డయాబెటిస్‌ ఉన్నవారు డ్రైవింగ్‌ చేయడం ప్రమాదకరమా?

ఇంటర్నెట్ డెస్క్: మధుమేహం ఉన్నవారు ముఖ్యంగా కాళ్లలో నరాల సమస్యలు ఉన్నవారు వాహనం నడిపేటప్పుడు జాగ్రత్తగా ఉండాలని ఓ అధ్యయనం సూచిస్తోంది. ఆరోగ్య నిపుణుల ప్రకారం.. మధుమేహం వల్ల శరీరంలోని రక్తనాళాలు, నరాలు దెబ్బతినే అవకాశం ఉంటుంది. దీనివల్ల చూపు మందగించడం, మూత్రపిండాల సమస్యలు, గుండె జబ్బులు, గాయాలు త్వరగా మానకపోవడం వంటి సమస్యలు రావచ్చు. అయితే మధుమేహం వల్ల నరాలు దెబ్బతినడం వాహనం నడిపే సామర్థ్యంపైనా ప్రభావం చూపుతుందని చాలామందికి తెలియదు.

పెడల్స్‌ విషయంలో సమస్యలు రావచ్చు

వాహనం నడుపుతున్నప్పుడు మనం కిందికి చూడకుండానే బ్రేక్, యాక్సిలరేటర్‌ను గుర్తించి నొక్కుతుంటాం. మన పాదాలు ఎక్కడ ఉన్నాయో చూడకుండానే తెలుసుకునే ఈ సామర్థ్యాన్ని వైద్య పరిభాషలో ప్రొప్రియోసెప్షన్ అంటారు. మధుమేహం కారణంగా కాళ్లలోని నరాలు దెబ్బతిన్నప్పుడు ఈ సామర్థ్యం తగ్గిపోవచ్చు. ముఖ్యంగా పాదాలు, చీలమండలలో స్పర్శ తగ్గడం వల్ల పాదం ఏ స్థానంలో ఉందో సరిగ్గా గుర్తించడం కష్టమవుతుంది.

నరాలు దెబ్బతింటే ఏం జరుగుతుంది?

మధుమేహం వల్ల పాదాలు, కాళ్లలో నరాలు దెబ్బతినడాన్ని డయాబెటిక్ పెరిఫెరల్ న్యూరోపతి అంటారు. ఇది మధుమేహం ఉన్నవారిలో సాధారణంగా కనిపించే సమస్య. దీని వల్ల పాదాల్లో తిమ్మిరి, మంట, జలదరింపు వంటి లక్షణాలు కనిపించవచ్చు. సమస్య పెరిగే కొద్దీ పాదాలపై ఒత్తిడి, స్పర్శను గుర్తించే సామర్థ్యం తగ్గుతుంది. కొంతమందికి ఈ సమస్య ఉన్న విషయం మొదట్లో తెలియకపోవచ్చు. ఇలాంటి నరాల సమస్య వాహనం నడిపేటప్పుడు కూడా ఇబ్బందులకు దారితీయవచ్చు. ముఖ్యంగా ఒక్కసారిగా బ్రేక్ వేయాల్సిన పరిస్థితుల్లో పాదం ఏ పెడల్‌పై ఉందో గుర్తించడంలో ఇబ్బంది కలగవచ్చు.

అధ్యయనంలో ఏం తేలింది?

మధుమేహం కారణంగా నరాల సమస్య ఉన్నవారి డ్రైవింగ్ సామర్థ్యాన్ని తెలుసుకునేందుకు 44 మంది లైసెన్స్‌ ఉన్న డ్రైవర్లతో డ్రైవింగ్ సిమ్యులేటర్‌ ద్వారా ఓ అధ్యయనం చేశారు. వారిలో 15 మందికి మధుమేహం కారణంగా కాళ్లలో నరాల సమస్యలు ఉన్నాయి. మిగిలిన వారికి అలాంటి సమస్యలు లేవు. అధ్యయనంలో భాగంగా వారిని కష్టమైన, పదునైన మలుపుల్లో వాహనం నడపాలని కోరారు.

నరాల సమస్య ఉన్న కొంతమంది డ్రైవర్లు మలుపుల్లో వేగాన్ని తగ్గించేందుకు బ్రేక్ వేయాల్సిన సమయంలో పొరపాటున యాక్సిలరేటర్‌ను నొక్కారు. నరాల సమస్య లేని డ్రైవర్లలో మాత్రం ఇలాంటి తప్పిదం కనిపించలేదు. దీంతో మధుమేహం వల్ల కాళ్లలో నరాల సమస్యలు ఏర్పడితే బ్రేక్, యాక్సిలరేటర్‌ మధ్య తేడాను గుర్తించడంలో ఇబ్బంది కలిగే అవకాశం ఉందని పరిశోధకులు సూచించారు.

మెదడుకు సరైన సమాచారం అందకపోవచ్చు

మన పాదాలు, చీలమండలలో ఉండే నరాలు వాటి స్థానం గురించి మెదడుకు సమాచారం అందిస్తాయి. నరాలు దెబ్బతిన్నప్పుడు ఈ సమాచారం సరిగ్గా అందకపోవచ్చు. దీంతో వాహనం నడుపుతున్న సమయంలో పాదం ఏ పెడల్‌పై ఉందో గుర్తించడంలో ఇబ్బంది రావచ్చు. ముఖ్యంగా పదునైన మలుపులు, అత్యవసర పరిస్థితుల్లో ఈ సమస్య ప్రమాదకరంగా మారే అవకాశం ఉంది.

నరాల సమస్య ఉన్న కొంతమంది డ్రైవర్లు వాహనం నడిపేటప్పుడు తమ పాదాల స్థానాన్ని చూసేందుకు కిందికి చూడాల్సి రావచ్చు. అలాగే యాక్సిలరేటర్‌పై ఒకే స్థాయిలో ఒత్తిడి పెట్టడం కూడా కష్టంగా మారవచ్చు. దీంతో పెడల్‌ను కొన్నిసార్లు చాలా తక్కువగా, మరికొన్నిసార్లు ఎక్కువగా నొక్కే అవకాశం ఉంటుంది.

మధుమేహం ఉన్నవారు ఏం చేయాలి?

మధుమేహం ఉన్నవారు తమ పాదాల ఆరోగ్యాన్ని నిర్లక్ష్యం చేయకూడదు. ముఖ్యంగా ఎక్కువగా వాహనం నడిపేవారు, లారీలు, బస్సులు వంటి వాణిజ్య వాహనాలు నడిపేవారు మరింత జాగ్రత్తగా ఉండాలి. నరాల సమస్య, తిమ్మిరి లేదా పాదాల్లో స్పర్శ తగ్గడం వంటి లక్షణాలు కనిపిస్తే వెంటనే వైద్యులను సంప్రదించాలి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ప్రెషర్‌ కుక్కర్‌ విజిల్‌ వేస్తూ నీరు కారుతోందా? ఈ సింపుల్‌ చిట్కాలతో సమస్యకు చెక్‌

దానం చేసేటప్పుడు ఈ 5 తప్పులు చేయొద్దు