంలో సహజంగా జరిగే డీటాక్స్ ప్రక్రియ ఆగిపోతుంది. దీంతో అజీర్ణం, ఉబ్బరం వంటి సమస్యలు వస్తాయి. జీవక్రియ నెమ్మదించి, శరీరంలో కొవ్వు పెరుగుతుంది.

చిట్కాలు:

• బరువు తగ్గాలనుకునే వారు రాత్రి 11 గంటల లోపు తప్పకుండా నిద్రపోవాలి.

• నిద్రపోయే ముందు కనీసం ఒక గంట మొబైల్, ల్యాప్‌టాప్ వంటి పరికరాలను ఉపయోగించకూడదు.

• నిద్రపోయే ముందు కనీసం మూడు గంటల ముందే భోజనం పూర్తి చేయాలి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

యువతలో బీపీ పెరగడానికి కారణం తెలుసా?

పాదాలలో ఈ 4 లక్షణాలు కనిపిస్తే జాగ్రత్త..!

For More Latest News