Pushya Pournami: పుష్య పౌర్ణమి వేళ.. పొరపాటున కూడా ఈ తప్పులు చేయొద్దు.. ఎందుకంటే..

పౌర్ణమి సమయంలో అమ్మవారిని పూజిస్తే శీఘ్రమే ఫలితం వస్తుందంటారు. అందుకే పౌర్ణమి రోజు అమ్మవారిని ఆరాధిస్తారు. ప్రస్తుతం పుష్య మాసం నడుస్తోంది. జనవరి 3వ తేదీన పౌర్ణమి వచ్చింది. పుష్య పౌర్ణమి రోజు కొన్ని తప్పులు చేస్తే.. ఏడాది పొడవునా ఆర్థిక ఇబ్బందులు ఎదుర్కోవాల్సి ఉంటుంది. దీన్నుంచి బయటపడాలంటే.. ఈ రోజు కొన్ని పనులకు దూరంగా ఉండాలని పెద్దలు చెబుతున్నారు. ఈ రోజు తప్పులు చేస్తే ప్రతికూల శక్తి పెరిగి.. ఆర్థిక నష్టానికి దారి తీస్తుందని అంటున్నారు.

శాస్త్రాల ప్రకారం.. పుష్య పౌర్ణమి చాలా పవిత్రమైన రోజు. ఈ రోజు మహాలక్ష్మి, విష్ణుమూర్తులను పూజిస్తే ప్రత్యేక ఆశీర్వాదం లభిస్తుందని వేద పండితులు చెబుతున్నారు. ఈ రోజు దానం, పూజలకు ప్రత్యేక ప్రాముఖ్యత ఉంటుంది. ఈ రోజు ఏం చేయాలి.. ఏం చేయకూడదనే విషయాలను ఇప్పుడు తెలుసుకుందాం..

బ్రహ్మ ముహూర్తంలో..

ఈ రోజు బ్రహ్మ ముహూర్తం వేళ నిద్ర లేచి, శుభ్రంగా స్నానం చేసి.. ఆవు నెయ్యితో దీపారాధన చేయాలి. దీని వల్ల సూర్య భగవానుడు, లక్ష్మీదేవి అనుగ్రహం కలుగుతుందని వేద పండితులు చెబుతున్నారు.

వాదనలకు దిగకండి..

ఇంట్లో ఎవరితోనైనా ఘర్షణలు, తగాదాలకు దిగకూడదు. ఇలా చేయడం అశుభాన్ని సూచిస్తుంది. అలాగే ఇంట్లో సానుకూల శక్తిని నాశనం చేస్తుంది. కుటుంబంలోని విభేదాలు ఆర్థిక ఇబ్బందులకు దారి తీస్తాయి. కాబట్టి ప్రశాంతంగా ఉండేందుకు ప్రయత్నించండి. పొరపాటున కూడా కోపం తెచ్చుకోవద్దు. లేనిపక్షంలో ఏడాది పొడవునా ఇబ్బందులు పెరుగుతాయని చెబుతున్నారు.

సాత్విక ఆహారం..

ఈ రోజు సాత్విక ఆహారం తీసుకోవాలని వేద పండితులు చెబుతున్నారు. మాంసం, మద్యం, వెల్లుల్లితో పాటు ఉల్లిపాయ వంటి ఆహారానికి దూరంగా ఉండాలి. ఇది కెరీర్‌కు అడ్డుంకులు సృష్టిస్తుందట. అలాగే నగదు నష్టం, ఆరోగ్య సమస్యలకు దారి తీస్తుంది. దీంతోపాటు ప్రతికూల శక్తిని పెంచుతుంది. ధర్మాన్ని నాశనం చేస్తుందట.

నగదు లావాదేవీలు..

పౌర్ణమి వేళ.. రుణం తీసుకోవడం లేదా ఇవ్వడం అశుభాన్ని సూచిస్తుంది. ఆర్థిక పరిస్థితిపై చెడు ప్రభావాన్ని చూపుతుంది. మహాలక్ష్మీ అనుగ్రహాన్ని కొల్పోతారు. ఈ రోజు దానం చేయండి. అంతేకానీ రుణ లావాదేవీలు చేయకండి. అలా చేసినట్లు అయితే.. ఆర్థిక స్థిరత్వాన్ని కొల్పోతారు. ఈ పుష్య పౌర్ణమి రోజు ఈ తప్పులను నివారిస్తే లక్ష్మీదేవి అనుగ్రహం కలుగుతుందట. ఏడాది పొడవునా సంతోషంగా ఉండవచ్చని వేద పండితులు చెబుతున్నారు.